ខេត្តកំពង់ធំ ៖ លោក ពេញ កែម អភិបាលរងក្រុងស្ទឹងសែន បានសំណូមពរដល់បងប្អូនប្រជពលរដ្ឋថា បងប្អូនគឺជាម្ចាស់ ហេតុដូច្នេះហើយបងប្អូនមានសិទ្ធគ្រប់យ៉ាងនៅក្នុងការដាក់ពាក្យចូលរួមដេញថ្លៃការកសាង និងអភិវឌ្ឍន៍អ្វីមួយនៅក្នុងភូមិសង្កាត់របស់យើង ។
លោកអភិបាលរងក្រុងស្ទឹងសែនបានសំណូមពរដល់បងប្អូនប្រជពលរដ្ឋយ៉ាងដូច្នេះនៅក្នុងយុទ្ធនាការផ្សព្វផ្សាយគម្រោងអភិបាលកិច្ចល្អនៅថ្នាក់ក្រោមជាតិ ដែលបានរៀបឡើងនៅក្នុងបរិវេណវត្តបុទុមរតន៍ ហៅវត្តក្រចាប់ ស្ថិតក្នងភូមិក្រចាប់ សង្កាត់អាចារ្យលាក់ ក្រុងស្ទឹងសែន កាលពីព្រឹកថ្ងៃទី២៧ ខែមេសា ឆ្នាំ២០១៨ ដោយមានការសហការណ៍គ្នាជាមួយទីចាត់ការផែនការ និងវិនិយោគខេត្តកំពង់ធំ ជាមួយនិងអង្គការសីលការ ដោយមានការចូលរួមពីបងប្អូនប្រជាពលរដ្ឋចំនួនជិត១០០នាក់ ការរៀបចំកម្មវិធីនេះឡើង ក្នុងគោលបំណងសំខាន់ៗចំនួន៣រួមមាន ទី១.ដើម្បីផ្សព្វផ្សាយគម្រោងពង្រឹងអភិបាលកិច្ចលទ្ធកម្មថ្នាក់ក្រោមជាតិ ស្តីអំពីសិទ្ធ និងតួនាទីរបស់ពលរដ្ឋក្នុងការចូលរួមត្រួតពិនិត្យប្រព័ន្ធលទ្ធកម្មរបស់រដ្ឋឲ្យកាន់តែស៊ីជម្រៅដល់សាធារណៈជនទូរទៅ ទី២.ធ្វើឲ្យអភិបាលកិច្ចលទ្ធកម្មសាធារណៈថ្នាក់ក្រោមជាតិមានភាពប្រសើរឡើងតាមរយៈការពង្រឹងចំណេះដឹងនេះដល់ប្រជាពលរដ្ឋឲ្យកាន់តែទូរលំទូរលាយ និងទី៣.ដើម្បីបង្កើនការយកចិត្តទុកដាក់ពីពលរដ្ឋឲ្យចូលរួមយ៉ាងសកម្មលើកិច្ចលទ្ធកម្មសាធារណៈនៅថ្នាក់ក្រោមជាតិក្នុងការចូលរួមចំណែកពង្រឹងអភិបាលកិច្ច និងជឿជាក់លើការដឹកនាំរបស់អាជ្ញាធរមូលដ្ឋាន ។
ក្នុងនោះដែរ លោកអភិបាលរងក្រុងក៏សូមឲ្យបងប្អូនប្រជាពលរដ្ឋយើងចូលរួមជាបដិភាគជាមួយនិងអាជ្ញាធរភូមិសង្កាត់របស់យើង និងស្ម័គ្រចិត្តបរិច្ចាគនូវផលប៉ះពាល់ផ្សេងៗមានដូចជារបងផ្ទះ និងដើមឈើផ្សេងៗគ្រប់ប្រភេទ នៅពេលដែលអាជ្ញាធរធ្វើការអភិវឌ្ឍន៍ផ្លូវនិមួយៗក្នុងមូលដ្ឋាន ដើម្បីឲ្យផ្លូវនោះធំទូរលាយ និងងាយស្រួលដល់រថយន្តពន្លត់អគ្គិសភ័យចេញចូលនៅពេលណាមួយដែលមានអគ្គិសភ័យកើតឡើងម្តងៗ ។
កម្មវិធីនេះក៏មានសម្តែងសិល្បៈឈុតខ្លីស្តីអំពីការចូលរួមដេញថ្លៃក្នុងគម្រោងសាងសង់នៅក្នុងមូលដ្ឋាន់របស់ខ្លួនរកបេក្ខភាពណាដែលហ៊ានទទួលយកនូវគម្រោងនោះទៅអភិវឌ្ឍនៅក្នុងតម្លៃទាបជាងគេ និងមានជាសំណួរចម្លើយដើម្បីទទួលរង្វាន់អនុស្សាវរីយ៍ ហើយក៏មានដង្ហែជាក្បួនតាមដងផ្លូវផងដែរ ដើម្បីឲ្យប្រជាពលរដ្ឋលោកយល់កាន់តែច្បាស់ ៕
ចែករំលែកព័តមាននេះ