វិស័យស្រូវអង្ករ គឺជាផ្នែកដ៏សំខាន់មួយនៃសេដ្ឋកិច្ចកម្ពុជា ហើយវិស័យនេះនឹងកាន់តែរីកធំ និងមានតម្លៃបន្ថែមទៀត បើសិនជាយើងមានយុទ្ធសាស្ត្រកាន់តែទូលាយនៅក្នុងការបង្កើនតម្លៃបន្ថែមចេញពីវិស័យនេះ ។ ឧកញ៉ា សុង សារ៉ន អគ្គនាយកក្រុមហ៊ុន…
វិស័យស្រូវអង្ករ គឺជាផ្នែកដ៏សំខាន់មួយនៃសេដ្ឋកិច្ចកម្ពុជា ហើយវិស័យនេះនឹងកាន់តែរីកធំ និងមានតម្លៃបន្ថែមទៀត បើសិនជាយើងមានយុទ្ធសាស្ត្រកាន់តែទូលាយនៅក្នុងការបង្កើនតម្លៃបន្ថែមចេញពីវិស័យនេះ ។
ឧកញ៉ា សុង សារ៉ន អគ្គនាយកក្រុមហ៊ុន អេមរុរ៉ាយស៍ បានលើកឡើងថា វិស័យស្រូវអង្ករកម្ពុជានៅមានសក្តានុពលច្រើនជាងការនាំចេញស្រូវ និងអង្ករដែលយើងកំពុងតែធ្វើ ប្រសិនបើមានគម្រោង វិនិយោគត្រឹមត្រូវ ។
អ្នកជំនាញនៅក្នុងវិស័យស្រូវអង្ករដែលកំពុងតែនាំចេញអង្ករទៅកាន់ទីផ្សារក្រៅប្រទេសរូបនេះ បានចែករំលែកនៅលើបណ្តាញសង្គម កាលពីថ្ងៃទី២៩ ខែតុលា ឆ្នាំ២០២៥ថា ក្រៅពីការនាំចេញស្រូវ និងអង្ករទៅក្រៅ កម្ពុជានៅអាចទាញសក្តានុពលពីវិស័យនេះ ដល់ទៅប្រមាណជាជាង១០គម្រោងផ្សេងៗដែលសុទ្ធតែជាតម្លៃបន្ថែមពីឧស្សាហកម្មស្រូវអង្ករនៅក្នុងស្រុក ។
លោកបានលើកឡើងថា ការលើកកម្ពស់ការកែច្នៃផលិតផលស្រូវអង្ករ គឺជាចំណុចស្នូលសម្រាប់បង្កើនតម្លៃបន្ថែម និងជំរុញកំណើនសេដ្ឋកិច្ចកសិកម្មជាតិ ឲ្យមានសក្តានុពលខ្ពស់ជាងមុនសម្រាប់កម្ពុជា ។
លោកបានបញ្ជាក់ថា ដើម្បីលើកកម្ពស់តម្លៃបន្ថែមនៅក្នុងការជំរុញកំណើនសេដ្ឋកិច្វកសិកម្មទាំងមូលពីការផលិតដល់ទីផ្សារ កម្ពុជាគួរមានសួនឧស្យាហកម្មដែលមានរោងចក្រសំខាន់ៗមួយចំនួន ។
លោកបានបន្តថា នៅក្នុងសួនឧស្សាហកម្មស្រូវអង្ករនោះ គួរមានដូចជា គម្រោងអភិវឌ្ឍន៍ពូជ និងផលិតពូជស្រូវ, រោងចក្រសម្ងួតស្រូវ, រោងម៉ាស៊ីនកិនស្រូវ, រោងចក្រកែច្នៃវិចខ្ចប់អង្ករ, រោងចក្រអង្កាមកែច្នៃអុសអង្កាម, ឧបករណ៍សម្រាប់នោម, ថាមពលសំរាប់ស្ទីម, ជីសរីរាង្គ, រោងចក្រកែច្នៃកន្ទក់សំរាប់ធ្វើអាហាររបស់មនុស្ស, រោងចក្រកែច្នៃម្សៅអង្ករសម្រាប់អាហារកុមារ និងគ្រឿងទេសសម្រាប់អាហារ, រោងចក្រផលិតគុយទាវ, រោងចក្រផលិតបាយ, រោងចក្រផលិតអាហារពេលព្រឹកផលិតពីអង្ករឬពោត, រោងចក្រផលិតនំអង្ករ ។ល។
អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុងរយៈពេល៩ខែ ការនាំចេញកសិផលទៅក្រៅប្រទេសមានបរិមាណសរុបជាង១១លាន តោន ក្នុងនោះផលិតផលដំណាំក្រៅពីស្រូវ-អង្ករចំនួន ៥,២៨លាន ទៅកាន់៨៨ប្រទេស កើនឡើង ៣០,៤៣% ធៀបនឹងរយៈពេលដូចគ្នានៅឆ្នាំ ២០២៤ ។
ប្រភពដដែលបង្ហាញថា នៅក្នុងអំឡុងពេលនោះការនាំចេញស្រូវមានតម្លៃ១,០៥ ពាន់លានដុល្លារ និងអង្ករមានតម្លៃជាង៤៥៥ លានដុល្លារ ៕
ចែករំលែកព័តមាននេះ