រាជធានីភ្នំពេញ ៖ យោងតាមគណនីហ្វេសប៊ុករបស់ លោក ញឹក ប៊ុនឆៃ បានបង្ហោះរូបភាពលោកចំនួនពីរសន្លឹកដែលមានសាច់ញាតិ និងមិត្តភក្តិទៅសួរសុខទុក្ខ ក្រោយត្រូវបានដោះលែងពីពន្ធនាគារ PJ…
រាជធានីភ្នំពេញ ៖ យោងតាមគណនីហ្វេសប៊ុករបស់ លោក ញឹក ប៊ុនឆៃ បានបង្ហោះរូបភាពលោកចំនួនពីរសន្លឹកដែលមានសាច់ញាតិ និងមិត្តភក្តិទៅសួរសុខទុក្ខ ក្រោយត្រូវបានដោះលែងពីពន្ធនាគារ PJ ។
ប្រភពដដែលបានសរសេរថា ៖ «លោកញឹក ប៊ុនឆៃ ត្រូវបានតុលាបញ្ជារឲ្យដោះលែង ហើយពេលនេះកូនចៅគាត់កំពុងតែសួរសុខទុក្ខគាត់ នៅក្នុងគេហដ្ឋានរបស់គាត់ផង ដែរ» ។
រម្លឹកថា លោក លី លឹបម៉េង ចៅក្រមស៊ើបសួរសាលាដំបូងរាជធានីភ្នំពេញនៅថ្ងៃទី៣០ មេសា ២០១៨ បានចេញដីកាដោះលែងលោក ញឹក ប៊ុនឆៃ អតីតប្រធានគណបក្សខ្មែររួបរួមជាតិឱ្យមានសេរីភាពឡើងវិញ ។
សូមរំលឹកថា លោក ញឹក ប៊ុនឆៃ អតីតប្រធានគណបក្សខ្មែររួបរួមជាតិត្រូវបានសមត្ថកិច្ចនគរបាលរាជធានីភ្នំពេញធ្វើការឃាត់ខ្លួនកាលពីវេលាម៉ោងប្រមាណ១២ថ្ងៃត្រង់ថ្ងៃទី០៣ សីហា ២០១៧ ពាក់ព័ន្ធករណីផ្តល់ទីតាំងផលិតគ្រឿងញៀន ក្នុងអំឡុងឆ្នាំ២០០៧ នៅស្រុកភ្នំស្រួច ខេត្តកំពង់ស្ពឺ ។ លោក ញឹក ប៊ុនឆៃ ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចចោទប្រកាន់ និងបានឃុំខ្លួនដាក់ពន្ធនាគារPJ ជាបណ្តោះអាសន្ន អស់រយៈពេលជិត៩ខែ ។ ពេលនេះត្រូវបានចៅក្រមស៊ើបសួរចេញដីកាបង្គាប់ឱ្យដោះលែងពីពន្ធនាគារវិញ ដោយបានបញ្ជាក់ថា (បង្គាប់មកលោកប្រធានមណ្ឌលអប់រំកែប្រែរាជធានីភ្នំពេញ PJ ឱ្យដោះលែងជនត្រូវចោទឈ្មោះ ញឹក ប៊ុនឆៃ ភេទប្រុស អាយុ៥៩ឆ្នាំ ជនជាតិខ្មែរ មុខរបរជាប្រធានគណបក្សខ្មែររួបរួមជាតិ ទីកន្លែងកំណើត ភូមិតាអុងខាងលិច ឃុំស្វាយចេក ស្រុកថ្មពួក ខេត្តបាត់ដំបង ។ មានទីលំនៅនៅមុនពេលឃាត់ខ្លួន ផ្ទះលេខ២២G ផ្លូវកែវចិន្តា ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ឪពុកឈ្មោះ ញឹក ឆេន (ស្លាប់) ម្តាយឈ្មោះ អួន សាម៉េត (ស្លាប់) ប្រពន្ធឈ្មោះ សម សុភាព មានកូន៤នាក់ ទោសពីមុនគ្មាន ជានីតិជន)។ ដីកានេះបញ្ជាក់ទៀតថា ត្រូវបានតុលាការដាក់ឱ្យស្ថិតនៅក្រោម ការត្រួតពិនិត្យពីបទសមគំនិតក្នុងបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន ប្រព្រឹត្តនៅចំណុចភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី០១ ខែមេសា ឆ្នាំ២០០៧ តាមមាត្រា២៩ នៃក្រមព្រហ្មទណ្ឌ មាត្រា៣៨.១ថ្មី ចំណុចទី៤ មាត្រា៣២.១ ចំណុចទី៤.ង នៃច្បាប់ស្តីពីវិសោធនកម្មច្បាប់ស្តីពីការត្រួតពិនិត្យគ្រឿងញៀន ឆ្នាំ២០០៥ ឱ្យនៅក្រៅឃុំជាបណ្តោះអាសន្ន បើសិនជាឈ្មោះនេះ មិនត្រូវបានឃុំខ្លួនពីបទល្មើសផ្សេងទៀត ៕
ចែករំលែកព័តមាននេះ