ខេត្តស្វាយរៀង ៖ មេកន្ទុយលេខដុះស្លែ៣នាក់ បានប្រមូលប្រាក់ដែលទទួលបានមកពីមេរង៣ស្រុកក្នុងខេត្តតាកែវ ខេត្តកំពត និងខេត្តព្រះសីហនុ បានប្រាក់ជាង៥០០លានរៀលវេចរត់គេចមកសម្ងំលាក់ខ្លួននៅខេត្តស្វាយរៀង មកលេងល្បែងជល់មាន់នៅកាស៊ីណូ៩៩៩ ព្រៃវល្លិ លុះដឹងថា សមត្ថកិច្ចតាមចាប់ខ្លួនក៏រត់ចូលទៅប្រទេសវៀតណាម ដោយបន្សល់ទុករថយន្ត១គ្រឿងម៉ាកឡិចស៊ីស៤៧០ និងម៉ាស៊ីនថតរូប១គ្រឿង និងប្រាក់ដុងចំនួន៦៨លានដុង ។
ទាក់ទិននឹងករណីខាងលើនេះ លោកវរសេនីយ៍ត្រី កុយ សុភាព នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានឱ្យដឹងថា មេកន្ទុយលេខរូបនោះ គឺ១-ឈ្មោះ កៅ សេង ហៅឈឹម សុភា ភេទប្រុស អាយុ៤២ឆ្នាំ ជាមេកន្ទុយលេខ មានទីលំនៅភូមិ៤ សង្កាត់៤ ខណ្ឌមិត្តភាព ខេត្តព្រះសីហនុ ។ ទី២-ឈ្មោះ ឈឹម ភឿង ភេទស្រី អាយុ៣៧ឆ្នាំ ជាមេកន្ទុយលេខ ត្រូវជាប្អូនស្រី ឈឹម សុភា មានទីលំនៅភូមិ៤ សង្កាត់៤ និងទី៣-ឈ្មោះ ចិន ភេទប្រុស អាយុជាង៥០ឆ្នាំ ជាគូកន មានទីលំនៅខេត្តព្រះសីហនុ ។
លោក កុយ សុភាព បន្តទៀតថា កាលពីថ្ងៃទី៥ មករា ២០១៣ វេលាម៉ោង៥លា្ងច នៅភូមិត្រពាំងរំពាក់ ឃុំត្រាំកក់ ស្រុកត្រាំកក់ ខេត្តតាកែវ មានផ្ទុះករណីប្រជាពលរដ្ឋរាប់រាយនាក់ត្រូវកន្ទុយលេខ គឺេលខ«១៨» ក៏នាំគ្នាមកបើកប្រាក់ពីមេរង អ្នករត់កន្ទុយលេខ ។ ឯមេរងក៏ទៅបើកប្រាក់ពីមេធំឈ្មោះកៅ សេង ឈឹម ភឿង និងឈ្មោះ ចិន ដែលមានទឹកប្រាក់សរុប៥១៦.៦០៥.៣០០រៀល ស្រាប់តែអ្នកទាំងបីនាំគ្នាវេចប្រាក់រត់គេចខ្លួនមិនព្រមសង ដោយជិះរថយន្តឡិចស៊ីស៤៧០មួយគ្រឿង ពណ៌ខ្មៅ ពាក់ស្លាកលេខភ្នំពេញ2L-8659 ចេញពីភូមិត្រពាំងរំពាក់ ស្រុកត្រាំកក់ មកលាក់ខ្លួន នៅខេត្តស្វាយរៀង ។ រហូតដល់ថ្ងៃទី៨ មករា វេលាម៉ោង៤និង៣០រសៀល សមត្ថកិច្ចដែលទទួលពាក្យបណ្តឹងបានស្រាវជ្រាវក៏ឃើញរថយន្តមួយគ្រឿងនេះចតផ្ញើនៅសង្វៀនបញ្ជល់មាន់កាស៊ីណូ៩៩៩ព្រៃវល្លិ ភូមិព្រៃវល្លិ ឃុំថ្មី ស្រុកកំពង់រោទិ៍ ខេត្តស្វាយរៀង ក៏សួររកម្ចាស់រថយន្តទើបបានឃើញអ្នកបើកបរម្នាក់ឈ្មោះ ស៊ឹម សុវណ្ណ ភេទប្រុស អាយុ៥១ឆ្នាំ ជាអ្នកបើកបរតាក់ស៊ី មានទីលំនៅភូមិថ្មីធំ ឃុំរៀម ស្រុកព្រៃនប់ ខេត្តព្រះសីហនុ មកអះអាង ។ ឯម្ចាស់រថយន្តដែលជាមេកន្ទុយលេខដែលដឹងខ្លួនក៏នាំគ្នារត់គេចចូលទៅប្រទេសវៀតណាមបាត់ទៅ ។
