រាជធានីភ្នំពេញ ៖ ការប្រកួតប្រដាល់អន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃទី៨ មេសា កីឡាករកម្ពុជា យុគ យក្សគីល ដែលគេស្គាល់ថា ជាជើងខ្លាំងមក
ពីខេត្តភាគខាងលិច បានបញ្ចេញថ្វីដៃគួរឱ្យកត់សម្គាល់ ប៉ុន្តែមិនអាចយកឈ្នះកីឡាករថៃឈ្មោះ Ou Ronou បានទេ ដោយសារកីឡាករថៃក៏ជាជើងខ្លាំងមិនធម្មតាដូចគ្នានៅក្នុងប្រទេសថៃ ។
យ៉ាងណាមិញ យុគ យក្សគីល បានអះអាងថា មិនខ្លាចក្នុងការប៉ះគ្នាជាមួយជើងខ្លាំងរូបនេះសម្រាប់លើកក្រោយនោះទេ បើទោះជាលទ្ធផលស្មើគ្នាលើកនេះ ត្រូវគេមើលឃើញថា ដោយសារតែគណៈកម្មការផ្ដល់ពិន្ទុស្មើដើម្បីលើកមុខឱ្យបន្តិចប៉ុណ្ណោះ។
យុគ យក្សគីល បានអះអាងនៅខាងក្រោយសង្វៀនថា កីឡាករ Ou Ranou ពិតជាមានជំហររឹងមាំ និងខ្លាំងមិនធម្មតាមែន ។ ជាក់ស្ដែង លោកប្រឹងវាយបំបុកខ្លាំងណាស់ដែរនៅតែបុកមិនចូល ទើបក្នុងទឹកខ្លះធ្វើឱ្យលោកទ័លទី ហើយប្រើយុទ្ធសាស្ត្រវាយឆ្មក់ទៅវិញ ដោយសារតែជើង និងដៃ របស់កីឡាករថៃ គឺល្អពិបាកបំបែក ។ ប៉ុន្តែលោកថា អត់ខ្លាចសម្រាប់ការប៉ះគ្នាម្ដងទៀតនោះទេ ថ្វីដ្បិតតែលោកមិនទាន់ច្បាស់ថា ការជួបគ្នាជាថ្មីតើពិបាកដូចលើកនេះ ឬអាចពិបាកជាង ឬអាចល្អជាងក្ដី ។ លោកបានថ្លែងនៅពេលជជែកជាមួយអ្នកឱ្យទឹក និងអ្នកគាំទ្រឈរមើលថា បំណាច់បានស្មើម្ដងហើយ បើប៉ះគ្នាម្ដងទៀតក៏នឹងល្អមើលដែរ ដើម្បីដឹងថាទៅរួចឬទៅមិនរួច ។
មកទល់ពេលនេះ គេបានដឹងថា កីឡាករ យុគ យក្សគីល មានការត្រៀមខ្លួនច្រើនមុន
ពេលឡើងសង្វៀនម្ដងៗ ទើបតាំងពីបានល្បីឈ្មោះលោកត្រូវគេឃើញប៉ះគ្នាជាមួយកីឡាករថៃច្រើននាក់ ដូចជាកីឡាករ Ou Rano នៅក្នុងពេលនេះជាដើម ។ យុគ យក្សគីល ដែលបាត់មុខយូរនៅតែខ្លាំង ពេលខ្លះត្រូវគេឱ្យប៉ះជាមួយកីឡាករដដែលរហូតទាល់តែលោកប្រកែកក៏មាន ដោយសារតែកីឡាករថៃខ្លះមានសមត្ថភាពលើសលប់ខ្លាំងពេក ដែលលោកមិនអាចនឹងស្ដារជ័យជម្នះបានមកវិញ ។
លោក ថៃ អ៊ូ អ្នកដឹកនាំកីឡាករថៃមកប្រកួតនៅសង្វៀនទូរទស្សន៍អាស៊ីអាគ្នេយ៍បានសរសើរពីសមត្ថភាពរបស់ យុគ យក្សគីល ប៉ុន្តែលោកថា បើការប្រកួតមួយនេះធ្វើឡើងនៅក្នុងប្រទេសថៃ វាយដូច យុគ យក្សគីល គឺគេនឹងឱ្យកីឡាករថៃឈ្នះហើយ ។ លោកថា នេះជាការប៉ះគ្នារវាងជើងខ្លាំង២រូបមកពីកម្ពុជា និងថៃ ដោយលោកបានចាត់ទុកការប្រកួតគូនេះល្អមើល ប៉ុន្តែក៏មានចំណុចស្ទក់ៗមួយសាៗផងដែរ ដោយសារតែកីឡាករថៃក៏មិនហ៊ានសម្រុក ហើយ យុគ យក្សគីល ក្រោយពេលសម្រុកមិនចុះក៏បន្ថយកម្លាំងដៃវិញ ។
