ខេត្តកណ្តាល ៖ រថយន្ត២គ្រឿងបានត្របាក់គ្នានៅមុខរោងការ បណ្ដាលឱ្យស្លាប់ម្នាក់ និងរបួសធ្ងន់ម្នាក់ ព្រមទាំងខូចខាតសម្ភាររោងការមួយចំនួន ជាមួយនេះក៏ធ្វើឱ្យកូនកំលោះកូនក្រមំុដែលកំពុងរៀបចំទទួលភ្ញៀវតក់ស្លុតព្រលឹងចុងសក់ ។ ហេតុការណ៍ដែលកម្រកើតមាន បានកើតឡើងកាលពីវេលាម៉ោង០៥…
ខេត្តកណ្តាល ៖ រថយន្ត២គ្រឿងបានត្របាក់គ្នានៅមុខរោងការ បណ្ដាលឱ្យស្លាប់ម្នាក់ និងរបួសធ្ងន់ម្នាក់ ព្រមទាំងខូចខាតសម្ភាររោងការមួយចំនួន ជាមួយនេះក៏ធ្វើឱ្យកូនកំលោះកូនក្រមំុដែលកំពុងរៀបចំទទួលភ្ញៀវតក់ស្លុតព្រលឹងចុងសក់ ។ ហេតុការណ៍ដែលកម្រកើតមាន បានកើតឡើងកាលពីវេលាម៉ោង០៥
និង៥នាទីល្ងាចថ្ងៃទី២៧ មេសា កន្លងមក ស្ថិតនៅផ្លូវលេខជាតិ២១ ស្ថិតក្នុងភូមិឫស្សីដាច់ ឃំុព្រែកអំបិល ស្រុកស្អាង ។
មន្ត្រីនគរបាលចរាចរណ៍ស្រុកស្អាងបានឱ្យដឹងថា នៅល្ងាចថ្ងៃនោះ មានរថយន្តមួយគ្រឿងម៉ាកវីស្តូ ពណ៌ទឹកប្រាក់ ពាក់ផ្លាកលេខ ភ្នំពេញ ២AE-៨៩៥២ បើកបរដោយឈ្មោះ លឿង ថៃឡឺយ ភេទប្រុស អាយុ៣០ឆ្នាំ ជនជាតិវៀតណាម មានទីលំនៅក្នុងឃុំខាន់អាង ស្រុកអាន់ភូ ខេត្តអាងយ៉ាង ប្រទេសវៀតណាម ធ្វើដំណើរក្នុងទិសដៅពីត្បូងមកជើង ។ លុះមកដល់ចំណុចខាងលើ ស្រាប់តែរេចង្កូតទៅបុករថយន្តធុនធំមួយគ្រឿងម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ព្រះសីហនុ ៣A-៥៥៦៨ បើកបរដោយឈ្មោះ ណុល ម៉េងហុង ភេទប្រុស អាយុ១៩ឆ្នាំ រួមដំណើរដោយឈ្មោះ គា ឆាង ភេទប្រុស អាយុ១៩ឆ្នាំដូចគ្នា ជាព្រូ មានទីលំនៅក្នុងភូមិព្រែកសុឹង ឃុំសំពៅពូន ស្រុកកោះធំ ជាមួយគ្នានិងក្នុងដំណើរបញ្ច្រាសទិសគ្នា ។
ប្រភពដដែលបន្តទៀតថា ការបុកគ្នានោះគឺពេញទំហឹង បណ្ដាលឱ្យអ្នកបើកបររថយន្តវីស្តូជាជនជាតិវៀតណាមកៀបស្លាប់ភ្លាមៗនៅក្នុងរថយន្ត ។ ឯរថយន្តធំជ្រុលទៅបុកបុរសម្នាក់ឈ្មោះ ម៉ាន់ ម៉ុន អាយុ៦៥ឆ្នាំ ជាកសិករ មានទីលំនៅក្នុងភូមិឫស្សីដាច់ ឃុំព្រែកអំបិល ដែលកំពុងឈរទទួលភ្ញៀវនៅចិញ្ចើមផ្លូវរងរបួសធ្ងន់ ។បន្ទាប់មក រថយន្តធំជ្រុលទៅបុកសម្ភារនៅខាងមុខរោងការទៀត បណ្តាលឲ្យខូចខាតម៉ាសីុនថតវីដេអូ អំពូលភ្លើងLED កៅអីកាត់សក់ ព្រមទាំងជើងថតវីដេអូមួយចំនួនទៀត ។ ឯកូនកំលោះកូនក្រមុំ ដែលកំពុងចាំទទួលភ្ញៀវភ័យព្រលឹងចុងសក់ តែមិនមានរងគ្រោះថ្នាក់ក្នុងហេតុការណ៍នេះទេ ។ចំពោះបុរសដែលរងរបួសធ្ងន់ ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យកាល់ម៉ែត ឯរាជធានីភ្នំពេញ រីឯសពប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែកអ្នកបើករថយន្តធំ ត្រូវបានសមត្ថកិច្ចនាំយកមកសាកសួរនៅអធិការដ្ឋាននគរបាលស្រុលស្អាង ។
មន្ត្រីនគរបាលនិយាយថា ហេតុការណ៍នេះបង្កឡើងដោយអ្នកបើកបររថយន្តតូចបើកចូលចំណែកខាងស្ដាំដៃនៃរថយន្តធំ ព្រោះតែខ្វះការប្រុងប្រយ័ត្ន ចំណែកអ្នកបើកបររថយន្តធំបើកក្នុងល្បឿនលឿននិងខ្វះការប្រុងប្រយ័ត្នដែរ ខណៈលើកំណាត់ផ្លូវនេះត្រូវបានគេធ្វើរោងការនិងមានភាពអូ៊អរនៅមុខរោងការផង ។
ព័ត៌មានទាក់ទិននឹងរោងការដែលធ្វើលើកំណាត់ផ្លូវ តែងកើតឡើងជារឿយៗរហូតមានករណីខ្លះ រថយន្តដែលធ្វើដំណើរតាមដងផ្លូវ បុកចូលទៅក្នុងរោងក៏មានដែរ ៕
ចែករំលែកព័តមាននេះ