មកសៀមរាបដឹងតែចំណេញ ! ទស្សនាប្រណាំងទូក ប្រដាល់គុនខ្មែរ ល្ខោនបាសាក់ និងពិធីបណ្តែតប្រទីប ក្នុងពេលតែមួយ!
- សៀមរាប
ខេត្តសៀមរាប ៖ មោទកភាពយុវជនខ្មែរ! ទូកប្រណាំងមិត្តភាព ២៦គ្រឿង ត្រៀមបញ្ចេញសមត្ថភាព នៅស្ទឹងសៀមរាប ក្នុងបុណ្យអុំទូក ២០២៥។ រដ្ឋបាលខេត្តសៀមរាប…
ខេត្តសៀមរាប ៖ មោទកភាពយុវជនខ្មែរ! ទូកប្រណាំងមិត្តភាព ២៦គ្រឿង ត្រៀមបញ្ចេញសមត្ថភាព នៅស្ទឹងសៀមរាប ក្នុងបុណ្យអុំទូក ២០២៥។ រដ្ឋបាលខេត្តសៀមរាប បានប្រកាសពីការរៀបចំកម្មវិធីដ៏គួរឲ្យចាប់អារម្មណ៍មួយ គឺ«ផ្សារទឹក និងជិះទូកកម្សាន្ត» អមដោយការប្រកួតទូកប្រណាំងលក្ខណៈមិត្តភាពចំនួន២៦ គ្រឿង តាមដងស្ទឹងសៀមរាប ។ ព្រឹត្តិការណ៍នេះធ្វើឡើង ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក សម្រាប់ឆ្នាំ២០២៥ ។ នេះបើយោងតាមផេកមន្ទីរព័ត៌មានខេត្តសៀមរាប បានប្រកាសនារសៀលថ្ងៃទី៣០ ខែតុលានេះ ។
ក្នុងកិច្ចប្រជុំគណៈកម្មការបច្ចេកទេសរៀបចំការប្រណាំងទូកមិត្តភាព សៀមរាបផ្ទះខ្ញុំ នៅថ្ងៃទី៣០ ខែតុលា ឆ្នាំ២០២៥នេះ ឯកឧត្តម គុជ លីណា ប្រធានគណៈកម្មការបច្ចេកទេស មានប្រសាសន៍ថា កម្មវិធីប្រណាំងទូកមិត្តភាពនេះ គឺជាផ្នែកមួយដ៏សំខាន់នៃព្រឹត្តិការណ៍ទាំងមូល ដែលត្រូវបានរៀបចំឡើងដើម្បីជំរុញការចូលរួមរបស់យុវជនក្នុងសកម្មភាពសង្គម និងការលើកស្ទួយកីឡាប្រពៃណីខ្មែរ ។
សម្រាប់ការប្រណាំងទូកមិត្តភាពមិនត្រឹមតែជាការកម្សាន្តបែបវប្បធម៌ប៉ុណ្ណោះទេ តែថែមទាំងជាវេទិកាដ៏សំខាន់សម្រាប់យុវជនបង្ហាញសមត្ថភាព កម្លាំង និងស្មារតីក្លាហាន ពង្រឹងការងារជាក្រុម ធ្វើឱ្យសហគមន៍កាន់តែរឹងមាំ និងមានអត្តសញ្ញាណជាតិខ្លាំងក្លា ។
ឯកឧត្តមបានបន្ថែមថា ព្រឹត្តិការណ៍នេះក៏នឹងជួយកសាងទំនាក់ទំនងដ៏រឹងមាំរវាងយុវជនគ្រប់ភូមិ សង្កាត់ និងស្រុក នៅក្នុងខេត្តសៀមរាប តាមរយៈការលើកស្ទួយស្មារតីស្រឡាញ់ប្រទេសជាតិ និងការថែរក្សាប្រពៃណីខ្មែរ ។ ការចូលរួមរបស់យុវជន គឺជាកម្លាំងដ៏សំខាន់ក្នុងការជ្រៀតចូលកាត់បន្ថយអំពើអាក្រក់ បង្កើនការយល់ចិត្តរវាងគ្នា និងជំរុញភាពជាឯកភាពក្នុងសង្គម ។ ការណ៍នេះនឹងជួយជំរុញឱ្យខេត្តសៀមរាប ក្លាយជាទីក្រុងវប្បធម៌ និងទេសចរណ៍ដែលមានអត្តសញ្ញាណពិសេសលើឆាកពិភពលោក ។
សូមបញ្ជាក់ថា ក្រៅពីកម្មវិធីប្រណាំងទូកមិត្តភាពសៀមរាប-ផ្ទះខ្ញុំ ដើម្បីអបអរសាទរព្រះរាជពិធីបុណ្យអុំទូក រដ្ឋបាលខេត្តក៏មានកម្មវិធីជាច្រើនទៀត ដូចជា៖ កម្មវិធីជិះទូកកម្សាន្ត និងប្រណាំងក្រឡោ កម្មវិធីប្រគំតន្ត្រីស្គរដៃ, កម្មវិធីស្ដង់ពិព័រណ៍ និងម្ហូបអាហារ, ផ្សារបណ្ដែតទឹក និងStreet Food, កម្មវិធីប្រដាល់គុនខ្មែរ និងល្ខោនបាសាក់ និងពិធីបណ្ដែតប្រទីប សំពះព្រះខែ និងអកអំបុកជាដើម ៕
ចែករំលែកព័តមាននេះ