រាជធានីភ្នំពេញ ៖ ក្នុងដំណើរទស្សនកិច្ចរបស់រដ្ឋមន្ត្រីការបរទេសជប៉ុននៅកម្ពុជាកាលពីថ្ងៃទី៨ មេសា ជប៉ុនបានបង្ហាញពីបំណងនឹងជួយជំរុញការអភិវឌ្ឍសេដ្ឋកិច្ចរបស់កម្ពុជា ឲ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ទៅតាមការប្ដេជ្ញាចិត្តរបស់រាជរដ្ឋាភិបាលកម្ពុជា ។ នេះបើយោងតាមអ្នកនាំពាក្យក្រសួងការបរទេសជប៉ុន បានថ្លែងនៅក្នុងសន្និសីទសារព័ត៌មាន…
រាជធានីភ្នំពេញ ៖ ក្នុងដំណើរទស្សនកិច្ចរបស់រដ្ឋមន្ត្រីការបរទេសជប៉ុននៅកម្ពុជាកាលពីថ្ងៃទី៨ មេសា ជប៉ុនបានបង្ហាញពីបំណងនឹងជួយជំរុញការអភិវឌ្ឍសេដ្ឋកិច្ចរបស់កម្ពុជា ឲ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ទៅតាមការប្ដេជ្ញាចិត្តរបស់រាជរដ្ឋាភិបាលកម្ពុជា ។ នេះបើយោងតាមអ្នកនាំពាក្យក្រសួងការបរទេសជប៉ុន បានថ្លែងនៅក្នុងសន្និសីទសារព័ត៌មាន កាលពីល្ងាចថ្ងៃទី៨ មេសា នៅសណ្ឋាគារឡឺ រ៉ូយ៉ាល់ ។
លោក ណារីយ៉ូ ម៉ារូយ៉ាម៉ា (Nario MARUYAMA) អ្នកនាំពាក្យរូបនេះបានបន្ដថា ៖« ក្នុងដំណើរទស្សនកិច្ចនេះ យើងបានពិភាក្សាបញ្ហាយ៉ាងច្រើន ។ មួយក្នុងចំណោមបញ្ហាទាំងនោះ គឺយុទ្ធសាស្ត្រ «Free and Open Indo-Pacific Strategy» ដែលជាយុទ្ធសាស្ត្រគោលនយោបាយការបរទេសថ្មីរបស់ជប៉ុន សម្រាប់ស្ថិរភាព និងវិបុលភាពនៃសហគមន៍អន្តរជាតិ និងជាថាមវន្ដដែលត្រូវបានបង្កើតឡើងដោយរួមបញ្ចូលទ្វីបពីរ (Two Continents) គឺអាស៊ី និងអាហ្វ្រិក និងសមុទ្រពីរ (Two Oceans) គឺមហាសមុទ្រប៉ាស៊ីហ្វិក និងមហាសមុទ្រឥណ្ឌា ស្របពេលដែលទ្វីបអាស៊ីកំពុងមានកំណើនយ៉ាងឆាប់រហ័ស និងអាហ្វ្រិកកំពុងតែអភិវឌ្ឍន៍រីកចម្រើនប្រកបដោយសក្ដានុពល ហើយយើងនឹងធ្វើឲ្យប្រសើរឡើងតាមរយៈការតភ្ជាប់ (connectivity) រវាងអាស៊ី និងអាហ្វ្រិក តាមរយៈយុទ្ធសាស្ត្រនេះ នឹងជួយលើកកម្ពស់ស្ថិរភាព និងវិបុលភាពនៅក្នុងតំបន់ទាំងមូល។ ក្នុងនោះកម្ពុជាបានគាំទ្រពីដំណើរការយុទ្ធសាស្ត្រនេះផងដែរ ។
ទន្ទឹមនឹងនេះ ជប៉ុនបានគាំទ្រ និងធ្វើយ៉ាងណា ជួយដល់កម្ពុជាក្នុងការក្លាយប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ដោយយើងផ្ដោតលើសសរស្ដម៣គឺ ទី១-ការធ្វើឲ្យប្រសើរឡើងនូវតំណភ្ជាប់ប្រព័ន្ធឡូជីស្ទីក ដោយមានការអភិវឌ្ឍកំពង់ផែ និងតំបន់សេដ្ឋកិច្ចពិសេស ជាដើម ។ ទី២-ការអភិវឌ្ឍធនធានមនុស្ស ដោយយើងប្ដេជ្ញានឹងបញ្ជូនគ្រូជំនាញមកបណ្ដុះបណ្ដាល និងទី៣-ការធ្វើឲ្យប្រសើរឡើងនូវរាល់ហេដ្ឋារចនាសម្ព័ន្ធ » ។
ក្នុងដំណើរទស្សនកិច្ចរបស់លោក តារ៉ូ កូណូ ជាលើកទី១ក្នុងតំណែងជារដ្ឋមន្ត្រីការបរទេសជប៉ុននាពេលនេះ លោកបានវាយតម្លៃខ្ពស់ពីការរីកចម្រើនរបស់ប្រទេសកម្ពុជា ហើយលោកបានគូសបញ្ជាក់ពីជំហររបស់ជប៉ុននៅតែបន្តធ្វើទំនាក់ទំនង និងពង្រីកកិច្ចសហប្រតិបត្តិការជាមួយកម្ពុជាបន្តទៀត ។
