សំណុំរឿងសម្លា.ប់ស្រីកំណាន់ ត្រូវរង់ចាំ…
- ភ្នំពេញ
រាជធានីភ្នំពេញ ៖ ចៅក្រមសាលាដំបូងរាជធានី កាលពីល្ងាចថ្ងៃទី៣ មេសា បានចោទប្រកាន់អតីតអភិបាលខេត្តតាកែវ លោក ឡាយ វណ្ណៈ និងមនុស្សបីនាក់ផ្សេងទៀតក្នុងចំណោម៦នាក់…
រាជធានីភ្នំពេញ ៖ ចៅក្រមសាលាដំបូងរាជធានី កាលពីល្ងាចថ្ងៃទី៣ មេសា បានចោទប្រកាន់អតីតអភិបាលខេត្តតាកែវ លោក ឡាយ វណ្ណៈ និងមនុស្សបីនាក់ផ្សេងទៀតក្នុងចំណោម៦នាក់ ពីបទឃាតកម្ម និងបទលាក់បាំងតម្រុយព័ត៌មានទា ក់ទងនឹងករណីឃាតកម្មលើអ្នកស្រី ចេវ សុវឌ្ឍនា ។ ចំពោះចំណាត់ការរបស់សមត្ថកិច្ចនិងតុលាការ ដែលមានឆន្ទៈសើរើសំណុំរឿងឃាតកម្មនេះឡើងវិញ ត្រូវបានសាទរដោយសារតែសំណុំរឿងនេះ បានកើតមានតាំងពីថ្ងៃ២៦ មករា មកម្លេ៉ះ ដែលពេលនោះត្រូវបានគេក្រូមេថា ជាការចង.កធ្វើអត្តឃាត ។
អ្នកនាំពាក្យសាលាដំបូងរាជធានីភ្នំពេញ លោក លី សុផាន់ណា នៅថ្ងៃទី៣ មេសា ថា ចៅក្រមសាលាដំបូងបានបើកការស៊ើបសួរលើសំណុំរឿងព្រហ្មទណ្ឌនេះឡើងវិញ ដោយចោទប្រកាន់ទៅលើលោក ឡាយ វណ្ណៈ អតីតអភិបាលខេត្ត និងបងប្រុសរបស់លោក ឈ្មោះ ឡាយ ណារិទ្ធ អតីតស្នងការរងនគរបាលខេត្តតាកែវពីបទឃាតកម្មតាមមាត្រា១៩៩ នៃក្រមព្រហ្មទណ្ឌ ដែលអាចប្រឈមការជាប់ពន្ធនាគារពី១០ទៅ១៥ឆ្នាំ ប្រសិនបើរកឃើញថាបានប្រព្រឹត្តពីបទឃាតកម្មបែបនេះមែន ។ តែលោក ឡាយ វណ្ណៈ បានបដិសេធរាល់ការចោទថា លោកជាអ្នកសម្លាប់ តែមិនបដិសេធរឿងថា លោកមានទំនាក់ទំនងស្នេហាជាមួយអ្នកស្រី ចេវ សុវឌ្ឍនា ទេ ។
មនុស្សពីរនាក់ទៀត ត្រូវបានចោទពីបទលាក់បាំងតម្រុយតាមមាត្រា៥៣២ នៃក្រមព្រហ្មទណ្ឌគឺឈ្មោះ
ម៉េន សាម៉ៃ ជាអ្នកបើកបររថយន្តឱ្យលោក ឡាយ វណ្ណៈ និងឈ្មោះ ជឹម វុធ ជាអ្នកបំរើក្នុងផ្ទះរបស់អ្នកស្រី ចេវ សុវឌ្ឍនា ។ ក្រោយការចោទប្រកាន់លោក ឡាយ វណ្ណៈ ត្រូវឃុំខ្លួនបណ្ដោះអាសន្ននៅពន្ធនាគារ ប៉េហ្សី(PJ) ចំណែកលោក ឡាយ ណារិទ្ធ លោក ម៉េនសាម៉ៃ និងលោក ជឹម វុធ ឃុំខ្លួននៅពន្ធនាគារព្រៃស (ម១) ។ ចំណែកឯមនុស្សពីរនាក់ទៀតឈ្មោះ ចាន់ រី ភេទស្រី និងឈ្មោះ តាក់ រតនា ជាអ្នកបើកឡានឱ្យលោកឡាយ ណារិទ្ធ តុលាការមិនចោទប្រកាន់ទេគឺដោះលែងឱ្យទៅផ្ទះវិញ ។
លោក ឡាយ វណ្ណៈ និងបងប្រុសរបស់លោកគឺលោក ឡាយ ណារិទ្ធ អាចប្រឈមនឹងការជាប់ទោសពី១០ ទៅ១៥ឆ្នាំ បើសិនជាតុលាការរកឃើញថា អ្នកទាំងពីរពិតជាឃាតករសម្លាប់អ្នកស្រី ចេវ សុវឌ្ឍនា មែននោះ ។ រីឯមនុស្សពីរនាក់ទៀតជាអ្នកបើកបរ និងអ្នកបំរើក្នុងផ្ទះដែលតុលាការចោទប្រកាន់ពីបទលាក់តម្រុយនោះអាចនឹងជាប់ទោសពី១ឆ្នាំ ទៅ៣ឆ្នាំ និងពិន័យជាប្រាក់ពី១សែន