រាជធានីភ្នំពេញ ៖ ដោយសារតែរដូវវស្សាកាន់តែខិតជិតមកដល់ ហើយក៏ជាការចាប់ផ្តើមកកើតនូវសម្បុក មូសខ្លាប្រភពនៃជំងឺគ្រុនឈាមនោះ ស្ថាប័នជំនាញពាក់ព័ន្ធ រួមទាំងដៃគូរសហការបានរៀបចំ សិក្ខាសាលាមួយកាលពីព្រឹកថ្ងៃទី២៣ ខែមីនា ឆ្នាំ២០១៨ នៅសណ្ឋាគារសូហ្វីតែល សំដៅផ្សព្វ ផ្សាយអំពីវិធានការ និងប្រតិបត្តិការកម្ចាត់ជម្រកមូសខ្លានៅតាមសាលារៀន។ លោកវេជ្ជបណ្ឌិត លី សុវត្ថិ បំរើការងារនៅវិទ្យាស្ថានប៉ាស្ទ័រកម្ពុជា ផ្នែកគីមីសាស្ត្រ និងសុខភាពសាធារណៈបានឲ្យដឹងថា សិក្ខាសាលានេះ មានសារៈសំខាន់ណាស់ព្រោះថា ស្ថាប័នជំនាញពាក់ព័ន្ធ រួមទាំងដៃគូនឹងពិភាក្សាគ្នា អំពីគម្រោងសិក្សាដោយផ្តោតលើវិធានការកម្ចាត់ ជម្រកមូសខ្លានៅតាមសាលារៀន ដើម្បីកាត់បន្ថយ ការចម្លងជំងឺគ្រុនឈាមនៅតាមសហគមន៍។ លោកវេជ្ជបណ្ឌិត លី សុវត្ថិ បានបញ្ជាក់ថា គម្រោងសិក្សាអំពីវិធានការកម្ចាត់ជម្រកមូសខ្លា និងស្រាវជ្រាវរកវីរូសនៃជំងឺគ្រុនឈាមនាពេលនេះ អាចចាត់ទុកជាវិធានការថ្មីមួយ សម្រាប់ការសិក្សាស្រាវជ្រាវរបស់យើង។
លោកថា វិធានការនោះដំបូង យើងផ្តោតជាសំខាន់លើការអប់រំ ណែនាំ សិក្សាតាមសាលារៀន ឲ្យយល់អំពីមូលហេតុដែលនាំឲ្យកើត ជំងឺគ្រុនឈាម បន្ទាប់មកយើងនឹងបំផុសឲ្យពួកគាត់ ចូលរួមកម្ចាត់ជម្រកមូសខ្លាតាមសាលារៀន។ ទន្ទឹមនោះ វិធានការថ្មីមួយទៀត គឺការធ្វើតេស្តតាមទឹកមាត់របស់សិស្សតាមសាលារៀន ដើម្បីស្រាវជ្រាវ រកមេរោគគ្រុនឈាម ហើយតាមគម្រោងយើងនឹងចាប់ផ្តើមធ្វើតាមសាលារៀនមួយចំនួន ក្នុងខេត្តកំពង់ចាម និងខេត្តត្បូងឃ្មុំ។ លោកវេជ្ជបណ្ឌិតបានលើកឡើងថា ចាប់ពីខែឧសភា ឬមិថុនាទៅ គឺជាពេលវេលាចាប់ផ្តើមនៃរដូវវស្សាហើយក៏ជាចំណុចចាប់ផ្តើមបង្កឲ្យមានជំងឺគ្រុនឈាមផងដែរ។ ប៉ុន្តែកុំភ្លេចថា រដូវណាក៏អាចចម្លងជំងឺគ្រុនឈាមបានដែរ មិនចាំបាច់តែដល់រដូវវស្សានោះទេ គ្រាន់តែភាពចម្លង តិច ឬច្រើនប៉ុណ្ណោះ។ ដូច្នេះការបង្ការឬវិធានការការពារ ជំងឺគ្រុនឈាម ឬក៏ការបំផ្លាញជម្រកមូសខ្លាដែលជាប្រភពចម្លងជំងឺគ្រុនឈាម គឺយើងទាំងអស់គ្នា ត្រូវតែធ្វើជាប្រចាំ និងជាបន្តបន្ទាប់។
លោកវេជ្ជបណ្ឌិត លី សុវត្ថិ បន្ថែមថា តាមគម្រោងនៃការសិក្សាស្រាវជ្រាវថ្មីនេះ យើងអាចនឹងធ្វើតេស្តតាមទឹកមាត់សិស្សសាលា ដើម្បីស្វែងរកមេរោគគ្រុនឈាមផងដែរ។ ដូច្នេះក្រុមជំនាញនឹងចុះទៅប្រមូលទឹកមាត់ពីកុមារនៅតាមសាលារៀន ដើម្បីយកមកពិនិត្យរក ករណីនៃការឆ្លងជំងឺគ្រុនឈាម។ លោកថា វិធានការថ្មីនេះ យើងទើបចាប់ផ្តើមជាលើកដំបូង នៅឆ្នាំ២០១៨ ចាប់ពីខែឧសភាទៅ។ លោកបញ្ជាក់ថា យើងបានជ្រើសរើសសាលារៀនមួយចំនួន ក្នុងខត្តកំពង់ចាម និងត្បូងឃ្មុំ ដើម្បីដាក់បញ្ចូលក្នុងកម្មវិធីសិក្សាស្រាវជ្រាវជាលើកដំបូង។ លោកវេជ្ជបណ្ឌិតអំពាវនាវផងដែរដល់មាតាបិតា និងអាណាព្យាបាលទាំងអស់ចូលរួម ក្នុងវិធាន ការកម្ចាត់ជម្រកមូសខ្លា ហើយយកចិត្តទុកដាក់ការពារកុំឲ្យមូសខ្លាខាំកូនចៅ ព្រោះនោះជា វិធានការចាំបាច់បំផុត។ បន្ទាប់មកត្រូវប្រញាប់នាំកូនទៅកាន់មន្ទីរពេទ្យ ឬក្រុមជំនាញ ដើម្បីធ្វើ តេស្តរកមេរោគគ្រុនឈាមប្រសិនបើសង្ស័យថា មានជំងឺគ្រុនឈាម៕
ចែករំលែកព័តមាននេះ