ថ្លែងក្នុងជំនួបជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃដដែល នោះ លោក តារ៉ូ កូណូ បានបញ្ជាក់ពីជំហរថា ៖« ឆ្នាំ២០១៨នេះ ជប៉ុននឹងប្រែក្លាយទំនាក់ទំនងកម្ពុជា-ជប៉ុនឲ្យទៅជាឆ្នាំនៃការពូនជ្រំ និងសម្រេចក្នុងការពង្រឹងបន្ថែមទៀតនៃទំនាក់ទំនងប្រទេសទាំងពីរ » ។ លោកថា ៖«កម្ពុជាគឺជាប្រទេសមួយសំខាន់ណាស់ក្នុងតំបន់យុទ្ធសាស្ត្រមេគង្គ ។ រាជរដ្ឋាភិបាលជប៉ុននៅតែជួយកម្ពុជា ដើម្បីធ្វើការអភិវឌ្ឍឲ្យក្លាយជាប្រទេសមានចំណូលមធ្យមកម្រិតខ្ពស់នៅក្នុងឆ្នាំ២០៣០ខាងមុខ » ។ នេះបើយោងតាមលោក ជំុ សុន្ទរី អ្នកនាំពាក្យក្រសួងការបរទេស និងសហប្រតិបតិ្តការអន្តរជាតិ បានឲ្យដឹងក្រោយជំនួប ។
ក្នុងរយៈពេល៥ឆ្នាំចុងក្រោយនេះ បើតាមធនាគារពិភពលោក នៅក្នុងឆ្នាំ២០១៥ កម្ពុជាសម្រេចបានជាប្រវត្តិសាស្ត្រ គឺការឆ្លងផុតពីឋានៈប្រទេសដែលមានចំណូលទាបទៅជាប្រទេសដែលមានចំណូលមធ្យមកម្រិតទាប។ លើសពីនេះទៅទៀត ក្នុងឆ្នាំ២០១៦ ធនាគារអភិវឌ្ឍន៍អាស៊ី ហៅកាត់ថាADB បានដាក់រហស្សនាមកម្ពុជាថាជា «ខ្លាសេដ្ឋកិច្ចថ្មីនៅអាស៊ី» ផងដែរ ។
កំណើនដ៏គួរឲ្យស្ញប់ស្ញែងនេះ បានបង្កើតការងារជាច្រើនដល់ប្រជាពលរដ្ឋទូទាំងប្រទេស ដែលឆ្លុះបញ្ចាំងតាមរយៈតួលេខរបស់ធនាគារពិភពលោកបានបង្ហាញថា ភាពគ្មានការងារធ្វើនៅកម្ពុជាស្ថិតក្នុងអត្រា០,៣% និងភាពក្រីក្រតោកយ៉ាកត្រូវបានលុបបំបាត់ចោលទាំងស្រុងនៅក្នុងឆ្នាំ២០១៧ ។ ទន្ទឹមនឹងនេះ ប្រាក់ចំណូលរបស់ពលរដ្ឋកម្ពុជាម្នាក់ក្នុង១ឆ្នាំ បានកើនឡើងពី១.០៤២ដុល្លារក្នុងឆ្នាំ២០១៣ ដល់ប្រមាណជា១.៤២៧ដុល្លារក្នុងឆ្នាំ២០១៧ ហើយត្រូវបានព្យាករណ៍ថា នឹងកើនឡើង១.៥៦៣ដុល្លារក្នុងឆ្នាំ២០១៨ រហូតដល់២.០៣៥ដុល្លារនៅឆ្នាំ២០២១ ។
យោងតាមធនាគារពិភពលោក ប្រទេសដែលមានចំណូលមធ្យមកម្រិតទាប សំដៅដល់ប្រាក់ចំណូលរបស់ប្រជាជនម្នាក់ក្នុង១ឆ្នាំចន្លោះពី១.០០៦ដុល្លារដល់៣.៩៥៥ដុល្លារ, ប្រទេសមានចំណូលមធ្យមកម្រិតខ្ពស់ ចន្លោះពី៣.៩៥៦ដល់១២.២៣៥ដុល្លារ និងប្រទេសមានប្រាក់ចំណូលខ្ពស់ ឬហៅថាប្រទេសអភិវឌ្ឍន៍ មានប្រាក់ចំណូលចាប់ពី១២.២៣៦ដុល្លារអាមេរិកឡើងទៅ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ផ្អែកតាមសូចនាករសេដ្ឋកិច្ចកម្ពុជា អាចឲ្យយើង
ព្យាករថា រាជរដ្ឋាភិបាលកម្ពុជានឹងសម្រេចបានក្នុងការនាំកម្ពុជា ទៅកាន់ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ។ លោកបន្តថា ការព្យាករនេះ ផ្អែកលើមូលដ្ឋានវិទ្យាសាស្ត្រច្បាស់លាស់ មិនមែនចេះតែលើកឡើងទេ ហើយលោកជឿជាក់លើសមត្ថភាពធនធានមនុស្សរបស់កម្ពុជា ដែលបាននិងកំពុងធ្វើការងារនេះ ។
លោកបន្តថា ៖« ផ្អែកលើមូលដ្ឋាននៃសេដ្ឋកិច្ច និងកំណើនសេដ្ឋកិច្ចដែលកម្ពុជាសម្រេចបាន កម្ពុជាពិតណាស់នឹងសម្រេចបាននូវគោលដៅរបស់ខ្លួននៅឆ្នាំ២០៣០ ក្នុងនាមជាប្រទេសមានប្រាក់ចំណូលមធ្យមកម្រិតខ្ពស់ » ៕
ចែករំលែកព័តមាននេះ