ទៅ២លានរៀល ។ ចំពោះសាធារណមតិបាននិយាយថា សម្រាប់អ្នកទាំង២ដែលកំណត់ថា មានទោសក្នុងការលាក់បាំងព័ត៌មាននេះ មិនមែនផ្តើមចេញពីការឃុបឃិតនោះទេ តែអាចផ្តើមពីការភ័យខ្លាចធ្វើតាមបញ្ជាប៉ុណ្ណោះ ។ សាធារណជនបាននិយាយទៀតថា ប្រសិនបើអ្នកទាំង២មានទោសនោះ ក៏មិនត្រូវឱ្យក្រុមប៉ូលិសដែលទៅធ្វើកោសល្យវិច័យសាកសព និងមន្ត្រីតុលាការផងនោះអាចនឹងមានទោសដែរ ។
កាលពីថ្ងៃទី៣១ ខែមីនា អតីតអភិបាលខេត្តតាកែវលោក ឡាយ វណ្ណៈ និងជាមន្ត្រីជាន់ខ្ពស់គណបក្សប្រជាជនកម្ពុជា នៅមុនពេលតុលាការចាប់ខ្លួនបានសរសេរនៅលើបណ្ដាញសង្គមហ្វេសប៊ុក (Facebook) របស់លោកថា លោកមានទំនាក់ទំនងស្នេហាជាមួយអ្នកស្រី ចេវ សុវឌ្ឍនា ប៉ុន្តែបានបដិសេធថា លោកមិនមែនជាជនដៃដល់ក្នុងរឿងឃាតកម្មនេះទេ ។ អ្នកស្រី ចេវ សុវឌ្ឍនា អាយុ៣៦ឆ្នាំ មានកូន៣នាក់ ។ ដំបូងឡើយត្រូវបានរកឃើញស្លាប់ដោយចងក ដែលសមត្ថកិច្ចខេត្តតាកែវអះអាងកាលពីពេលនោះថា ជនរងគ្រោះធ្វើអត្តឃាតខ្លួនឯង ប៉ុន្តែក្រោយការស៊ើបអង្កេតរបស់សមត្ថកិច្ចក្រសួងមហាផ្ទៃបង្ហាញថា ស្ត្រីជនរងគ្រោះត្រូវបានធ្វើឃាត ។
មន្ត្រីស៊ើបអង្កេតជាន់ខ្ពស់នៃសមាគមអាដហុកបានសាទរចំពោះចំណាត់ការរបស់តុលាការនិងសមត្ថកិច្ចដែលមានឆន្ទៈសើរើសំណុំរឿងឃាតកម្មទាក់ទងនិងមន្ត្រីជាន់ខ្ពស់នេះ ។ លោកបញ្ជាក់ថា ចំណាត់ការនេះបង្ហាញថា អាជ្ញាធរនិងតុលាការមានសមត្ថភាពក្នុងការបំបែកសំណុំរឿងឃាតកម្មធំៗ ទោះបីជាពាក់ព័ន្ធនឹងមន្ត្រីមានអំណាចក្ដី ។ លោក ឡាយ វណ្ណៈ ជាកូនរបស់ថៅកែហាងលក់មាស និងពេជ្រនៅផ្សារធំថ្មីយីហោ គង់ ហុង និងត្រូវជាកូនប្រសារបស់លោក ស៊ូ ភិរិន្ទ អតីតអភិបាលខេត្តតាកែវខេត្តកំពង់ឆ្នាំង និងខេត្តសៀមរាប ។ បច្ចុប្បន្នជារដ្ឋលេខាធិការទីស្តីការគណៈរដ្ឋមន្ត្រី ។លោក ឡាយ វណ្ណៈ ត្រូវបានតែងតាំងជាអភិបាលខេត្ត ជំនួសលោក ស្រី បេន កាលពីថ្ងៃទី១៨ មីនា ឆ្នាំ២០១៤ ។
នៅថ្ងៃទី៤ មេសា តាមគេហទំព័រក្នុងស្រុកមួយចំនួនបានផ្សាយឱ្យដឹងថា អ្នកស្រី ចេវ សុវឌ្ឍនា កាលពីឆ្នាំ២០១៥ ក៏ជាអ្នកបង្ហាញម៉ូដលើទស្សនាវដ្តីឡារ៉ែន និងមានរូបឈរថតជាមួយអ្នកនាង គង់ ចាន់ស្រីមុំផងដែរ ។ តាមរយៈរូបថតបង្ហាញម៉ូដនោះច្បាស់ណាស់ថាអ្នកស្រីជានារីដ៏ស្រស់ស្អាតម្នាក់ តែអភ័ព្វរឿងស្នេហា ទោះបីធ្លាក់ខ្លួនមេម៉ាយកូនដល់ទៅ៣នាក់ក្តី ប៉ះស្នេហ៍ចុងក្រោយ ក៏ប៉ះចំអ្នកមានអំណាចទៀត ទោះបីសុំធ្វើជាអ្នកទី២ក៏លំបាកដែរ ទីបំផុតបានជួបនឹងគ្រោះអកុសលបែបនេះ ហើយក៏ត្រូវបានគេស្តីបន្ទោសដែរពីការបើកបេះដូងឱ្យបុរសម្នាក់ដែលមានប្រពន្ធកូនទៅហើយ ៕
ចែករំលែកព័តមាននេះ