រាជធានីភ្នំពេញ ៖ រដ្ឋមន្ត្រីក្រសួងការពារជាតិបានគូសបញ្ជាក់ពីទង្វើរបស់ក្រុមអគតិមួយចំនួនថៃដាក់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ចង់ឱ្យប្រជាជាតិខ្មែរស្អប់ប្រជាជនថៃដល់កម្រិតមួយដែលមិនអាចវិលមកវិញបាន ។ ឯកឧត្តម ឧបនាយករដ្ឋមន្ត្រី…
រាជធានីភ្នំពេញ ៖ រដ្ឋមន្ត្រីក្រសួងការពារជាតិបានគូសបញ្ជាក់ពីទង្វើរបស់ក្រុមអគតិមួយចំនួនថៃដាក់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ចង់ឱ្យប្រជាជាតិខ្មែរស្អប់ប្រជាជនថៃដល់កម្រិតមួយដែលមិនអាចវិលមកវិញបាន ។
ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិកម្ពុជាបានសរសេរលើបណ្តាញសង្គម នៅថ្ងៃទី៦ តុលា ឆ្នាំ២០២៥ ថា ការបង្ហោះវីដេអូមានសមត្ថកិច្ច និងប្រជាជនមួយចំនួនបានយករូបថ្នាក់ដឹកនាំប្រទេសកម្ពុជាមកលេងសើចបែបនេះ តើមានបំណងអ្វី?
ឯកឧត្តមបានលើកឡើងថា ទង្វើបែបនេះចង់បង្ហាញថា ប្រជាជនថៃ និងកងកម្លាំងស្អប់ថ្នាក់ដឹកនាំកម្ពុជា?។ លើសពីនេះ មិនចង់ឱ្យបញ្ចប់ការប៉ះគ្នានៅព្រំដែនកម្ពុជា-ថៃ ដែលបាននាំគ្នាអនុវត្តបទឈប់បាញ់៦៩ថ្ងៃមកនេះ ។
ឯកឧត្តមក៏បានលើកឡើងទៀតថា ក្រុមអគតិមួយចំនួនចង់ឱ្យប្រជាជាតិខ្មែរស្អប់ប្រជាជនថៃ ដល់កម្រិតមួយដែលមិនអាចវិលមកវិញបាន។
ឯកឧត្តមក៏សង្កត់ធ្ងន់ថា«ខ្ញុំតែងតែគិតថា ប្រជាជនថៃមានការសិក្សាល្អ មានភាពថ្លៃថ្នូរ ប្រទេសជឿនលឿនជាប់លំដាប់ថ្នាក់ក្នុងអាស៊ាន តែមើលទៅខ្ញុំគិតខុសហើយ វាក៏នៅមានក្រុមដែលមិនបានស្គាល់ពិភពលោកខាងក្រៅដែរតើ» ។
ជាមួយគ្នានោះដែរ ឯកឧត្តរដ្ឋមន្ត្រីក្រសួងការពារជាតិកម្ពុជា ក៏បានលើកឡើងថា ប្រជាជនកម្ពុជាលែងប្រកាន់ហើយ ចំពោះពួកក្រុមទាំងនេះ រឿងបង្អាប់ រឿងសម្តែង មើលងាយគេ(Bully) ឬ don’t thai to me គឺដោយសារក្រុមនេះហើយ ដែលធ្វើឱ្យពិភពលោកមើលឃើញជ្រុងខ្មៅងងឹតរបស់ប្រទេសថៃ(dark side of thailand)។
ឯកឧត្តមក៏សូមបងប្អូនជនរួមជាតិ កុំយកតម្រាប់តាម កម្ពុជាយើងមិនឈានដល់កម្រិតអសីលធម៌ គ្មានសុជីវធម៌ បែបក្រុមនេះទេ ។ ខ្ញុំស្រឡាញ់ រាប់អានមនុស្ស មិនប្រកាន់ជាតិសាសន៍នោះទេ សូមបងប្អូនជនជាតិថៃ និងជនជាតិដទៃទៀតដែលរស់នៅកម្ពុជា បន្តរួមរស់ដោយសុវត្ថិភាព និងសន្តិភាព ៕
ចែករំលែកព័តមាននេះ