លោក កុយ សុភាព បន្តទៀតថា បើតាមពាក្យបណ្តឹងរបស់មេរង១២នាក់ឱ្យដឹងថា ប្រជាពលរដ្ឋបានលេងល្បែងចាក់កន្ទុយលេខភ្លូកទឹកភ្លូកដី គឺចាក់ចិញ្ចឹមមេរាល់ថ្ងៃ ដែលមានប្រជាពលរដ្ឋរស់នៅក្នុងភូមិត្រពាំងរំពាក់ ឃុំត្រាំកក់ស្រុកត្រាំកក់ ខេត្តតាកែវ ស្រុកអង្គរជ័យ ខេត្តកំពត ភូមិចំប៉ី ស្រុកព្រៃនប់ ខេត្តព្រះសីហនុ ។ ជាអ្នកញៀនខាងចាក់កន្ទុយលេខ ។
ប្រជាពលរដ្ឋលេងល្បែងចាក់កន្ទុយលេខនេះ ក្នុងមួយគ្រួសារត្រូវចំណាយអស់រាប់លានរៀល ខ្លះលក់គោ ក្របី ជ្រូក មាន់ ទា ខ្លះយកប្លង់ដី ប្លង់ផ្ទះទៅបញ្ចាំនៅធានាគារយកប្រាក់មកតាមចាក់លេខ១៨ (ពីរខ្ទង់) អស់រយៈពេល៤៦ថ្ងៃ ទើបចេញលេខ១៨នេះ គឺមួយភូមិចំប៉ី ខេត្តកំពត ភូមិត្រពាំងរំពាក់ គឺក្នុងមួយភូមិចាក់ទាំងអស់គ្នា។ ពេលត្រូវគឺត្រូវទំាំងអស់គ្នា ចាក់ប៉ុស្តិ៍A ក្រុងហូជីមិញចេញលេខ១៨ ត្រូវភ្លូកទឹកភ្លូកដី ។ មេរងទាំង៣ស្រុកបានប្រមូលឱ្យមេធំ ឈ្មោះ កៅ សេង ហៅឈឹម សុភា និងប្អូនស្រីឈ្មោះ ឈឹម ភឿង និងឈ្មោះ ចិន ក៏ប៉ុន្តែពេលត្រូវច្រើនពេកក៏វេចប្រាក់ឆបោកសរុប៥១៦លាន ៦សែនរៀល រត់គេចខ្លួនតែម្តង ។ ពេលដឹងថា មេចាប់ផ្តើមរត់ក៏នាំតាមរក ហើយដឹងថារត់មកខេត្តស្វាយរៀង ក៏ប្តឹងសមត្ថកិច្ចឱ្យជួយចាប់ ។
សមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់នៅថ្ងៃទី១០ មករា វេលាម៉ោង៨ព្រឹក ។ វត្ថុតាង រួមមាន រថយន្តឡិចស៊ីស៤៧០ មួយគ្រឿង ម៉ាស៊ីនថតឌីឌីថលមួយគ្រឿង ប្រាក់៦៨លានដុង និងឯកសារកត់កន្ទុយលេខមួយចំនួន ។ ប្រជាពលរដ្ឋសំណូមពរ សូមឱ្យសមត្ថកិច្ចជួយរកយុតិ្តធម៌ផង។ ពេលនេះសមត្ថកិច្ចខេត្តតាកែវ សហការជាមួយសមត្ថកិច្ចខេត្តស្វាយរៀង កំពុងតាមរកចាប់ខ្លួនមេកន្ទុយលេខរត់ចោលស្រុកនេះហើយ ។ ជាការពិតណាស់ ល្បែងស៊ីតិច តែជុះធំនេះ ទីបំផុតអ្នកធ្វើមេច្រើនតែធ្លាក់ខ្លួនក្រ ឬជាប់គុកប៉ុណ្ណោះ ហើយអ្នកដែលឈ្នះល្បែងនេះច្រើនតែទឹកភ្នែក ព្រោះពេលមេស៊ីក៏ស្ងាត់ ពេលឈ្នះមេរត់បាត់ ៕
ចែករំលែកព័តមាននេះ