រាជធានីភ្នំពេញ ៖ នៅពេលបច្ចេកវិទ្យាកាន់តែរីកចម្រើន ការប្រើប្រាស់ទូរស័ព្ទសម្រាប់ធ្វើការទំនាក់ទំនងនៅក្នុងសង្គមកាន់តែសម្បូរបែប មិនថាមនុស្សចាស់ ឬពេញវ័យទេ សូម្បីតែកុមារតូចៗក៏មានទូរស័ព្ទផ្ទាល់ខ្លួនប្រើដែរ បើទោះជាពួកគេស្ថិតក្នុងវិស័យសិក្សាក្តី ។ តើការប្រើប្រាស់ទូរស័ព្ទស្ថិតក្នុងវ័យកុមារបែបនេះ វាជះឥទ្ធិពល ឬចំណេញអ្វីខ្លះដល់ការរៀនសូត្ររបស់ពួកគេ ?
អ្នកស្រី ឈួន បុប្ផា អ្នកបោសសម្អាតនៅមន្ទីរពេទ្យកាល់ម៉ែត បាននិយាយថា ការដែលឪពុកម្តាយទិញទូរស័ព្ទស្មាតហ្វូនតម្លៃសមរម្យឱ្យកូនៗប្រើប្រាស់ទាំងនៅវ័យក្មេង និងកំពុងសិក្សា សម័យនេះ គឺគ្មានអ្វីខុសប្លែកគ្នានឹងមនុស្សពេញវ័យប្រើប្រាស់ទូរស័ព្ទទេ ឱ្យតែឪពុកម្តាយចេះណែនាំពួកគេ ។
អ្នកស្រីនិយាយថា ៖« ការឱ្យកុមារស្ថិតក្នុងវ័យតូចៗ (ថ្នាក់ទី៤) មានទូរស័ព្ទប្រើដូចមនុស្សពេញវ័យ ដូចជាអត់មានអី្វខុសប្លែកទេ ពេលខ្លះ វាមានម៉ោងមើល និងម៉ោងរៀន ។ សំខាន់យើងត្រូវចេះណែនាំកុំឱ្យពួកគេមើលច្រើនពេក គឺត្រូវធ្វើកិច្ចការសាលារួចរាល់សិន ចាំឲ្យមើល ។ បើយើងហាមឃាត់ពេក ក៏មិនកើតដែរ ពេលខ្លះ ពួកគេលេងទូរស័ព្ទអាចឆ្លាត ឬទទួលចំណេះដឹងផ្សេងៗបាន » ។
តាមអ្នកស្រី ឈួន បុប្ផា ការឱ្យកូនប្រើប្រាស់ទូរស័ព្ទស្មាតហ្វូនស្ថិតក្នុងវ័យសិក្សានេះ ពេលខ្លះក្មេងកត់មេរៀនមិនទាន់ គឺអាចយកទូរស័ព្ទថតទុក ដើម្បីចម្លងចូលក្នុងសៀវភៅមេរៀនពេលទៅផ្ទះវិញបាន ហើយក្មេងៗសម័យនេះ មានភាពវៃឆ្លាតខុសពីក្មេងសម័យមុន របស់ខ្លះមិនចាំបាច់ប្រាប់ ក៏ពួកគេចេះលេងដែរ ។
អ្នកស្រីបន្តថា ៖« មកដល់ពេលនេះហើយ គួរឱ្យក្មេងៗប្រើទូរស័ព្ទ បើពួកគេចង់ដឹងរឿងផ្សេងៗអាចស្រាវជ្រាវបាន មិនមែនដឹងតែនៅត្រឹមសាលារៀនទេ គឺពួកគេអាចលូតលាស់ច្រើនជាងនេះបន្ថែមទៀត » ។
បើតាមគ្រូបង្រៀនថ្នាក់ទី៥ នៅសាលាបឋមសិក្សាកុលាបទី១ យល់ឃើញស្រដៀងគ្នាថា វាមិនប៉ះពាល់ដល់ការសិក្សាទេ បើដល់ម៉ោងរៀន លោកគ្រូ អ្នកគ្រូត្រូវប្រមូលទូរស័ព្ទទុក ។
លោក ឈិត សុវណ្ណារ៉េត គ្រូបង្រៀនរូបនេះ ឱ្យដឹងថា ៖« ខ្ញុំគិតថា វាមិនប៉ះពាល់ដល់ការរៀនសូត្រទេ ព្រោះនៅម៉ោងសិក្សា លោកគ្រូ អ្នកគ្រូបានប្រមូលទូរស័ព្ទរបស់សិស្សទុកក្នុងទូមួយ ចាំដល់ពេលឪពុកម្តាយពួកគេទាក់ទងមក ទើបឱ្យយកទៅប្រើប្រាស់ ហើយនៅពេលប្រើរួច ឱ្យគាត់យកទុកក្នុងទូវិញ ។ ការធ្វើបែបនេះ ចៀសវាងកុំកូនសិស្សឆ្លៀតលេងហ្គេមក្នុងម៉ោងសិក្សា » ។
លោកបន្តថា ៖« ការឱ្យកុមារប្រើប្រាស់ទូរស័ព្ទស្ថិតក្នុងវ័យតូចៗ វាមានអត្ថប្រយោជន៍ ខ្លះដែរ ដូចជា បើសរសេរមេរៀនអត់ទាន់ ពួកគេអាចថតទុក ចាំត្រឡប់ដល់ផ្ទះវិញ ចាំចម្លងចូលក្នុងសៀវភៅ ។ លើសពីនេះ ពួកគេក៏អាចរកមើលពាក្យនៅក្នុងវចនានុក្រមសម្តេចសង្ឃ ជួន ណាត ផងដែរ ។ ខ្ញុំគិតថា វាមានគុណសម្បត្តិធំជាងគុណវិបត្តិ ពួកគេអាចមើលឃើញព័ត៌មានជាច្រើនកើតឡើងនៅក្នុងសង្គមសព្វថ្ងៃ។ ខ្ញុំយល់ថា គួរតែឲ្យពួកគេប្រើប្រាស់ តែប្រើនៅក្នុងលក្ខខណ្ឌរៀនសូត្រ » ។
ស្របពេលបច្ចេកវិទ្យារីកចម្រើនដូចសព្វថ្ងៃនេះ លោកគ្រូថា ៖« ក្នុងមួយថ្នាក់ កូនសិស្សតូចៗនៅក្នុងសាលា គឺមានទូរស័ព្ទស្មាតហ្វូន៤ឬ៥នាក់ ក្រៅពីនេះ កូនសិស្សប្រើទូរស័ព្ទធម្មតាអិនចុចពិល សម្រាប់ទាក់ទងទៅមាតាបិតារបស់ពួកគេ » ៕
ចែករំលែកព័តមាននេះ