រាជធានីភ្នំពេញ ៖ ការអភិវឌ្ឍវិស័យអចលនទ្រព្យកាលពីប៉ុន្មានឆ្នាំមុន គេឃើញថាភាគច្រើនសំដៅតែនៅរាជធានីភ្នំពេញ ទាំងការសាងសង់អគារខុនដូ សណ្ឋាគារ ការិយាល័យ និងសំណង់លំនៅឋាន ជាដើម ។…
រាជធានីភ្នំពេញ ៖ ការអភិវឌ្ឍវិស័យអចលនទ្រព្យកាលពីប៉ុន្មានឆ្នាំមុន គេឃើញថាភាគច្រើនសំដៅតែនៅរាជធានីភ្នំពេញ ទាំងការសាងសង់អគារខុនដូ សណ្ឋាគារ ការិយាល័យ និងសំណង់លំនៅឋាន ជាដើម ។ ក៏ប៉ុន្តែនៅពេលបច្ចុប្បន្ននេះ ការអភិវឌ្ឍវិស័យស្នូលមួយនេះ បានងាកចេញទៅតាមបណ្ដាខេត្តសក្ដានុពលមួយចំនួននៅព្រះរាជាណាចក្រកម្ពុជា ។
សម្រាប់អចលនទ្រព្យ ជាពិសេសវិស័យដីធ្លី នៅតំបន់ខេត្តជាប់មាត់សមុទ្រ គេឃើញថា មានខេត្តពីរដែលទទួលបានការចាប់អារម្មណ៍សម្រាប់អភិវឌ្ឍន៍ ក្នុងនោះខេត្តព្រះសីហនុអាចថា ជាខេត្តមាត់សមុទ្រជាប់លេខ១ និងតាមប្រកៀកប្រកិតដោយខេត្តកំពត ស្របពេលមានវិនិយោគិនទាំងក្នុង និងក្រៅប្រទេសជាច្រើនកំពុងចែចង់សម្រាប់អភិវឌ្ឍន៍គម្រោងនានា ។
បើសង្កេតមើលវិស័យដីធ្លីក្នុងខេត្តព្រះសីហនុ នាពេលបច្ចុប្បន្ននេះ ទាំងការជួល និងការទិញ-លក់ ហាក់មានសកម្មភាពផុសផុលយ៉ាងខ្លាំង ហើយតម្លៃវិញ ក៏មិនចាញ់តំបន់មួយចំនួននៅក្នុងរាជធានីភ្នំពេញដែរ ។ ជាក់ស្ដែង តម្លៃដីធ្លីដែលនៅជិតមាត់សមុទ្រ កំពុងត្រូវប៉ាន់សម្រាប់ជួល ឬលក់ទៅឲ្យវិនិយោគិនក្នុង និងក្រៅប្រទេស ដើម្បីអភិវឌ្ឍន៍ជាកន្លែងលំហែកាយផ្សេងៗ ។ អ្វីដែលពិសេសនោះ ខេត្តព្រះសីហនុមិនត្រឹមតែជាខេត្តទេសចរណ៍ដ៏សំខាន់ប៉ុណ្ណោះទេ តែវាក៏ជាខេត្តមជ្ឈមណ្ឌលពាណិជ្ជកម្មដ៏សំខាន់មួយផងដែរនៅក្នុងប្រទេសកម្ពុជា ហើយទំនិញសំខាន់ៗក៏ត្រូវបានឆ្លងកាត់តាមខេត្តនេះដែរ។
តាមការលើកឡើងរបស់វិនិយោគិនចិនមួយរូប ដែលត្រូវបានចាត់តាំងដោយប្រធានាធិបតីចិន ស៊ី ជីនពីង មកកម្ពុជា បានឲ្យដឹងថា ក្រុមវិនិយោគិនដែលបានមកដល់កម្ពុជា ជាមួយក្រុមលោក នឹងអភិវឌ្ឍន៍ខេត្តព្រះសីហនុឲ្យកាន់តែមានការរីកចម្រើនទៅមុខជាបន្តបន្ទាប់ទាំងអចលនទ្រព្យ និងទេសចរណ៍ ។
លោកថា ៖« មិនយូរទៀតទេ ក្រុមយើងនឹងអភិវឌ្ឍន៍ខេត្តព្រះសីហនុ ឲ្យរីកចម្រើនដូចជាទីក្រុងរបស់ប្រទេសចិនអីចឹងដែរ ពីព្រោះទំនាក់ទំនងរវាងកម្ពុជា និងចិន វាបានកើតឡើងតាំងពីយូរមកហើយ មិនមែនទើបតែថ្មីៗនេះទេ » ។
