ខេត្តកំពត ៖ រដ្ឋមន្ត្រីក្រសួងសង្គមកិច្ច អតីតយុវជន និងយុវនីតិសម្បទា បានអះអាងថា ប្រសិនបើអាណត្តិក្រោយប្រមុខរាជរដ្ឋាភិបាលមិនត្រូវបានផ្លាស់ប្តូរទេ ក្រសួងនឹងរិះរកលទ្ធភាពដើម្បីធ្វើឲ្យប្រាក់សោធននិវត្តន៍របស់មន្ត្រីចូលនិវត្តន៍មុន និងក្រោយ ស្ថិតនៅក្នុងកម្រិតអប្បរិមា…
ខេត្តកំពត ៖ រដ្ឋមន្ត្រីក្រសួងសង្គមកិច្ច អតីតយុវជន និងយុវនីតិសម្បទា បានអះអាងថា ប្រសិនបើអាណត្តិក្រោយប្រមុខរាជរដ្ឋាភិបាលមិនត្រូវបានផ្លាស់ប្តូរទេ ក្រសួងនឹងរិះរកលទ្ធភាពដើម្បីធ្វើឲ្យប្រាក់សោធននិវត្តន៍របស់មន្ត្រីចូលនិវត្តន៍មុន និងក្រោយ ស្ថិតនៅក្នុងកម្រិតអប្បរិមា ។ នេះជាប្រសាសន៍របស់ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ថ្លែងនៅក្នុងពីធីបញ្ជុះបឋមសិលាសាងសង់មជ្ឍមណ្ឌលបណ្តុះបណ្តាលវិជ្ជាជីវ (SOS) ខេត្តកំពត ស្ថិតក្នុងឃុំបឹងទូក ស្រុកទឹកឈូ នៅរសៀលថ្ងៃទី២៧ ខែមេសា ឆ្នាំ២០១៨នេះ ។
លោក វង សូត រដ្ឋមន្ត្រីក្រសួងសង្គមកិច្ច អតីតយុវជន និងយុវនីតិសម្បទា បានមានប្រសាសន៍បន្តថា ក្នុងនាមរដ្ឋមន្ត្រីក្រសួង និងក្នុងនាមសេនាធិការឲ្យរាជរដ្ឋាភិបាល រូបលោកពិតជាគិតគូរខ្លាំងណាស់ អំពីសុខទុក្ខរបស់មន្ត្រីចូលនិវត្តន៍ទាំងមុន និងក្រោយ ហើយធ្វើយ៉ាងណាចង់ឲ្យទទួលបានប្រាក់សោធននិវត្តន៍ច្រើនដូចគ្នា កាន់តែច្រើនកាន់តែល្អ ប៉ុន្តែខាងក្រសួងសេដ្ឋកិច្ច និងហិរញ្ញវត្ថុថានៅមិនទាន់មានលទ្ធភាពគ្រប់គ្រាន់នៅឡើយទេ ។
លោកបានបន្តថា ជាការពិតប្រសិនបើមិនមានមន្ត្រីចាស់ៗទាំងអស់នោះទេ ប្រទេសជាតិក៏មិនអាចរីកចម្រើនដូចសព្វថ្ងៃនេះដែរ ។ មន្ត្រីចូលនិវត្តន៍បានចូលរួមចំណែកយ៉ាងសំខាន់ក្នុងការធ្វើឲ្យប្រទេសមានសុខសន្តិភាព ដែលជាមូលដ្ឋានគ្រឹះក្នុងការអភិវឌ្ឍន៍លើគ្រប់ផ្នែកគ្រប់វិស័យ មិនថាសិទ្ធិសរីភាព ការអភិវឌ្ឍន៍ សេដ្ឋកិច្ច ស្ថេរភាពនយោបាយ សុខសុវត្ថិភាព សណ្ដាប់ធ្នាប់សាធារណៈប៉ុណ្ណោះទេ សូម្បីតែភូមិកុមារ (SOS) ដ៏ល្អនេះក៏គ្មានដែរ ។
លោករដ្ឋមន្ត្រីបានបញ្ជាក់ថា បើមិនមានមន្ត្រីចូលនិវត្តន៍ទាំងអស់នោះទេ ម្ល៉េះកម្ពុជាគ្មានសន្តិភាព គ្មានការអភិវឌ្ឍន៍ គ្មានសាលារៀន គ្មានធនធានមនុស្ស គ្មានសិទ្ធិរស់រាន និងទទួលបានការការពារពីច្បាប់ ហើយក៏គ្មានសាលារៀនល្អដូច នៅក្នុងភូមិនៃមជ្ឍមណ្ឌលបណ្តុះបណ្តាលវិជ្ជាជីវ (SOS) ខេត្តកំពតនេះដែរ ។ លោកបានបញ្ជាក់ថា ប្រសិនបើប្រមុខរាជរដ្ឋាភិបាល នៃព្រះរាជាណាចក្រកម្ពុជា មិនត្រូវបានផ្លាស់ប្តូរទេនោះ ក្រសួងសង្គមកិច្ច នឹងរិះរកគ្រប់លទ្ធភាព និងមធ្យោបាយធ្វើយ៉ាងណាឲ្យគម្លាតនៃប្រាក់សោធននិវត្តន៍របស់មន្ត្រីចូលនិវត្តន៍មុន និងក្រោយ ស្ថិតក្នុងកម្រិតអប្បរិមា ។ សូមបញ្ជាក់ថា អង្គការ អេស អូ អេស (SOS) បានបង្កើតភូមិកុមារនៅទូទាំងប្រទេសបាន៦កន្លែង ក្នុង៦ខេត្ត រួមទាំងខេត្តកំពតផង ហើយអង្គការថា និងសាងសងភូមិកុមារ (SOS) ទី៧នៅក្នុងខេត្តព្រៃវែងបន្តទៀតនៅចុងខែនេះ ៕
ចែករំលែកព័តមាននេះ