ខេត្តស្ទឹងត្រែង ៖ ដៃម្ខាងកាន់រំពាត់ និងដៃម្ខាងទៀតកាន់ឧបករណ៍ម្យ៉ាងដែលគេហៅថា (ខែល) ឡើង លើទីលានប្រកួតក្នុងទឹកមុខមុំាទាំ ចិត្តអង់អាចមិនខ្លាចគូរប្រកួតរបស់ខ្លួន មានរំពាត់ផ្តៅក្នុងដៃ វាយសម្រុកមកលើនោះឡើយ ។
កីឡាករទាំង២បានបំពាក់កណ្តឹងនៅលើចង្កេះ តាមប្រពៃណីឱនយករំពាត់ និងខែល រំឭកគុណគ្រូ បន្ទាប់មកសំឡេងស្គរបានបន្លឺឡើង ហើយបុរសម្នាក់ចាប់ផ្តើមច្រៀងតាមចង្វាក់ ជាភាសាគួយ រៀបរាប់ត្អូញត្អែពីព្រៃភ្នំគ្រាំថ្មជ្រលងដងអូរ ដើម្បីដាស់សតិអ្នកវាយ និងអ្នកទស្សនាឱ្យមានភាពរន្ធត់តក់ស្លត់ ។
សំឡេងហ៊ូកញ្ជ្រៀវរបស់មហាជនទស្សនាជុំវិញទីលាន គឺជាការផ្តល់កម្លាំងចិត្តដល់កីឡាករ កំពុងប្រកួតយ៉ាងស្វិតស្វាញលើសង្វៀនគ្មានការរាថយ ដែលម្នាក់ៗមានរំពាត់ផ្តៅសឹងនៅក្នុងដៃវាយទៅលើគូរប្រកួត ឮសូរផាច់ៗៗ ញាក់សាច់ដល់អ្នកមើល ។
បុរសវ័យចំណាស់ម្នាក់អាយុ៧៣ឆ្នាំ ជាជនជាតិដើមភាតិចកួយ ពាក់វែនតាខ្មៅ អាវផ្ទៃមេឃដៃវែង អង្គុយទះស្គរតាមទំនៀមទំលាប់បានរៀបរាប់ថា ល្បែងវាយខែល គឺជាល្បែងរបស់បងប្អូនជនជាតិដើមកួយ កាលពីសម័យមុន នៅពេលប្រកួតវាយខែលម្តងៗ មានលក្ខណៈខ្លាំងក្លាណាស់ មានគូរខ្លះដួលសន្លប់នៅនឹងកន្លែង គូរខ្លះស្លាប់ក៏មាន ដើម្បីដំឡើងឫទ្ធានុភាព តែនាសម័យនេះគ្រាន់តែការសម្តែងដើម្បីគម្រប់កិច្ចប៉ុណ្ណោះ ។
នៅពេលបុណ្យព្រះគោរៀងរាប់ឆ្នាំ តែងមានការប្រកួតសិល្បៈវាយខែលនេះ មិនអាក់ខានឡើយ ហើយមានកីឡាករជនជាតិកួយ មកពីខេត្តព្រះវិហារ និងខេត្តស្ទឹងត្រែង ជុំគ្នានៅទីលានក្បែរប្រាសាទព្រះគោ និងមានគណៈកម្មការរៀបចំ ការប្រកួតល្បែងនេះទៅតាមប្រពៃណីទំនៀមទំលាប់របស់ជនជាតិភាគតិចកួយ ដោយមិនដឹងថា ល្បែងនេះកើតឡើងដំណាលការសង់ប្រសាទព្រះគោនេះដែរឬទេ ។
បុរសវ័យចំណាស់ដដែលបានឱ្យដឹងទៀតថា ល្បែងវាយខែល ប្រារព្ធឡើងក្នុងពិធីបុណ្យព្រះគោ ដែលអ្នកវាយម្នាក់ៗត្រូវមានខែល ធ្វើឡើងពីស្លឹកភ្ជល់លាបជ័រទឹក ឯរំពាត់វាយធ្វើឡើងពីផ្តៅមានប្រវែង១ម៉ែត្រកន្លះ ។
មុនពេលវាយមានគេលេងភ្លេងសំពះគ្រូ ដោយកីឡាករម្នាក់ៗត្រូវសូត្រមន្តអាគមន៍គាថា រួចផឹកស្រាវ៉ៃមិនឈឺ ផ្សំដោយប្រទាល២ប្រភេទលាយជាមួយស្រាគឺ ត្រោកសាញ ជួយមិនឱ្យបែកសាច់ និងប្រទាលគីង្គក់ជួយមិនឱ្យឈឺចាប់ បើនរណាអាចវាយដៃគូឱ្យបែកឈាមគេគិតថា អ្នកវាយនោះមានបុណ្យសំណាងណាស់ ។
ពិធីបុណ្យប្រាសាទ ប្រារព្ធឡើងតាមលក្ខណៈប្រពៃណីវប្បធម៌បែបព្រះពុទ្ធសាសនា និងព្រហ្មសាសនា ក្នុងកំឡុងពេល៣ថ្ងៃ ដែលពីមុនគេធ្វើក្នុងខែផល្គុន តែដោយសារប្រជាពលរដ្ឋមានភាពមមាញឹក និងការងារស្រែចំការ មិនសូវមានអ្នកចូលរួមក្នុងពិធី ទើបមានការមូលមតិគ្នាលើកយកខែចែត្រ ជាថ្ងៃបុណ្យព្រះគោវិញ ម្យ៉ាងទៀតពិធីបុណ្យព្រះគោនេះ ធ្វើនៅក្នុងខែចែត្រ ក៏ពិតមែនតែមិនឱ្យផុតពិធីបុណ្យចូលឆ្នាំប្រពៃណីខ្មែរនោះទេ ។ ដែលនៅឆ្នាំនេះ ប្រារព្ធឡើងរយៈ៣ថ្ងៃ គឺនៅថ្ងៃ៧កើត ដល់ថ្ងៃ៩កើត ខែចេត្រ ឆ្នាំរកា នព្វស័ក ព.ស២៥៦១ ថ្ងៃទី២៣ ដល់ថ្ងៃទី២៥ ខែមីនា ឆ្នាំ២០១៨ ។
បុណ្យប្រាសាទព្រះគោ មានប្រារព្ធល្បែងវាយខែល ក្នុងន័យរំឭកគុណដល់បុព្វបុរសខ្មែរ ពីសម័យដើមដែលមានកម្លាំងវេទមន្តយុទ្ធសិល្ប៍ យុទ្ធសាស្ត្រយ៉ាងពូកែក្នុងការធ្វើចម្បាំងប្រឆាំង និងសត្រូវឈ្លានពាន ។ ចំពោះថ្ងៃដែលត្រូវធ្វបុណ្យគឺសម្រេចដោយចៅអធិការវត្ត បើអាក់ខានក្នងពិធីនេះ ប្រជាជនមានជំនឿថា អាចនឹងគ្រោះទុរិ្ភក្ស ឬគ្រោះរាំងស្ងួត និងជំងឺដង្កាត់ពេញភូមិមិនខាន ៕
ចែករំលែកព័តមាននេះ