ពលរដ្ឋផ្ទុះការតវ៉ា ពេលអាជ្ញាធរចុះរុះរើទីលំនៅដ្ឋាន
- ភ្នំពេញ
រាជធានីភ្នំពេញ ៖ ប្រជាពលរដ្ឋប្រមាណជាង ៣០នាក់ មាន ៦គ្រួសាររស់នៅអាស្រ័យផលនៅតាមបណ្ដោយផ្លូវ ១៥១ សង្កាត់ពញាពន់ បានផ្ទុះការតវ៉ា រារាំងអាជ្ញាធរខណ្ឌព្រែកព្នៅ…
រាជធានីភ្នំពេញ ៖ ប្រជាពលរដ្ឋប្រមាណជាង ៣០នាក់ មាន ៦គ្រួសាររស់នៅអាស្រ័យផលនៅតាមបណ្ដោយផ្លូវ ១៥១ សង្កាត់ពញាពន់ បានផ្ទុះការតវ៉ា រារាំងអាជ្ញាធរខណ្ឌព្រែកព្នៅ ដែលបានអនុវត្តវិធានការរដ្ឋបាលចុះរុះរើផ្ទះរបស់ពួកគាត់មុនថ្ងៃផុតឱសានវាទ និងមិនទាន់មានដំណោះស្រាយរកទីជម្រកឲ្យពួកគាត់បានសមរម្យ ។ ការតវ៉ានេះបានផ្ទុះឡើងកាលពីវេលាព្រឹកថ្ងៃទី ៣០ ខែតុលា ឆ្នាំ២០២៥ ដោយប្រជាពលរដ្ឋបាននាំគ្នារារាំងអាជ្ញាធរដែលដឹកនាំដោយលោក វណ្ណាលីន សច្ចនា អភិបាលរងដែលបានដឹកនាំកម្លាំង ចុះអនុវត្តវិធានការរដ្ឋបាល ។
តាមប្រជាពលរដ្ឋបានឲ្យដឹងថា ពួកគាត់ចំនួន ៦គ្រួសារបានមកទិញដីរស់នៅចំណុចទ្វារទឹកទី ២ តាមបណ្តោយផ្លូវលេខ ១៥១ ស្ថិតក្នុងសង្កាត់ពញាពន់ ខណ្ឌព្រែកព្នៅតាំងពីឆ្នាំ ១៩៩៤ ដោយមានអាជ្ញាធរឃុំដឹងឮតាំងពីនៅក្នុងភូមិសាស្ត្រស្រុកពញាឮមិនទាន់កាត់ចូលរាជធានីភ្នំពេញនៅឡើយ ។នៅពេលថ្មីៗនេះអាជ្ញាធរ ខណ្ឌព្រែកព្នៅចុះទៅណែនាំ និងជូនដំណឹងឲ្យរុះរើចេញដោយទុករយៈពេលត្រឹមថ្ងៃទី ៣១ ខែតុលាឆ្នាំ ២០២៥ ស្រាប់តែអាជ្ញាធរបានប្រើកម្លាំងចុះរុះរើសមុនថ្ងៃផុតឱសានវាទ ។
ប្រជាពលរដ្ឋបានឲ្យដឹងទៀតថា ពួកគាត់មិនជំទាស់និងអាជ្ញាធរអភិវឌ្ឍនោះទេតែសុំឱ្យអាជ្ញាធរដោះស្រាយរកទីជម្រកសងឲ្យគាត់បានសមរម្យដូចប្រជាពលរដ្ឋជាង ១០០គ្រួសាររស់នៅតាមបណ្ដោយផ្លូវលេខ ១៥១ នេះដែរ ។ បន្ទាប់ពីមានការតវ៉ារារាំងអាជ្ញាធរក៏បានផ្អាកសកម្មភាពនិងបានណែនាំឲ្យប្រជាពលរដ្ឋទៅសាលាខណ្ឌដើម្បីដោះស្រាយ ។