លោកបន្តថា ពេលនេះ លោកមានគម្រោងវិនិយោគក្នុងខេត្តព្រះសីហនុ ក្នុងទឹកប្រាក់រាប់ពាន់លានដុល្លារអាមេរិក ហើយគម្រោងទាំងនោះក៏មានការយល់ព្រមពីរាជរដ្ឋាភិបាលកម្ពុជារួចហើយដែរ ។ ដូចនេះ មិនយូរទេ គម្រោងរបស់លោកនឹងលេចរូបរាងនៅក្នុងទឹកដីមាត់សមុទ្រមួយនេះ ។
យោងតាមរបាយការណ៍របស់រដ្ឋបាលខេត្តមួយនេះបានបញ្ជាក់ដែរថា ក្នុងរយៈពេលប៉ុន្មានឆ្នាំចុងក្រោយនេះ ខេត្តព្រះសីហនុ មានក្រុមហ៊ុនវិនិយោគជាតិ និងអន្តរជាតិធំៗជាច្រើនបាននិងកំពុងវិនិយោគ និងបណ្ដាក់ទុនរកស៊ីលើវិស័យសំណង់ កសិកម្ម រោងចក្រ សិប្បកម្មកែច្នៃ ផលិតផលសម្រេច និងពាក់កណ្ដាលសម្រេច រោងចក្រកាត់ដេរ ឧស្សាហកម្ម ទេសចរណ៍ មជ្ឈមណ្ឌលពាណិជ្ជកម្ម និងតំបន់សេដ្ឋកិច្ចពិសេស ។
របាយការណ៍ដដែលបង្ហាញថា ខេត្តមានតំបន់សេដ្ឋកិច្ចពិសេសធំៗចំនួន៣ រួមមាន តំបន់សេដ្ឋកិច្ចពិសេសក្រុងព្រះសីហនុ, តំបន់សេដ្ឋកិច្ចអ៊ែតវូត ស្រុកស្ទឹងហាវ និងតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ ។
ចំណែកសកម្មភាពទិញ-លក់ដីធ្លី ដើម្បីវិនិយោគលើគម្រោងនានាក្នុងខេត្តកំពតវិញ ក៏មិនស្ងប់ស្ងាត់ដែរ ។ បច្ចុប្បន្ននេះ មានទាំងអ្នកវិនិយោគមកពីក្រៅប្រទេស និងក្នុងប្រទេសកំពុងចាប់អារម្មណ៍អភិវឌ្ឍន៍វិស័យទេសចរណ៍ ដោយសារតែខេត្តនេះមានសក្ដានុពលខ្ពស់លើវិស័យទេសចរណ៍ ហើយវាក៏ជាខេត្តនៅជាប់នឹងខេត្តព្រះសីហនុដែរ ។
លោក សុខ គែន ភ្នាក់ងារអចលនវត្ថុមួយរូបនៅក្នុងខេត្តកំពត បានឲ្យដឹងថា ការទិញ-លក់ដីធ្លីក្នុងខេត្តនេះនៅតែមានសកម្មភាពខ្លាំងដដែល ហើយវិនិយោគិនចិនក៏បានមកខេត្តកំពត ដើម្បីស្វែងរកការវិនិយោគផងដែរ ។
លោកថា ៖« បច្ចុប្បន្ននេះ នៅខេត្តកំពតក៏មានគម្រោងវិនិយោគបុរីដូចនៅភ្នំពេញដែរ ហើយតម្លៃវិញក៏បានឡើងថ្លៃជាបន្តបន្ទាប់ ជាពិសេសតំបន់នៅជាប់មាត់ព្រែក ព្រោះអ្នកលក់មានតិច តែអ្នកស្វែងរកទិញមានច្រើន ។ ដូចនេះហើយកាលណាតម្រូវការច្រើនជាងការផ្គត់ផ្គង់ នឹងធ្វើឲ្យឡើងថ្លៃហើយ » ។
តាមរបាយការណ៍ និងការព្យាកររបស់ធនាគារពិភពលោកប្រចាំកម្ពុជា បានបង្ហាញផងដែរថា វិស័យសំណង់ និងអចលនទ្រព្យបានចូលរួមចំណែកកាន់តែធំនៅក្នុងកំណើនសេដ្ឋកិច្ចជាតិ ក្នុងនោះតម្រូវការលំនៅឋានរបស់ប្រជាពលរដ្ឋនៅរាជធានីភ្នំពេញ និងតំបន់ជិតខាង បានធ្វើឲ្យវិស័យសំណង់ស្ទុះងើបឡើងបន្តទៀត ខណៈអគារខ្ពស់ៗបានបញ្ចប់ជាបន្តបន្ទាប់ ៕
ចែករំលែកព័តមាននេះ