លោកវេជ្ជបណ្ឌិត សួន សុខុម អ្នកឯកទេសព្យាបាលដោយចលនា ផ្នែកប្រសាទសាស្ដ្រនៃមន្ទីរពេទ្យកាល់ម៉ែតបានឲ្យដឹងថា ៖ ឈឺចង្កេះជាជំងឺរ៉ាំរ៉ៃ ដែលមានអាការ:ឈឺបាត់ៗ កើតឡើងចំពោះអ្នកអង្គុយយូរ
រាជធានីភ្នំពេញ ៖ លោកវេជ្ជបណ្ឌិត សួន សុខុម អ្នកឯកទេសព្យាបាលដោយចលនា ផ្នែកប្រសាទសាស្ដ្រនៃមន្ទីរពេទ្យកាល់ម៉ែតបានឲ្យដឹងថា ៖ ឈឺចង្កេះជាជំងឺរ៉ាំរ៉ៃ ដែលមានអាការ:ឈឺបាត់ៗ កើតឡើងចំពោះអ្នកអង្គុយយូរ អ្នកធ្វើការងារការិយាល័យ អ្នកលើកវត្ថុធ្ងន់ៗ គ្រេចចង្កេះ និងដោយសារការប៉ះទង្គិចជាដើម។
បើយើងមិនបានព្យាបាលអ្វីសោះនោះ វាបណ្ដាលឲ្យកើតមានស្ត្រេសរំខានអារម្មណ៍ក្នុងការបំពេញការងារ ដេកមិនលក់ ជាពិសេសធ្វើឲ្យមានការគាបសង្កត់លើទ្រនាប់ឌីសចន្លោះឆ្អឹងកងចង្កេះ បណ្តាលឲ្យឈឺរហូតដល់ជើង ដែលពិបាកក្នុងការព្យាបាលដោយប្រើឱសថ ហើយអាចនឹងឈានដល់ការវះកាត់ទ្រនាប់ឌីសថែមទៀតផង។
ក្នុងករណីនេះ យើងមានវីធីព្យាបាលដោយចលនាជំនួយបន្ថែមដោយមិនប្រើប្រាស់ថ្នាំពេទ្យ ៖
១) ការព្យាបាលដោយម៉ាស៊ីន Microthermy ៖ ការស្អំកំដៅដើម្បីបន្ធូរសាច់ដុំដែលឈឺចាប់។
២) ការព្យាបាលដោយចលនា (Physiotherapy) ៖ ពត់បន្ធូរបន្ទន់សន្លាក់សាច់ដុំចង្កេះ។
៣) ការព្យាបាលដោយ Back Traction ៖ ទាញបន្ថយការគាបសង្កត់សន្លាក់ឆ្អឹង ទ្រនាប់ឌីសឆ្អឹងខ្នង បំបាត់ ការគាបសង្កត់លើសរសៃប្រសាទស៊ីយ៉ាទិច និងបំបាត់ការឈឺចាប់នៅជើង។
បន្ទាប់ពីព្យាបាលដោយវិធីខាងលើនេះ យើងត្រូវធ្វើលំហាត់ប្រាណបន្ថែមដោយខ្លួនឯងដូចជា ហែលទឹក តោងរបាជាជំនួយបន្ថែមទៀត និងអង្គុយឩស្សាហ៍ងើបឈរ ដើរ សម្រួលចង្កេះ ដងខ្លួន ជើង ប្រហែល៥នាទី ទើបអង្គុយធ្វើការវិញ។
លោកវេជ្ជបណ្ឌិតសួន សុខុម អ្នកឯកទេសព្យាបាលដោយចលនា ផ្នែកប្រសាទសាស្ដ្រនៃមន្ទីរពេទ្យកាល់ម៉ែតក៏បានរំលឹកថា ៖ សូមកុំគិតថា ឈឺចង្កេះជារឿងធម្មតា ព្រោះវាអាចប៉ះពាល់ដល់សុខភាពរបស់អ្នក។ ប្រសិនបើលោកអ្នកមានអាការៈឈឺចង្កេះ សូមមកជួបពិគ្រោះជាមួយគ្រូពេទ្យជំនាញនៅមន្ទីរពេទ្យកាល់ម៉ែត ដើម្បីស្វែងរកមូលហេតុ និងធ្វើការព្យាបាលឲ្យបានត្រឹមត្រូវ ៕
ចែករំលែកព័តមាននេះ