តាមសេចក្តីជួនដំណឹងរបស់រដ្ឋបាលខណ្ឌព្រែកព្នៅ សូមគោរពជម្រាបជូនសាធារណៈជន ពិសេសបងប្អូនដែលកំពុងអាស្រ័យផលតាំងទីលំនៅលើដីចំណីផ្លូវ ជាដីសាធារណៈរបស់រដ្ឋ ស្ថិតនៅចំណុចទ្វារទឹកទី ២ តាមបណ្តោយផ្លូវលេខ ១៥១ សង្កាត់ពញាពន់ ខណ្ឌព្រែកព្នៅ មេត្តាជ្រាបថា រដ្ឋបាលខណ្ឌ មានគម្រោងស្ថាបនាផ្លូវតភ្ជាប់ពីមហាវិថីឈ្នះឈ្នះ មកកាន់ផ្លូវលេខ ១៥១ ដើម្បីរំដោះការកកស្ទះចរាចរណ៍ និងសម្រួលដល់ការធ្វើដំណើរ-ដឹកជញ្ជូនទំនិញផ្សេងៗរបស់ប្រជាជនទូទៅឱ្យកាន់តែឆាប់រហ័ស និងមានភាពងាយស្រួលជាងមុខ ។ កន្លងមក រដ្ឋបាលខណ្ឌ ធ្លាប់បានការដោះស្រាយគោលនយោបាយរួចហើយជូនដល់អ្នកអាស្រ័យផលតាំងទីលំនៅនៅចំណុចនេះ ប៉ុន្តែបងប្អូនខ្លះមិនទាន់ ចាកចេញ ដោយស្នើសុំរស់នៅជាបណ្តោះអាសន្នរហូតមកដល់បច្ចុប្បន្ននេះ ។
នៅក្នុងសេចក្តីជូនដំណឹងអាជ្ញាធរក៏បានណែនាំដល់ប្រជាពលរដ្ឋធ្វើការរុះរើសំណង់ផ្សេងៗចេញពីដីរបស់រដ្ឋ ដើម្បីផ្តល់ទីតាំងសម្រាប់ការស្ថាបនាផ្លូវទុកជាប្រយោជន៍សាធារណៈ សម្រាប់យើងទាំងអស់គ្នា ដោយទុករយៈពេលរហូតដល់ថ្ងៃទី ៣១ ខែតុលា ឆ្នាំ ២០២៥ ។ បើហួសរយៈពេលកំណត់នេះរដ្ឋបាលខណ្ឌ នឹងអនុវត្តវិធានការរដ្ឋបាលចុះរុះរើដោយមិនទទួលខុសត្រូវលើការខូចខាតទ្រព្យសម្បត្តិរបស់បងប្អូនឡើយ ។
លោក ធឹម សំអាន អភិបាលខណ្ឌព្រែកព្នៅ បានឲ្យដឹងថា ប្រជាពលរដ្ឋចំនួន ៦ គ្រួសារបានមករស់នៅធ្វើរោងសុំស្នាក់នៅតាមដងផ្លូវ ដើម្បីនេសាទ ។ កន្លងមកអាជ្ញាធរបានធ្វើការដោះស្រាយជាលុយកាក់ជូនពួកគាត់រួចរាល់ តែពួកគាត់ពុំព្រមរុះរើទើបអាជ្ញាធរអនុវត្តវិធានការរដ្ឋបាល ។ លោកអភិបាលក៏បានបញ្ជាក់ថា ការចុះរុះរើមុនថ្ងៃឱសានវាទនេះ គឺរុះរើតែរោងពុំមានមនុស្សស្នាក់នៅតែប៉ុណ្ណោះហើយប្រជាពលរដ្ឋផ្ទុះការតវ៉ាតែម្តង ៕
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ។
ចែករំលែកព័តមាននេះ