រាជធានីភ្នំពេញ ៖ នារី២នាក់កំពុងតែជិះម៉ូតូធ្វើដំណើរតាមផ្លូវសុខៗក៏ស្រាប់តែមានបុរសម្នាក់ជាជនជាតិបរទេសបានជិះម៉ូតូធំជ្រុលទៅបុកពីក្រោយ បណ្តាលឱ្យបុរសជាជនជាតិបរទេសរូបនោះរងរបួសធ្ងន់ ហេតុការណ៍នេះបានកើតឡើងនៅវេលាម៉ោង៥ទាបភ្លឺ ថ្ងៃទី៣ ខែឧសភា ឆ្នាំ២០១៨ ទល់មុខនឹងស្ថានទូតជប៉ុន ផ្លូវព្រះនរោតម្ត សង្កាត់ទន្លេបាសាក់ ខណ្ឌចំការមន ។
ជនជាតិបរទេសរូបនោះមិនទាន់បានស្គាល់អត្តសញ្ញាណនៅឡើយទេគ្រាន់តែដឹងថា ជិះម៉ូតូម៉ាកហុងដាធន់ធំ ពណ៌ខ្មៅ ពាក់ផ្លាកលេខ កណ្តាល 1N-8650 ចំណែកនារីជនជាតិខ្មែរអ្នកបើកម៉ូតូមានឈ្មោះ ឆាំ ស្រីមុំ អាយុ១៧ឆ្នាំ មុខរបរលក់ម្ជួរ យីហោ១៦៨ ម្តុំវត្តភ្នំ សង្កាត់វត្តភ្នំ ខណ្ឌដូនពេញ ចំណែកម្នាក់ទៀតមិនបានឱ្យដឹងឈ្មោះ ជិះម៉ូតូម៉ាក PCX ពណ៌ស ពាក់ផ្លាកលេខ ភ្នំពេញ 1BU-8844 ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញនារីវ័យក្មេង២នាក់ជិះម៉ូតូមួយគ្រឿងម៉ាក PCX ពណ៌ស បានធ្វើដំណើរតាមផ្លូវព្រះនរោត្តមក្នុងទិសដៅពីជើងទៅត្បូង ខណៈមកដល់ចំណុចកើតហេតុក៏ស្រាប់តែបុរសដែលជាជនជាតិបរទេសម្នាក់វ័យជាង៥០ឆ្នាំមិនដឹងថា ចេញពីផឹកស៊ីនៅកន្លែងណានោះទេ គឺបានជិះម៉ូតូធំម៉ាកហុងដាបានធ្វើដំណើរតាមផ្លូវព្រះនរោត្តមក្នុងទិសដៅស្របគ្នាព្រមទាំងល្បឿនលឿន និងស្រវឹងផងនោះ បានជ្រុលទៅបុកនឹងម៉ូតូដែលជិះដោយនារីវ័យក្មេងចំពីក្រោយពេញទំហឹងបណ្តោយឱ្យម៉ូតូរបស់ជនជាតិបរទេសដួលបោកទៅនឹងផ្លូវធ្វើឱ្យជនបរទេសរូបនោះរងរបួសបែកក្បាលហូរឈាមជោគជាំ ត្រូវបានរថយន្តសង្គ្រោះបានមកដឹកយកទៅសង្គ្រោះនៅមន្ទីពេទ្យកាល់ម៉ែត្រ ម៉ូតូរងការខូចខាត ផ្នែកខាងមុខ បន្តិចបន្តួច ។
ដោយឡែកខាងម៉ូតូដែលជិះដោយនារីវ័យក្មេងពីរនាក់វិញរងការខូចខាតកូដថ្នាំបន្តិចបន្តួច និងធ្វើឱ្យអ្នកទាំងពីររងរបួសរលាត់ដៃរលាត់ជើងតិចតួច មិនបានទៅមន្ទីរពេទ្យទេ ។ ក្រោយពេលកើតហេតុសមត្ថកិច្ចជំនាញបានចុះទៅកន្លែងកើតហេតុ រួចហើយក៏បានធ្វើការវាស់វែងយកម៉ូតូទាំង២គ្រឿងទៅរក្សាទុកនៅអធិការដ្ឋានខណ្ឌចំការមនដើម្បីរងចាំធ្វើការដោះស្រាយ ៕
ចែករំលែកព័តមាននេះ