ខេត្តបាត់ដំបង ៖ លោកស្នងការខេត្តបានបញ្ជាភ្លាមៗឱ្យកម្លាំងបង្ការបង្ក្រាបតាមក្របួចក្រុមក្មេងអន្ធពាលមានប្រុស មានស្រីបានចំនួន១៨នាក់ ក្រោយពីមានសេចក្តីរាយការណ៍ថា ក្រុមដែលមានបោះពុម្ភអក្សរលើអាវយឺតថា “Dont Scare” អមដោយសញ្ញាក្បាលខ្មោចនេះ ប្រមូលផ្តុំគ្នាប៉ុនប៉ងបង្កព្យុះភ្លៀងកាលពីវេលាម៉ោង៥ល្ងាចថ្ងៃទី១៩ មករា ២០១៣ នៅក្បែរមាត់ស្ទឹងសង្កែក្នុងសង្កាត់រតនៈ ក្រុងបាត់ដំបង ។
លោកម៉េង លៀង អនុប្រធានការិយាល័យព្រហ្មទណ្ឌកម្រិតស្រាល និងជាប្រធានក្រុមបង្ការបង្ក្រាបរបស់ស្នងការដ្ឋានខេត្តបានឱ្យដឹងថា លោកបានប្រទះឃើញក្រុមពាក់អាវយឺតពណ៌ខ្មៅ ដែលមានបោះពុម្ភអក្សរជាភាសាអង់គ្លេសថា “Dont Scare” អមដោយសញ្ញាក្បាលខ្មោចនេះជិះម៉ូតូដង្ហែគ្នាតាមដងផ្លូវយ៉ាងអនាធិបតេយ្យក្នុងក្រុងកាលពីព្រឹកថ្ងៃទី១៩ មករា ក្នុងសកម្មក្រុមក្មេងទំនើង ទើបលោករាយការណ៍ជូនលោកស្នងការ ដើម្បីនាំកម្លាំងចេញបង្ក្រាបតែម្តង ។ លោកបញ្ជាក់ថា ក្រុមនេះនាំគ្នាបោះពុម្ភអក្សរ “Dont Scare” លើអាវយឺតផ្នែកខាងមុខដែលអមដោយសញ្ញាក្បាលខ្មោច និងសរសេរអក្សរកាត់ (DTS) នៅផ្នែកខាងខ្នង ។ លោកម៉េង លៀង បន្ថែមថា ពាក្យទាំងនេះបើបកប្រែជាភាសាខ្មែរថា «អត់ខ្លាច» ។ លោកថា នៅល្ងាចថ្ងៃដដែលក្រោយពីមានបទបញ្ជាពីលោកស្នងការខេត្ត កម្លាំងបង្ក្រាបក៏បានចេញស្ទាក់ចាប់ពួកគេបានជាបន្តបន្ទាប់ចំនួន១៨នាក់ក្នុងនោះមានស្រី៨នាក់ ៕
ចែករំលែកព័តមាននេះ