ខេត្តបាត់ដំបង ៖ យ៉ាងហោចណាស់ ស្ត្រីម្នាក់បានស្លាប់នៅក្នុងភ្លើងដែលឆេះលំនៅឋានចំនួន៦ល្វែងយ៉ាងសន្ធោសន្ធៅស្ទើរទាំងស្រុង កាលពីវេលាម៉ោង១០ និង៣០នាទីយប់ថ្ងៃទី២៩ ខែមេសា នៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង…
ខេត្តបាត់ដំបង ៖ យ៉ាងហោចណាស់ ស្ត្រីម្នាក់បានស្លាប់នៅក្នុងភ្លើងដែលឆេះលំនៅឋានចំនួន៦ល្វែងយ៉ាងសន្ធោសន្ធៅស្ទើរទាំងស្រុង កាលពីវេលាម៉ោង១០ និង៣០នាទីយប់ថ្ងៃទី២៩ ខែមេសា នៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង ដែលគេសង្ស័យថា អាចបណ្ដាលមកពីទុស្សេចរន្តអគ្គិសនី ។ លោក រៀម សារ៉េត នាយរងការិយាល័យបង្ការ និងពន្លត់អគ្គិភ័យនៃស្នងការដ្ឋានខេត្តបានឱ្យដឹងថា លំនៅឋានដែលត្រូវភ្លើងឆេះនេះ គឺជាផ្ទះល្វែងដែលភាគច្រើនសាងសង់ពីឈើប្រក់ស័ង្កសី ។ អគ្គិភ័យបានឆេះរាលដាលអស់ផ្ទះ៦ល្វែង ក្នុងនោះ៥ល្វែងរងការខូចខាតទាំងស្រុង រីឯ១ល្វែងទៀតឆេះអស់៣០% ។
លោក រៀម សារ៉េត បានសរសេរក្នុងរបាយការណ៍ថា ម្ចាស់ផ្ទះរងគ្រោះមាន ១-ឈ្មោះ ឆាង សារឿន ភេទប្រុស អាយុ៦៥ឆ្នាំ ២-ឈ្មោះ ស្រ៊ុន វឿន ភេទប្រុស អាយុ៤១ឆ្នាំ ៣-ឈ្មោះ ឆុន សុភាព ភេទប្រុស អាយុ៤៨ឆ្នាំ ៤-ឈ្មោះ លី សីុញ ភេទប្រុស អាយុ២៥ឆ្នាំ ៥-ឈ្មោះ លី សុខខេង ភេទស្រី អាយុ៦០ឆ្នាំ និង៦-ឈ្មោះ គឹម សៀន ភេទស្រី អាយុ៦៣ឆ្នាំ (ស្លាប់នៅក្នុងផ្ទះ) ។ លោក រៀម សារ៉េត បញ្ជាក់ថា បើតាមការសាកសួរដំបូង អគ្គិភ័យនេះទំនងអាចបណ្ដាលមកពីការឆ្លងចរន្តអគ្គិសនី ដែលផ្ដើមចេញពីផ្ទះរបស់ឈ្មោះ ឆាង សារឿន ហើយក៏ឆេះរាលដាលរហូតអស់៦ល្វែង និងមានស្លាប់មនុស្សតែម្ដង ។ សាក្សីនានានៅក្បែរកន្លែងកើតហេតុបានឱ្យដឹងដែរថា នៅវេលាម៉ោងប្រហែល៩យប់ មុនពេលកើតហេតុ គេឃើញកូនប្រុសម្ចាស់ផ្ទះឈ្មោះ ឆាង សារឿន បានចាក់ធុងបាស់យ៉ាងលាន់កក្រើក លុះដល់ម៉ោងជិត១០យប់ក៏បិទស្ងាត់សំឡេង ប៉ុន្តែក្រោយពីបិទបានប្រហែលកន្លះម៉ោង ក៏ស្រាប់តែមានអគ្គិភ័យកើតឡើងតែម្ដង ។ សាក្សីដដែលបញ្ជាក់ថា ពេលអគ្គិភ័យចាប់ផ្ដើមដំបូងគឺគេឃើញឆេះចេញពីផ្ទះឈ្មោះ ឆាង សារឿន នេះមុនគេ ហើយក៏ឆេះរាលដាលដល់ផ្ទះជាប់គ្នានោះជាបន្តបន្ទាប់ ។
ដោយឡែក ស្ត្រីរងគ្រោះដែលស្លាប់ឈ្មោះ គឹម សៀន ត្រូវអ្នកភូមិនិយាយថា គឺគាត់ស្នាក់នៅក្នុងផ្ទះតែម្នាក់ឯង ឯប្ដីរបស់គាត់នៅឯរាជធានីភ្នំពេញ ។ ពេលត្រូវភ្លើងឆេះ ស្ត្រីរងគ្រោះបានព្យាយាមរត់ចេញពីផ្ទះដែរ តែរត់ចេញមិនរួចដោយសារជាប់សោទ្វារ ហើយភ្លើងឆេះលឿនពេក បើទោះជាអ្នកភូមិព្យាយាមជួយសង្គ្រោះក៏មិនអាចចូលជួយគាត់បាន ។
លោកនាយរងការិយាល័យនិយាយថា បើតាមសាកសួរជំហានដំបូង ស្ត្រីរងគ្រោះបានចាក់សោទ្វារយ៉ាងតិចក៏២ជាន់ដែរ ព្រោះគាត់ស្នាក់នៅម្នាក់ឯង ដូច្នេះហើយទើបគាត់មិនអាចបើករត់ចេញទាន់ពេលវេលាខណៈភ្លើងកំពុងឆេះ។ ចំពោះមូលហេតុដែលនាំឱ្យមានអគ្គិភ័យវិញ លោកនាយរងការិយាល័យរូបនេះបញ្ជាក់ដែរថាបើតាមព័ត៌មានដែលមន្ត្រីការិយាល័យរបស់លោកទទួលបានជំហានដំបូង ក៏ដូចការអះអាងរបស់អ្នកភូមិដែរ គឺអាចផ្ដើមចេញពីផ្ទះរបស់ឈ្មោះ ឆាង សារឿន ។ ទោះជាយ៉ាងណា នេះគ្រាន់តែជាការសន្និដ្ឋានបឋមប៉ុណ្ណោះ ដែលពេលនេះមន្ត្រីជំនាញកំពុងធ្វើការស្រាវជ្រាវបន្ត ។ លោក រៀម សារ៉េត បញ្ជាក់ថា ជាមួយនឹងគ្រោះអគ្គិភ័យនេះ ម្ចាស់ផ្ទះនីមួយៗទំនងបាត់បង់ទ្រព្យសម្បត្តិស្ទើរទាំងស្រុងតែម្ដង ដោយសារតែអគ្គិភ័យនេះខ្លាំងនិងឆេះលឿនទាំងកណ្តាលយប់។ រថយន្តពន្លត់អគ្គិភ័យបានចំណាយទឹកអស់១២រថយន្ត ទើបអាចទប់ស្កាត់និងធ្វើឱ្យឥទ្ធិពលភ្លើងថមថយបាន ។
ចែករំលែកព័តមាននេះ