រាជធានីភ្នំពេញ ៖ មជ្ឈមណ្ឌលនវានុវត្តន៍(Innovation Center) ដែលស្ថិតក្រោមការគ្រប់គ្រងរបស់ក្រសួងប្រៃសណីយ៍ និងទូរគមនាគមន៍ នឹងផ្ដល់ឱកាសដល់សិស្ស និស្សិត បញ្ញវន្ត មកពីសាកលវិទ្យាល័យនានា ក៏ដូចជាយុវជនដែលមានគំនិតច្នៃប្រឌិតខាងបច្ចេកវិទ្យា អាចចូលមកសិក្សាស្រាវជ្រាវដោយសេរី ដោយផ្ដល់នូវបណ្ដាញអ៊ីនធើរណេតល្បឿនលឿនពីបណ្ដាក្រុមហ៊ុនប្រតិបត្តិករទូរគមនាគមន៍នៅកម្ពុជាទាំងអស់ និងប្រទេសជាដៃគូដទៃទៀត ។
លោកបណ្ឌិត សេង សុភាព ប្រធានវិទ្យាស្ថានជាតិ NIPTICT បានមានប្រសាសន៍ថា មជ្ឈមណ្ឌលនេះ នឹងផ្តល់ជាប្រយោជន៍ដល់និស្សិត និងសាធារណជនទូទៅក្នុងការសិក្សាស្រាវជ្រាវ ការចាប់ផ្តើមធុរកិច្ចក្នុងវិស័យបច្ចេកវិទ្យា និងការបង្ហាញពីភាពច្នៃប្រឌិតរបស់ពួកគេ ។
លោកបណ្ឌិតបញ្ជាក់ថា ៖« Innovation Center ជាមជ្ឈមណ្ឌលនវានុវត្តន៍ជាតិសម្រាប់មហាជនទូទៅ ពិសេសនិស្សិតថ្នាក់បរិញ្ញាបត្រ បរិញ្ញាបត្ររង និងថ្នាក់បណ្ឌិត ជាដើម អាចមកធ្វើការស្រាវជ្រាវនៅទីនេះបាន ដោយប្រើប្រាស់ឧបករណ៍ផ្សេងៗ ។ មិនត្រឹមតែប៉ុណ្ណោះ យុវជនដែលមានគំនិតបង្កើតអាជីវកម្ម ក៏អាចមកទីនេះដើម្បីធ្វើការជាមួយអ្នកបច្ចេកទេសផ្សេងទៀត ហើយក្រុមហ៊ុននានាក៏អាចអញ្ជើញដើម្បីស្វែងរកធនធានមនុស្សទៅកសាងបច្ចេកវិទ្យារបស់ក្រុមហ៊ុនខ្លួនបន្ថែមផងដែរ ។ ដូច្នេះ វាជាមជ្ឈមណ្ឌលមួយមិនមែនសម្រាប់តែនិស្សិតនៅវិទ្យាស្ថានយើងទេ តែយើងក៏ទទួលយកនូវក្រុមការងារស្រាវជ្រាវរបស់សាលាផ្សេងៗផងដែរ ព្រោះថាការស្រាវជ្រាវមិនមែនត្រឹមតែមួយជំនាញនោះទេ គឺស្រាវជ្រាវបច្ចេកវិទ្យាICT សម្រាប់សុខាភិបាល, ការអប់រំ, កសិកម្ម, ឧស្សាហកម្ម និងការកម្សាន្ដ ជាដើម ។ ដូច្នេះ យើងផ្ដល់ឱកាសដល់មហាជនគ្រប់មជ្ឈដ្ឋានដែលចង់ស្រាវជ្រាវជំនាញបច្ចេកវិទ្យា ICT » ។
លោកបន្ដថា ៖« មជ្ឈមណ្ឌលនេះ យើងចែកជាជាន់ ដោយជាន់ទី១ យើងបើកឱកាសឲ្យមហាជនចូលស្រាវជ្រាវដោយសេរី និងឥតគិតថ្លៃ ដោយមានផ្ដល់នូវអ៊ីនធើរណេតល្បឿនលឿន និងមានការតុបតែងរចនាស្អាត ។ ដូច្នេះ យុវជនយើងដែលចង់មកជួបគ្នា ចង់មកជជែកគ្នាពីរឿងបច្ចេកវិទ្យា ឬមានកម្មវិធីផ្សេងៗ អាចមកទីនេះបានដោយសេរី ។
