ការស្រាវជ្រាវថ្មីបានបង្ហាញថា ការចំណាយពេលច្រើនម៉ោង ក្នុងការអង្គុយមើលទូរទស្សន៍អាចធ្វើឲ្យយើងមានអារម្មណ៍ល្អបាន ប៉ុន្តែវានឹងមិនល្អវិញ សម្រាប់សរសៃឈាមឡើយ ។ ការសិក្សាបានរកឃើញថា អ្នកដែលចំណាយពេលវេលាច្រើនពេកនៅមុខទូរទស្សន៍ គឺប្រឈមកាន់តែខ្ពស់នឹងការកកឈាមក្នុងសរសៃវ៉ែនរបស់ពួកគេ ឬហៅថា Venous Thromboembolism (VTE) ។
វាគឺជាកំណកឈាមដែលច្រើនតែកើតឡើងនៅក្នុងជើង ហើយក៏អាចរបេះចេញ ព្រមទាំងអណ្តែតទៅសួត បង្កជាជំងឺធ្ងន់មួយប្រភេទដែលអាចបណ្តាលឲ្យស្លាប់បាន នោះគឺ Pulmonary Embolisms ។ តាមអ្នកស្រាវជ្រាវមកពីសាកលវិទ្យាល័យ Minnesota បានពន្យល់ថា ការអង្គុយរយៈពេលយូរពេក អាចធ្វើឲ្យឈាមទៅជាកកបាន ដោយសារតែរបត់ឈាមធម្មតានៅជើង និងប្រអប់ជើងត្រូវបានរងការប៉ះពាល់ ។
អ្នកដែលមើលទូរទស្សន៍ច្រើន គឺមានការប្រឈមកាន់តែខ្ពស់នឹងការកកឈាមប្រហែល ៧០ភាគរយ ច្រើនជាងអ្នកដែលមិនធ្លាប់មើលទូរទស្សន៍ ។ ការប្រឈមមុខនេះនៅតែខ្ពស់ដដែល ក្រោយពីកត្តាជាច្រើនដូចជា ទម្ងន់ ឬកម្រិតនៃការហាត់ប្រាណត្រូវបានរាប់បញ្ចូលរួច ។
ការស្រាវជ្រាវនេះ ត្រូវបានចុះផ្សាយក្នុងសារព័ត៌មាន Journal of Thrombois and Thrombolysis កាលពីថ្ងៃទី ២១ ខែកុម្ភៈនេះទេ ៕
ចែករំលែកព័តមាននេះ