អាមេរិកនឹងអនុញ្ញាតឱ្យសម្ព័ន្ធមិត្តមួយចំនួនរួចផុតពីការដាក់ពន្ធ
ទីក្រុងវ៉ាស៊ីនតោន ៖ រដ្ឋមន្ត្រីពាណិជ្ជកម្មអាមេរិក លោក Wilbur Ross បាននិយាយថា រដ្ឋាភិបាលលោកប្រធានាធិបតី ដូណាល់ ត្រាំ…
ទីក្រុងវ៉ាស៊ីនតោន ៖ រដ្ឋមន្ត្រីពាណិជ្ជកម្មអាមេរិក លោក Wilbur Ross បាននិយាយថា រដ្ឋាភិបាលលោកប្រធានាធិបតី ដូណាល់ ត្រាំ មានគម្រោងបន្តអនុញ្ញាតឲ្យប្រទេសមួយចំនួនរួចផុតពីការដាក់ពន្ធលើដែកថែប និងអាលុយមីញ៉ូម ។
កាលពីថ្ងៃសៅរ៍ លោក Ross បាននិយាយក្នុងបទសម្ភាសន៍មួយថា នៅមុនថ្ងៃអង្គារនេះ នឹងមានសេចក្តីប្រកាសពីឈ្មោះប្រទេសរួចពន្ធ។ កាលពីថ្ងៃសុក្រ លោកបានផ្តល់សញ្ញាថា ប្រទេសទាំងនេះនឹងត្រូវទទួលយកការដាក់កូតា ជំនួសការដាក់ពន្ធ ។
ការដាក់ពន្ធលើដែកថែប និងអាលុយមីញ៉ូម គឺកំពុងតែធ្វើឲ្យភាពតានតឹងរវាងសហរដ្ឋអាមេរិក និងសម្ព័ន្ធមិត្តកាន់តែធ្ងន់ធ្ងរឡើង។ ជាមួយគ្នានេះ លោកត្រាំ បានគំរាមថា នឹងដាក់ពន្ធលើផលិតផលចិនប្រមាណ១៥០ប៊ីលានដុល្លារ ប្រសិនបើការចរចាមិនអាចដំណើរការទៅមុខបាន ។
កាលពីសប្តាហ៍មុន សហភាពអឺរ៉ុបត្រូវបានស្នើឲ្យចូលរួមក្នុងពាក្យបណ្តឹងមួយនៅអង្គការពាណិជ្ជកម្មពិភពលោក ដែលផ្តួចផ្តើមឡើងដោយប្រទេសចិន ដើម្បីប្រឆាំងនឹងការដាក់ពន្ធរបស់សហរដ្ឋអាមេរិក លើដែកថែប និងអាលុយមីញ៉ូម ។
សហភាពអឺរ៉ុបស្ថិតក្នុងចំណោមអ្នករិះគន់ពន្ធទាំងនេះខ្លាំងជាងគេ ដោយបាននិយាយថា វាមិនសមហេតុផលទេ ដែលសហរដ្ឋអាមេរិកចង់ដាក់ពន្ធលើដែកថែប និងអាលុយមីញ៉ូមនាំចូល ព្រោះវានឹងមានហានិភ័យដល់សន្តិសុខជាតិ ។
យោងតាមសេចក្តីប្រកាសពីការិយាល័យលោកស្រីនាយករដ្ឋមន្ត្រីចក្រភពអង់គ្លេស Theresa May បានឲ្យដឹងថា លោកស្រី និងលោកប្រធានាធិបតីបារាំង Emmanuel Macron ព្រមទាំងលោកស្រីអធិការបតីអាល្លឺម៉ង់ Angela Merkel បានយល់ព្រមសហការជាមួយប្រទេសផ្សេងទៀតនៅសហភាពអឺរ៉ុប ជាមួយរដ្ឋាភិបាលលោកត្រាំ ដើម្បីរួចផុតពីពន្ធជាអចិន្ត្រៃយ៍ ៕
ចែករំលែកព័តមាននេះ