ADផ្ទាំងផ្សព្វផ្សាយពាណិជ្ជកម្ម

Picture

ខ្យល់​កន្ត្រាក់​និង​រន្ទះត្រឹម​​២​ថ្ងៃ ​បំ.ផ្លា.ញ​ផ្ទះ​ជិត​៦០​ខ្នង ​របួស​មនុស្ស៣នាក់ និង​ងា.ប់​គោ១

1 ខែ មុន
  • បាត់ដំបង

​ខេត្តបាត់ដំបង​ ៖ យ៉ាង​ហោច​ណាស់ ​មាន​មនុស្ស​០៣​នាក់​បាន​រង​របួស និងសត្វ​គោ​០១​ក្បាល​ បាន​ងាប់ ដោយសារ​រន្ទះបាញ់ ខណៈ​លំនៅ​ឋាន​របស់​ប្រជាពលរដ្ឋ​ជិត​៦០​ខ្នង បាន​រង​ការ​ខូចខាត ដោយ​សារ​ខ្យល់​កន្ត្រាក់…

​ខេត្តបាត់ដំបង​ ៖ យ៉ាង​ហោច​ណាស់ ​មាន​មនុស្ស​០៣​នាក់​បាន​រង​របួស និងសត្វ​គោ​០១​ក្បាល​ បាន​ងាប់ ដោយសារ​រន្ទះបាញ់ ខណៈ​លំនៅ​ឋាន​របស់​ប្រជាពលរដ្ឋ​ជិត​៦០​ខ្នង បាន​រង​ការ​ខូចខាត ដោយ​សារ​ខ្យល់​កន្ត្រាក់ នា​ដើមរដូវ​វស្សា​ឆ្នាំ​នេះ ដែល​កើតឡើង​ត្រិ​មរ​យៈ​ពេល​០២​ថ្ងៃ​ជាប់​ៗ​គ្នា ដែល​ប៉ះទង្គិច​ទៅ​លើ​ស្រុក​ចំនួន​០៤ ក្នុង​ខេត្តបាត់ដំបង ។

យោង​តាម​សេចក្ដី​រាយ​ការ​ណ៍​នានាបាន​ឲ្យ​ដឹង​ថា ភ្លៀង​ដែល​លាយឡំខ្យល់​កន្ត្រាក់ និងផ្គរ​រន្ទះ​យ៉ាង​ខ្លាំងក្លា​ផង បាន​កើត​ឡើងជា​បន្តបន្ទាប់ប៉ះ​ទៅ​លើ​បណ្ដា​ស្រុក​មួយ​ចំនួន​នៅ​ក្នុង​ខេត្តបាត់​ដំបង នា​ដើមរដូវ​វស្សា​នា​ឆ្នាំ​នេះ រហូត​បង្ក​ឲ្យ​មាន​មនុស្ស​របួស សត្វ​ពា​ហនៈ​បាន​ងាប់ និងខូចខាត​ផ្ទះ​ប្រជាពលរដ្ឋ​ជា​ច្រើន​ខ្នង ហើយ​ថែម​ទាំង​ប៉ះពាល់​ដល់​ដំណាំ​កសិកម្ម​មួយ​ចំនួន​ផង​ដែរ​ ។

​របាយ​ការ​ណ៍​​បឋម​របស់​អាជ្ញាធរ​មូលដ្ឋាន​បាន​ឲ្យ​ដឹង​ថា នៅ​រសៀល​ថ្ងៃ​ទី​០៥ ឧសភា ភ្លៀង ខ្យល់​កន្ត្រាក់ និង​ផ្គរ​រន្ទះ បាន​វាយប្រហារ​ទៅ​លើ​ស្រុក​ចំនួន​០៣ ក្នុង​ខេត្តបាត់ដំបង​។ ១-​ស្រុក​សំពៅ​លូន ខ្យល់​កន្ត្រាក់ បាន​វាយប្រហារ​ទៅ​លើ​ភូមិ​មួយ​ចំនួន ក្នុង​ឃុំ​តា​ស្ដា បណ្ដាល​ឲ្យ​ខូច​ខា​ច​លំនៅ​ឋាន​ចំនួន​០៤​ខ្នង ក្នុង​នោះ​បាន​ប៉ះពាល់​សាលារៀន​មួយ​ខ្នង​ផង និងខូចខាត​ដំណាំ​កសិកម្ម​មួយ​ចំនួន​ទៀត​។

