រាជធានីភ្នំពេញ ៖ បុរស ដែលពាក់អាវយឺតពណ៌ខ្មៅ មានឡូហ្គោប៉ូលិស(ដូចក្នុងរូបភាព) មានបញ្ហាគ្រោះថ្នាក់ចរាចរណ៍នៅខណ្ឌបឹងកេងកង គឺបុរសនោះ មិនមែនជាមន្ត្រីនគរបាលនោះទេ ករណីគ្រោះថ្នាក់ចរាចរណ៍នេះ សមត្ថកិច្ចជំនាញកំពុងអនុវត្តតាមនីតិវិធី…
រាជធានីភ្នំពេញ ៖ បុរស ដែលពាក់អាវយឺតពណ៌ខ្មៅ មានឡូហ្គោប៉ូលិស(ដូចក្នុងរូបភាព) មានបញ្ហាគ្រោះថ្នាក់ចរាចរណ៍នៅខណ្ឌបឹងកេងកង គឺបុរសនោះ មិនមែនជាមន្ត្រីនគរបាលនោះទេ ករណីគ្រោះថ្នាក់ចរាចរណ៍នេះ សមត្ថកិច្ចជំនាញកំពុងអនុវត្តតាមនីតិវិធី នេះបើយោងតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ។
ក្រុមការងារព័ត៌មាន និងប្រតិកម្មរហ័ស បានឲ្យដឹងថា កាលពីវេលាម៉ោង២៣:៥០នាទីថ្ងៃទី២ ខែធ្នូ ឆ្នាំ២០២៥ មានករណីគ្រោះថ្នាក់ចរាចរណ៍មួយ កើតឡើងនៅចំណុចផ្លូវប្រសព្វ៣៣៨ លើផ្លូវលេខ១៩៩ សង្កាត់ទួលស្វាយព្រៃទី២ ខណ្ឌបឹងកេងកង រវាងម៉ូតូម៉ាក HONDA DREAM ពណ៌ខ្មៅ ពាក់ផ្លាកលេខ ប៉ៃលិន 1C-6571 បើកបរដោយឈ្មោះ គង់ វណ្ណី ភេទប្រុស មុខរបរបុគ្គលិកពេទ្យ និងម៉ូតូម៉ាក HONDA PCX ពណ៌ខ្មៅ ពាក់ផ្លាកលេខ ភ្នំពេញ 1LS-0344 បើកបរដោយឈ្មោះ លឹម សំណាង ភេទ ប្រុស មុខរបរលក់ដូរ។ ហេតុការណ៍នេះ បណ្តាលឱ្យអ្នកបើកបរទាំងសងខាងរងរបួស និងខូចខាតម៉ូតូធ្ងន់ ទាំង០២គ្រឿង ។
ក្រុមការងារព័ត៌មាន និងប្រតិកម្មរហ័ស បានឲ្យដឹងបន្តថា បន្ទាប់ពីកើតហេតុ សមត្ថកិច្ចជំនាញ នៃអធិការដ្ឋាននគរបាលខណ្ឌបឹងកេងកង បានចុះដល់កន្លែងកើតហេតុ វាស់វែងតាមជំនាញ ដោយបាននាំយកម៉ូតូ និងអ្នកបើកបរ មកកាន់អធិការដ្ឋាននគរបាលខណ្ឌបឹងកេង ដើម្បីសួរនាំ។ សមត្ថកិច្ចបានត្រួតពិនិត្យជាតិអាល់កុល ជាលទ្ធផល អ្នកបើកម៉ូតូ HONDA DREAM ពាក់អាវយឺត ពណ៌ខ្មៅ មានឡូហ្គោប៉ូលិស មានជាតិអាល់កុល 0,35ml/L ។
ពាក់ព័ន្ធអ្នកបើកបរម៉ូតូម៉ាក HONDA DREAM ប្រើប្រាស់អាវមានឡូហ្គោប៉ូលិស គាត់បានសារភាពប្រាប់សមត្ថកិច្ចថា គាត់មិនមែនជានគរបាលទេ អាវដែលគាត់ពាក់មានឡូហ្គោប៉ូលិស គឺគាត់ទិញពីផ្សារ ៕
ចែករំលែកព័តមាននេះ