ចំណែកនៅជាន់ទី២ សម្រាប់យុវជនណាបានឆ្លងកាត់ការជ្រើសរើសដែលមានគំនិតល្អៗ ហើយបើសិនជាមានគម្រោងល្អ គឺយើងនឹងអនុញ្ញាតឲ្យគាត់មានការិយាល័យមួយនៅទីនេះដើម្បីចាប់ផ្ដើមធ្វើអាជីវកម្មតែម្ដង ព្រោះយើងដឹងហើយថា យុវជនយើងមិនមានថវិកាឯណាទៅជួលOfficeនោះទេ ។ មួយទៀតសោត យើងនឹងមានជាបណ្ដាញផ្សេងៗក្នុងការជួយជាយោបល់ដូចជា ការធ្វើទីផ្សារ ការកៀរ គរហិរញ្ញវត្ថុ និងការប្រមូលធនធានដើម្បីធ្វើម៉េចឲ្យគំនិតអាជីវកម្មរបស់គាត់ហ្នឹង អាចក្លាយជាការពិត ហើយនៅពេលអាជីវកម្មទទួលបានប្រាក់ចំណេញ គាត់អាចចេញពីទីនេះទៅបង្កើតអាជីវកម្មនៅទីក្រុងបាន ។ រីឯជាន់ដទៃទៀត គឺសម្រាប់ការស្រាវជ្រាវដោយយើងមានបន្ទប់ពិសោធន៍ បន្ទប់កុំព្យូទ័រ បន្ទប់ទូរគមនាគមន៍ជាដើមដែលអាចឲ្យយុវជនមានលទ្ធភាពធ្វើការស្រាវជ្រាវនូវបច្ចេកវិទ្យាថ្មីៗទាំងអស់នោះ » ។
« ឧបករណ៍សម្រាប់ស្រាវជ្រាវទាំងអស់នេះ ទទួលបានពីដៃគូនានា ដូចជា សាលាតិចណូ សាកលវិទ្យាល័យជាតិគ្រប់គ្រង និងក្រុមហ៊ុនជាដៃគូ ផ្សេងៗទៀត ដែលបានផ្ដល់អ្នកជំនាញ និងមូលនិធិក្នុងការគាំទ្រឲ្យដំណើរការ ព្រោះថា យើងផលិតធនធានមនុស្សទាំងអស់ ក៏ដើម្បីពួកគាត់ដែរ »។ នេះបើតាមលោកបណ្ឌិតប្រធានវិទ្យាស្ថានជាតិ NIPTICT បានបញ្ជាក់ ។
មជ្ឈមណ្ឌលនេះលាតសន្ធឹងលើផ្ទៃដី៧.៥០០ម៉ែត្រក្រឡា មានកម្ពស់៤ជាន់ ស្ថិតក្នុងបរិវេណនៃវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន ហៅកាត់ថា «វិទ្យាស្ថានជាតិនិបទីក» (NIPTICT) នៅសង្កាត់ព្រែកលៀប ខណ្ឌជ្រោយចង្វា ដោយបានចាប់ផ្ដើមបុកគ្រឹះសាងសង់កាលពីព្រឹកថ្ងៃទី៣០ មីនា ម្សិលមិញ ហើយគ្រោងនឹងបញ្ចប់ការសាងសង់នៅរយៈពេល១៨ខែខាងមុខ ។ ការសាងសង់មជ្ឈមណ្ឌលនេះ ដោយប្រើប្រាស់ថវិកាជិត៤លានដុល្លារ បានមកពីមូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍលើវិស័យICT (ហៅកាត់ថា មូលនិធិ ស.អ.) ដែលជាមូលនិធិមួយកើតចេញអំពីការបង់ប្រាក់ចំណូលដុល១% របស់ប្រតិបត្តិករទូរគមនាគមន៍ ហើយក្នុងនោះ ក្រុមហ៊ុន Smart Axiata ជាដៃគូឧបត្ថម្ភដ៏ធំមួយ ។
