រាជធានីភ្នំពេញ ៖ គណៈវិស្វករកម្ពុជា នឹងបង្កើតបទប្បញ្ញត្តិមួយចំនួនសម្រាប់គ្រប់គ្រងវិស្វករ ដើម្បីធានាបាននូវសុវត្ថិភាព និងគុណភាពសំណង់ ។ ជាមួយគ្នានេះ គណៈវិស្វករកម្ពុជាបានអំពាវនាវដល់វិស្វករដែលមិនទាន់ចុះបញ្ជីទាំងអស់ ត្រូវរួសរាន់មកចុះបញ្ជីជាមួយគណៈវិស្វករកម្ពុជា ។ នេះបើតាមលោករដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈវិស្វករកម្ពុជា ។
លោករដ្ឋមន្ត្រី អ៊ិត សំហេង បានឲ្យដឹងក្រោយការប្រកាសបិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់គណៈវិស្វករកម្ពុជា ក្នុងអាណត្តិទី២ កាលពីល្ងាចថ្ងៃទី២៦ មេសា នៅទីស្ដីការក្រសួងការងារថា គណៈវិស្វករកម្ពុជានឹងរៀបចំបទប្បញ្ញត្តិមួយចំនួនទៀតសម្រាប់វិស្វករបរទេសដែលបម្រើការនៅកម្ពុជា ។
លោកក៏បានអំពាវនាវឲ្យវិស្វករខ្មែរ និងវិស្វករបរទេសទាំងអស់ ដែលបម្រើការនៅកម្ពុជា និងមិនទាន់មកចុះបញ្ជី គប្បីរួសរាន់មកចុះបញ្ជីជាមួយគណៈវិស្វករកម្ពុជា ដើម្បីទទួលបានអត្ថប្រយោជន៍ជាច្រើន ។
លោកថា មុននឹងគណៈវិស្វករកម្ពុជាទទួលចុះបញ្ជី វិស្វករនីមួយៗត្រូវឆ្លងកាត់ការត្រួតពិនិត្យ និងវាយតម្លៃផ្នែកគុណវឌ្ឍិ ប្រកបដោយភាពប្រាកដប្រជាពីសំណាក់គណៈកម្មការជំនាញមួយរបស់គណៈវិស្វករកម្ពុជា ។ ដូច្នេះ នៅពេលទទួលបានការចុះបញ្ជីហើយ សាមីវិស្វករនឹងទទួលបានការទទួលស្គាល់ជាសាធារណៈថា ខ្លួនពិតជាមានជំនាញពិតប្រាកដច្បាស់លាស់ និងមានឱកាសការងារច្រើន ។
គិតត្រឹមឆ្នាំ២០១៧ វិស្វករខ្មែរ និងបរទេស ដែលបានមកចុះបញ្ជីនៅគណៈវិស្វករកម្ពុជា មានចំនួនជាង៣ពាន់នាក់ ក្នុងនោះវិស្វករបរទេស ដែលបានចុះបញ្ជីមានតែ១៤នាក់ប៉ុណ្ណោះ ខណៈនៅតាមការដ្ឋានសំណង់ខ្ពស់ៗមួយចំនួន គេសង្កេតឃើញវិស្វករបរទេសមានចំនួនច្រើន ។
ទោះបីយ៉ាងណា លោករដ្ឋមន្ត្រីពន្យល់ថា បញ្ហាប្រឈមថ្មីសម្រាប់គណៈវិស្វករកម្ពុជាសព្វថ្ងៃ ដោយសារតែវិស្វករបរទេសមួយចំនួន ដែលចូលមកបម្រើការងារនៅកម្ពុជាហើយ ក៏ឆាប់ចេញទៅបរទេសវិញលឿន ហើយម្យ៉ាងទៀត ការផ្សព្វផ្សាយពាក់ព័ន្ធនឹងការជំរុញឲ្យពួកគេមកចុះបញ្ជីនោះ ក៏មិនទាន់ទូលំទូលាយដែរ ។
ទោះយ៉ាងនេះក្ដី លោកបានបង្ហាញដំណោះស្រាយថា គណៈវិស្វករកម្ពុជាបានពិភាក្សាលើការពង្រីកប្រព័ន្ធផ្សព្វផ្សាយបន្ថែម ដើម្បីនាំដំណឹងនេះទៅដល់បណ្ដាវិស្វករទាំងឡាយ ដែលមិនទាន់មកចុះបញ្ជីជាមួយគណៈវិស្វករកម្ពុជា ។ ក្រៅពីនេះ គណៈវិស្វករកម្ពុជានឹងរៀបចំបទប្បញ្ញត្តិមួយចំនួនទៀតសម្រាប់វិស្វករបរទេសដែលចង់បម្រើការងារនៅកម្ពុជា ពោលគឺពួកគេត្រូវបំពេញបែបបទឲ្យបានត្រឹមត្រូវ មុននឹងគ្រឹះស្ថាននានាទទួលពួកគេឲ្យចូលធ្វើការ ដើម្បីធានាបាននូវសុវត្ថិភាព និងគុណភាពនៃការដ្ឋានសំណង់នៅកម្ពុជា ។
លោករដ្ឋមន្ត្រី ក៏មានគោលបំណងចង់ឲ្យវិស្វករខ្មែរជំនាន់ថ្មីនេះបង្ហាញស្នាដៃឲ្យលេចធ្លោណាមួយ ដើម្បីទទួលបានកិត្តិនាមល្បីល្បាញដូចវិស្វករខ្មែរជំនាន់ចាស់ ដូចជាលោកតា វណ្ណ មូលីវណ្ណ ជាដើម ទោះបីលោកទទួលមរណភាពក្ដី ដោយបន្សល់ទុកនូវស្នាដៃជាច្រើនសម្រាប់កូនខ្មែរជំនាន់ក្រោយ ៕
ចែករំលែកព័តមាននេះ