ខេត្តសៀមរាប៖អាជ្ញាធរក្រុងសៀមរាប សហការដោយកម្លាំងសមត្ថកិច្ចចម្រុះ ដឹកនាំដោយលោក សូរ ប្លាតុង អភិបាលក្រុងសៀមរាប ចុះទប់ស្កាត់ការលក់ដូររបស់ក្រុមអាជីវករចល័ត នៅតំបន់មុខព្រះរាជដំណាក់ ជិតព្រះវិហារព្រះអង្គចេកព្រះអង្គចម នាថ្ងៃទី០២…
ខេត្តសៀមរាប៖អាជ្ញាធរក្រុងសៀមរាប សហការដោយកម្លាំងសមត្ថកិច្ចចម្រុះ ដឹកនាំដោយលោក សូរ ប្លាតុង អភិបាលក្រុងសៀមរាប ចុះទប់ស្កាត់ការលក់ដូររបស់ក្រុមអាជីវករចល័ត នៅតំបន់មុខព្រះរាជដំណាក់ ជិតព្រះវិហារព្រះអង្គចេកព្រះអង្គចម នាថ្ងៃទី០២ ខែឧសភាឆ្នាំ២០១៨នេះ ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប។
លោក សូរ ប្លាតុង អភិបាលក្រុងសៀមរាប បានបញ្ជាក់ថា ការលក់ដូរអនាធិបតេយ្យនៅសួនច្បារព្រះរាជដំណាក់ ដែលកន្លងមក អាជីវករមកពីកន្លែងផ្សេងគ្នា ប្រមាណជិតកន្លែង(១០០នាក់) បានមកក្រាលកន្ទេលលក់ដូរនៅចិញ្ចើមផ្លូវសួនច្បារព្រះរាជដំណាក់ ក្នុងអំឡុងពេលចូលឆ្នាំ ហើយពួកគេនៅបន្តលក់រហូតមក ដោយមិនព្រមចាកចេញឡើយ ដែលធ្វើឱ្យតំបន់នេះ ប៉ះពាល់ដល់សណ្ដាប់ធ្នាប់ អនាម័យ និងបង្កការរំខានដល់ភ្ញៀវទេសចរផងនោះ នឹងមិនត្រូវបានអនុញ្ញាតឱ្យមានការលក់ដូរបន្តទៀតនោះទេ ។
លោក សូរ ប្លាតុង បានបញ្ជាក់ទៀតថា ក្នុងប្រតិបត្តិការនេះ ត្រូវបានដំណើរការដោយរលូន ពុំមានប្រតិកម្មអវិជ្ជមានណាមួយកើតឡើងនោះទេ ហើយអ្វីដែលគិតថា វាបានដំណើការប្រកបដោយជោគជ័យនោះ គឺអាស្រ័យទៅលើការព្រមទទួលយកនូវការយល់ដឹងរបស់ក្រុមអាជីវករទាំងនោះ និងទទួលស្គាល់ថា ក្នុងតំបន់នោះពិតជាទីកន្លែងដែលត្រូវហាមឃាត់លើការលក់ដូរ ដែលនាំឱ្យបាត់បង់សណ្តាប់ធ្នាប់ប្រាកដមែន ព្រោះជាទីតាំងសក្ការៈបូជា និងជាទីតាំងនៃតំបន់ត្រៀមទទួលភ្ញៀវទេសចរផងដែរ ។
សូមរម្លឹកថា ការចុះទប់ស្កាត់ការលក់ដូរនៅសួនច្បារព្រះរាជដំណាក់ ដោយពិនិត្យឃើញថា ៖ ទី១-ទីតាំងជាទីសក្ការៈបូជា ដែលមានសាធារណជនជាច្រើនចេញចូល ទី២-ជាតំបន់ទេសចរណ៍ ដែលកន្លងមកអ្នកទេសចរជាតិ និងអន្តរជាតិជាច្រើន ពិសេសអ្នកទេសចរជនជាតិចិន ចេញចូលទស្សនាព្រះរាជដំណាក់ រួមនឹងទីសក្ការៈបូជា ព្រះអង្គចេក ព្រះអង្គចម ផង និង ទី៣-ជាតំបន់បេះដូងនៃក្រុងសៀមរាប៕
ចែករំលែកព័តមាននេះ