រាជធានីភ្នំពេញ៖ លោកសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានសង្កត់ធ្ងន់ថា «សុខភាពផ្លូវចិត្ត ជាអាទិភាពមួយ ដែលចូលរួមក្នុងការជំរុញផលិតភាពរបស់ប្រទេសជាតិ»។ សេចក្ដីថ្លែងការណ៍នេះធ្វើឡើងក្នុងជំនួបមួយជាមួយថ្នាក់ដឹកនាំនាយកដ្ឋានសុខភាពផ្លូវចិត្ត…
រាជធានីភ្នំពេញ៖ លោកសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានសង្កត់ធ្ងន់ថា «សុខភាពផ្លូវចិត្ត ជាអាទិភាពមួយ ដែលចូលរួមក្នុងការជំរុញផលិតភាពរបស់ប្រទេសជាតិ»។ សេចក្ដីថ្លែងការណ៍នេះធ្វើឡើងក្នុងជំនួបមួយជាមួយថ្នាក់ដឹកនាំនាយកដ្ឋានសុខភាពផ្លូវចិត្ត និងការបំពានគ្រឿងញៀន កាលពីព្រឹកថ្ងៃទី៤ ខែធ្នូ ឆ្នាំ២០២៥ ដើម្បីពិនិត្យវឌ្ឍនភាពការងារ។
លោកសាស្រ្តាចារ្យរដ្ឋមន្ត្រី បានគូសបញ្ជាក់យ៉ាងច្បាស់ថា «សុខភាពជាស្នូលមួយនៃការអភិវឌ្ឍជាតិ»។ ដើម្បីសម្រេចចក្ខុវិស័យនេះ លោកបានដាក់ចេញនូវអនុសាសន៍សំខាន់ៗ ដោយផ្តោតលើការពង្រឹងសុខភាពផ្លូវចិត្តតាមរយៈគោលការណ៍គន្លឹះចំនួន ៣៖ ទី១- គឺការពង្រឹងគុណភាពសេវាសុខភាពផ្លូវចិត្ត និងការបំពានគ្រឿងញៀនឲ្យបានល្អប្រសើរនៅគ្រប់កម្រិត ដោយសហការជាមួយគណៈគ្រូពេទ្យ និងស្វែងរកវិធីសាស្ត្របណ្ដុះបណ្ដាលប្រកបដោយប្រសិទ្ធភាព។ ទី២- គឺការពង្រីកធនធានជំនាញអមសុខភាព ដូចជាជំនាញកិច្ចការសង្គម។ និងទី៣- គឺការរៀបចំផែនការច្បាស់លាស់ក្នុងការបណ្ដុះបណ្ដាលជំនាញ ដើម្បីពង្រីកសេវាសុខភាពផ្លូវចិត្តឲ្យកាន់តែទូលំទូលាយ។
ក្រៅពីការពង្រឹងសេវាទាំងប៣ចំណុចខាងលើ លោករដ្ឋមន្ត្រីក៏បានណែនាំឲ្យនាយកដ្ឋានជំរុញបន្ថែមទៅលើការងារគន្លឹះមួយចំនួនទៀតដូចជាការរៀបចំគោលការណ៍ណែនាំបច្ចេកទេសឲ្យបានច្រើន, ជំរុញការងារយុទ្ធនាការអប់រំសុខភាពផ្លូវចិត្ត និងគ្រឿងញៀនឲ្យបានទូលំទូលាយ, និងលើកកម្ពស់ការងារស្រាវជ្រាវពាក់ព័ន្ធនឹងសុខភាពផ្លូវចិត្តឲ្យកាន់តែសកម្ម៕
ចែករំលែកព័តមាននេះ