បើសិនគូនេះ វាយគ្នាពេញទំហឹង លោកថា ប្រហែលជាមានអ្នកគ្រោះថ្នាក់ ហើយក៏នឹងល្អមើលជាងហ្នឹងទៅទៀត ប៉ុន្តែលោកក៏មិនចង់ឱ្យការប្រកួតល្អខ្លាំង ហើយលទ្ធផលចុងក្រោយ កីឡាករកម្ពុជា និងថៃ ប៊ិះស្លាប់ប៊ិះរស់នោះទេ ។ លោកនៅតែអះអាងថា កីឡាកររបស់លោកប្រកួតមិនអស់សមត្ថភាព ដោយសារតែរឿងធ្វើដំណើរផ្លូវឆ្ងាយ និងរបបអាហារមិនសូវត្រូវនៅក្នុងប្រទេសកម្ពុជា បើមិនដូច្នោះទេកីឡាកររបស់លោកប្រកួតល្អជាងហ្នឹងឆ្ងាយណាស់ ។ ចំណែកកីឡាករកម្ពុជា លោកថាក៏ចំណាយពេលធ្វើដំណើរផ្លូវឆ្ងាយមិនខុសគ្នាផងដែរ ដោយគ្រាន់តែជិតជាងកីឡាករថៃមួយកំណាត់ផ្លូវត្រឹមបាត់ដំបងប៉ុណ្ណោះ តែគេល្អជាងត្រង់ការស៊ាំនឹងរបបអាហារនៅភ្នំពេញ ខុសពីកីឡាករថៃ ។
លោកថា កីឡាកររបស់លោកអត់មានបញ្ហាសុខភាពនោះទេ ប៉ុន្តែគេហាក់មិនទាន់ស៊ាំនឹងបរិយាកាសនៅកម្ពុជា ទើបធ្វើឱ្យការប្រកួតរបស់គេថយចុះគុណភាព បើធៀបនឹងពេលគេឡើងរេញ ហើយទើបតែទទួលបានខ្សែក្រវាត់ជើងឯកដល់ទៅ២ក្នុងពេលថ្មីៗ ។
លោកប្រកាសថា នឹងឱ្យកីឡាកររបស់ខ្លួនឡើងប្រកួតជាមួយ យុគ យក្សគីល ជាថ្មីក្នុងពេលដ៏ខ្លី ដោយលោករំពឹងថា បើគ្មានរឿងភ្លាត់ស្នៀត និងគ្មានបញ្ហាសុខភាព គឺនឹងល្អមើលជាងនេះ ហើយកីឡាករកម្ពុជាពិតជាពិបាកតាមស្មើជាថ្មីនោះផង ។ លោកក៏បានបញ្ជាក់ថា កីឡាករកម្ពុជា យុគ យក្សគីល ក៏ជាកីឡាករល្អម្នាក់ដែលពិបាកមើលស្រាលផងដែរ ជាពិសេសបន្ទាប់ពីអាចយកស្មើជាមួយកីឡាកររបស់លោកដែលជាជើងខ្លាំងនៅក្នុងប្រទេសថៃ មុនពេលលោកជ្រើសមកប្រកួត ។ លោកមិនទាន់កំណត់ពេលវេលា ដើម្បីឱ្យការប្រកួតរបស់គូនេះកើតឡើងជាថ្មីនោះទេ ដោយរង់ចាំឱ្យកីឡាករម្ខាងៗមានពេលត្រូវគ្នា និងទទួលយកការប្រកួតដូចគ្នាសិន ដើម្បីកុំឱ្យមានបញ្ហារឿងអ្នកនេះមានបញ្ហាសុខភាពឬអត់ពេលហ្វឹកហាត់នាំឱ្យមានការប្រកាសថាមិនសុខចិត្តទៀត ។
លោកថា កីឡាកររបស់លោកបើកុំមានរឿងធ្វើដំណើរផ្លូវឆ្ងាយ និងមិនសូវបានសម្រាកពេលមកដល់កម្ពុជា ស្ថានភាពប្រកួតពិតជាកក្រើក ហើយស្រួលមិនស្រួលកីឡាករជើងខ្លាំង យុគ យក្សគីល អាចនឹងទប់មិនជាប់ ឬភ្លាត់ស្នៀតក៏ថាបាន ។ លោកថា ការប្រកួតនៅក្នុងថ្ងៃនោះ លោកដឹងតាំងពីបើកឆាកការប្រកួតថា កីឡាករទាំងពីរនឹងមិនស៊ីសងគ្នាទេ ដោយសារតែកីឡាកររបស់លោកដ្បិតថារឹងជំហរជាង ប៉ុន្តែបច្ចេកទេសរបស់គេពេលប៉ះជាមួយ យុគ យក្សគីល គឺនៅមានកម្រិត ហើយលោកដឹងទៀតថា គេពិតជាមិនវាយខ្លាំងក្លាដូចនៅប្រទេសថៃនោះទេ ទើបលទ្ធផលស្មើគឺជារឿងល្អមួយដែលលោកយល់ថាសមស្របសម្រាប់ជើងខ្លាំងទាំង២៕
ចែករំលែកព័តមាននេះ