នាយកប្រតិបត្តិក្រុមហ៊ុន Smart Axiata លោក Thomas Hundt បានសម្ដែងការសាទរចំពោះការបង្កើតមជ្ឈមណ្ឌលនេះឡើង ដែលជាមូលដ្ឋានគ្រឹះនៃការអភិវឌ្ឍវិស័យបច្ចេកវិទ្យានៅកម្ពុជា ហើយក្រុមហ៊ុនស្មាតនៅតែបន្ដភាពជាដៃគូដ៏រឹងមាំក្នុងការជួយជ្រោមជ្រែងដើម្បីដំណើរការ ។
លោកថ្លែងថា ៖« មជ្ឈមណ្ឌលនេះនឹងផ្តល់ឱកាសដល់កម្ពុជាបង្ហាញពីសមត្ថភាពនវានុវត្តន៍របស់ខ្លួន ហើយយើងជឿជាក់ថា មជ្ឈមណ្ឌលនេះនឹងផ្តល់ឱកាសដល់និស្សិត សហគ្រិនបច្ចេកវិទ្យា និងសហគមន៍ Tech Startup ក្នុងការបង្កើត និងបង្ហាញគំនិតនវានុវត្តន៍ ជំនាញ និងការនាំមុខទៅកាន់ឌីជីថល តាមរយៈរបកគំហើញថ្មីៗដែលផ្តល់អត្ថប្រយោជន៍ដល់កម្ពុជា »។
លោកមានសុទិដ្ឋិនិយមថា ៖« មជ្ឈមណ្ឌលនេះនឹងពង្រឹង លើកទឹកចិត្ត និងកសាងយុគសម័យបច្ចេកវិទ្យារបស់កម្ពុជាឆ្ពោះទៅកាន់យុគ សម័យឌីជីថល និងICT ឲ្យស្របជាមួយប្រទេសក្នុងតំបន់ » ។
រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ត្រាំ អ៊ីវតឹក មានជំនឿយ៉ាងមុតមាំថា មជ្ឈមណ្ឌលនេះ នឹងជួយជំរុញដល់ការស្រាវជ្រាវនវានុវត្តន៍ និងការលើកកម្ពស់សហគ្រិនភាពផ្នែកICTនៅកម្ពុជា ។
លោករដ្ឋមន្ត្រី បានថ្លែងនាឱកាសនោះថា ៖« ខ្ញុំសង្ឃឹមប្រកបដោយសុទិដ្ឋិនិយម នៅរយៈពេល១៨ខែទៀត អគារមជ្ឈមណ្ឌលនវានុវត្តន៍នេះ នឹងចាប់ផ្ដើមដំណើរការ និងអនុញ្ញាតឲ្យអ្នកស្រាវជ្រាវ ពិសេសសហគ្រិនបច្ចេកវិទ្យាវ័យក្មេង និងសិស្សានុសិស្ស ទទួលបានអត្ថប្រយោជន៍ដ៏ច្រើនពីអគារនេះ » ។
លោករដ្ឋមន្ត្រីបន្ដថា ៖« អគារនេះ នឹងត្រូវសាងសង់ឡើងដើម្បីចូលរួមអភិវឌ្ឍន៍ដល់ការបណ្តុះបណ្តាលធនធានមនុស្សផ្នែកទូរគមនាគមន៍ និងICT ស្របតាមគោលនយោបាយអភិវឌ្ឍន៍វិស័យICTរបស់កម្ពុជា ដែលមានគោលដៅចម្បងចំនួន៣គឺ៖ ១-ជំរុញការអភិវឌ្ឍធនធានមនុស្សខាងផ្នែកបច្ចេកវិទ្យាគមនាគមន៍ និងព័ត៌មាន ។ ២-ជំរុញការស្រាវជ្រាវ និងអភិវឌ្ឍន៍នវានុវត្តន៍ក្នុងវិស័យបច្ចេកវិទ្យាគមនាគមន៍ និងព័ត៌មាន និង៣-ជំរុញការបង្កើតអាជីវកម្មថី្មៗខាងផ្នែកបច្ចេកវិទ្យាគមនាគមន៍ និងព័ត៌មាន »។