២-​ស្រុក​កំ​រៀង ខ្យល់​កន្ត្រាក់ បាន​វាយប្រហារ​ទៅ​លើ​ភូមិ​មួយ​ចំនួន បណ្ដាល​ឲ្យ​ខូចខាត​លំនៅ​ឋាន​ប្រជាពលរដ្ឋ​អស់​ប្រមាណ​៤១​ខ្នង ក្នុង​នោះ​ខូចខាត​ទាំង​ស្រុង​អស់​១១​ខ្នង តែ​ពុំ​មាន​គ្រោះថ្នាក់​ដល់​មនុស្ស ឬ សត្វ​ទេ​។

៣-​ស្រុក​គាស់​ក្រឡ បើ​តាម​សេចក្ដី​រាយ​ការ​ណ៏​បឋម​ដដែល ខ្យល់​កន្ត្រាក់ បាន​វាយប្រហារ​ធ្វើ​ឲ្យ​ខូចខាត​លំនៅ​ឋាន​ប្រជាពលរដ្ឋ​អស់​ចំនួន​១១​ខ្នង ក្នុង​នោះ ​ខូចខាត​ទាំងស្រុង​ចំនួន​០៣​ខ្នង តែ​ក៏​ពុំ​មាន​គ្រោះថ្នាក់​ដល់​មនុស្ស ឬ សត្វ​ដែរ​។

ដោយឡែក សម្រាប់​នៅ​រសៀល​ថ្ងៃ​ទី ០៦ ឧសភា វិញ​បើ​តាម​សេចក្ដី​រាយ​ការ​ណ៍​បឋម​ពី​អាជ្ញាធរ​មូលដ្ឋាន​ដែរ បាន​ឲ្យ​ដឹង​ថា ភ្លៀង​លាយឡំ​ជាមួយនឹង​ខ្យល់​កន្ត្រាក់ បន្ទរ​ទៅ​ដោយ​ផ្គរ​រន្ទះ​យ៉ាង​ខ្លាំងក្លា​ផង បាន​ប៉ះទង្គិច​ទៅ​លើ​ស្រុក​ចំនួន​០២ គឺ ស្រុក​រតន​មណ្ឌល និង ស្រុក​សំពៅ​លូន ដដែល​ទៀត​។ បើ​តាម​សេចក្ដី​រាយ​ការ​ណ៏ បាតុភូត​ធម្មជាតិ ដែល​បាន​កើតឡើង​នៅ​ថ្ងៃ​ទី​២ នេះ​នៅ​ស្រុក​សំពៅ​លូន ហាក់​ធ្ងន់ធ្ងរ​ជាង​លើក​ទី​១ ព្រោះ​មាន​មនុស្ស​រហូត​ដល់​ទៅ​០៣​នាក់​រង​របួស ខណៈ​នៅ​ស្រុក​រតន​មណ្ឌល​ មាន​ងាប់​សត្វ​គោ​០១​ក្បាល ដោយសារ​រន្ទះបាញ់​។

ប្រភព​ពី​មន្ត្រី​ស្រុក​សំពៅ​លូនបាន​ឲ្យ​ដឹង​ថា ភ្លៀង​ហាក់​មិនសូវ​ខ្លាំង​ប៉ុន្មាន​ទេ តែ​បាន​បង្ក​ឲ្យ​មាន​ខ្យល់​បោកបក់ និង ផ្គរ​រន្ទះបាញ់​គួ​ឲ្យ​ខ្លាច ដែល​ធ្វើ​ឲ្យ​កម្មករ​បេះ​ផ្លែស្វាយ​ចំនួន​០៣​នាក់​រង​របួស​។ ជន​រង​គ្រោះ​ទាំង​០៣​នាក់​រួម​មាន ១-​ឈ្មោះ ហាច ធី ស្រី​អាយុ​១៦​ឆ្នាំ ២-​កុមារី ឈ្មោះ ព្រុំ គី​ម​ម៉ើ​យ អាយុ​០៨​ឆ្នាំ និង ៣-​ឈ្មោះ ឡុ​ច ស្រី​ពៅ ស្រី​អាយុ​៤៨​ឆ្នាំ ជន​រង​គ្រោះ​រស់នៅ​ឃុំ​តា​ស្តា ស្រុក​សំពៅ​លូន​។ មន្ត្រី​ដដែល​បាន​បញ្ជាក់​ថា ជន​រង​គ្រោះ​ទាំង​០៣​នាក់ ត្រូវ​រន្ទះបាញ់​ឲ្យ​រង​របួស​ពេល​ពួក​គាត់​កំពុង​បេះ​ផ្លែស្វាយ​នៅ​ក្នុង​ចំការ​មួយ​កន្លែង នៅ​ក្នុង​មូលដ្ឋាន​របស់​គាត់​។

បើ​តាម​ប្រភព​ដដែល​បាន​បញ្ជាក់​ថា ក្រៅពី​រន្ទះបាញ់រ​បូស​មនុស្ស​០៣​នាក់ ពុំ​មាន​ខូចខាត​លំនៅ​ឋាន ឬ ប៉ះពាល់​ផលដំណាំ​ទេ​។ ដោយឡែក នៅ​ស្រុក​រតន​មណ្ឌល ឯណោះ​វិញ បើ​តាម​សេចក្ដី​រាយ​ការ​ណ៏​បាន​ឲ្យ​ដឹង​ថា ភ្លៀង​ដែល​នាំ​មក​ជាមួយ​នូវ​ខ្យល់​កន្ត្រាក់ និង ផ្គរ​រន្ទះ​ផង បាន​ប៉ះទង្គិច​ទៅ​លើ​ភូមិ​មួយ​ចំនួន នៅ​ក្នុង​ឃុំ​ផ្លូវ​មាស​។ ខ្យល់​កន្ត្រាក់​បាន​វាយ​បំផ្លាញ​លំនៅ​ឋាន​របស់​ពលរដ្ឋ​អស់​ត្រិ​ម​ចំនួន​០៣​ខ្នង តែ​រន្ទះ​បាន​បាញ់​សម្លាប់សត្វ​គោ​របស់​អ្នក​ភូមិ​០១​ក្បាល ប៉ុន្តែ​ពុំ​មាន​បង្ក​គ្រោះថ្នាក់​ដល់​មនុស្ស​ឬ​ផលដំណាំ​ទេ​។ នេះ​បើ​តាម​របាយ​ការ​ណ៏​បឋម​របស់​អាជ្ញាធរ​មូលដ្ឋាន​។

យោង​លើ​របាយ​ការ​ណ៍​ជា​បន្តបន្ទាប់ ដែល​អាជ្ញាធរ​បាន​រាយ​ការ​ណ៍ អំពី​គ្រោះ​ធម្មជាតិ​ដើមរដូវ​វស្សា​ក្នុងឆ្នាំនេះ ដែល​បាន​កើតឡើង​រយៈពេល​០២​ថ្ងៃ​ជាប់​ៗ​គ្នា (០៥-០៦,០៥,២៤) បាន​ប៉ះទង្គិច​ទៅ​លើ​ស្រុក​ចំនួន​០៤​ខាងលើ​នេះ បាន​ធ្វើ​ឲ្យ​ខូចខាត​ផ្ទះសម្បែង​របស់​ប្រជាពលរដ្ឋ​សរុប​ជិត​៦០​ខ្នង ក្នុង​នោះ​ខូចខាត​ទាំងស្រុង​ចំនួន​១៤​ខ្នង របួស​មនុស្ស​ចំនួន​០៣​នាក់ ងាប់​សត្វ​គោ​០១​ក្បាល និង ខូចខាត​ផលដំណាំ​មួយ​ចំនួន​។

ប៉ុន្តែ​យ៉ាងណា ពេល​នេះ​មន្ត្រី​ជំនាញ និងអា​ជ្ញាធរ​មូលដ្ឋាន រួម​ទាំង​មន្ត្រី​សាខា​កាកបាទក្រហម​ខេត្ត​ផង បាន​និង​កំពុង​ចុះ​ពិនិត្យ​ជាក់ស្ដែង ដើម្បី​ជួយ​សង្គ្រោះ​ជាបឋម​ហើយ​៕ ​

អត្ថបទសរសេរ ដោយ