លោករដ្ឋមន្ត្រីបន្ដទៀតថា ៖« អគារនេះ នឹងក្លាយជាកន្លែងសម្រាប់ការស្រាវជ្រាវ និងអភិវឌ្ឍន៍ផ្នែកបច្ចេកវិទ្យា កន្លែងពិសោធន៍សម្រាប់និស្សិតIT កន្លែងធ្វើការរួមគ្នា (Co-Working Space) សាលសន្និសីទ-ប្រជុំ និងពិព័រណ៍ ជាមជ្ឈមណ្ឌលទិន្នន័យ ការិយាល័យសម្រាប់ក្រុមហ៊ុន ទីភ្នាក់ងារ រដ្ឋាភិបាល និងជាមជ្ឈមណ្ឌលបណ្តុះបណ្តាលធនធានមនុស្សក្នុងវិស័យបច្ចេកវិទ្យា និងសហគ្រិនបច្ចេកវិទ្យាក្នុងយុគសម័យឌីជីថល » ។
ប្រទេសកម្ពុជាមានយុវជនវ័យក្មេងច្រើនជាងគេនៅក្នុងតំបន់ដែលជាង៦០%មានអាយុក្រោម៣០ឆ្នាំ ជាកម្លាំងចលករមួយយ៉ាងសំខាន់ក្នុងការចាប់យកជំនាញបច្ចេកវិទ្យា ហើយក៏ជាកម្លាំងមួយដែលកម្ពុជាអាចមានភាពប្រកួតប្រជែងនៅក្នុងតំបន់ផងដែរ នៅពេលដែលអាជីវកម្មបច្ចុប្បន្នកំពុងបែរឆ្ពោះទៅរកអាជីវកម្មបែបឌីជីថល ដោយប្រើបច្ចេកវិទ្យា ។ ដូច្នេះ យុវជនកម្ពុជាគួរចាប់យកឱកាសសិក្សាជំនាញនេះឲ្យបានច្រើន ព្រោះរាល់ថ្ងៃនេះ យុវជនហាក់ដូចជា មានចំណាប់អារម្មណ៍តែទៅលើជំនាញអាជីវកម្ម, ការគ្រប់គ្រង, គណនេយ្យ ឬទីផ្សារជាដើម ច្រើនជាងជំនាញបច្ចេកវិទ្យា ។
ជំនាញបច្ចេកវិទ្យានេះ នឹងផ្ដល់ការងារយ៉ាងច្រើន ព្រោះថាបច្ចុប្បន្ន មិនថាតែប្រទេសកម្ពុជាទេដែលកំពុងតែឈានទៅរកសេដ្ឋកិច្ចពឹងផ្អែកលើឌីជីថល បណ្ដាប្រទេសផ្សេងៗលើសកលលោកបានដើររួចទៅហើយ ហើយក៏ជាការងារដែលមានប្រាក់ខែខ្ពស់ផងដែរ បើធៀបនឹងជំនាញដទៃ ។
យ៉ាងណាក្ដី បើយោងតាមលោកបណ្ឌិត សេង សុភាព បច្ចុប្បន្ននេះនៅវិទ្យាស្ថានជាតិNIPTICT និស្សិតដែលកំពុងសិក្សានៅជំនាន់ទី១ ជំនាញផ្នែកបច្ចេកវិទ្យានេះមានតែចំនួន១០០នាក់ប៉ុណ្ណោះ ដែលនឹងបញ្ចប់ការសិក្សានៅឆ្នាំនេះ ហើយពួកគេគឺជាគ្រាប់ពូជដ៏មានសក្ដានុពលដែលមានជំនាញច្បាស់លាស់ ក្នុងនោះមាន ជំនាញសរសេរកូដ, ជំនាញe-Commerce, ការគ្រប់គ្រងឡូជីស្ទិក ណេតវើក បណ្ដាញកុំព្យូទ័រ និងសរសេរ Program ជាដើម ៕
ចែករំលែកព័តមាននេះ