រាជធានីភ្នំពេញ ៖ នៅទីបំផុត គម្រោងផ្លូវល្បឿនលឿនភ្នំពេញ-ខេត្តព្រះសីហនុ ដែលមហាជនទន្ទឹងរង់ចាំដំណឹងនោះ ពេលនេះត្រូវបានកំណត់កាលបរិច្ឆេទសាងសង់ជាផ្លូវការហើយ ដោយគ្រោងចាប់ផ្ដើមនៅឆ្នាំ២០១៩ និងបញ្ចប់នៅឆ្នាំ២០២៣ ។ នេះបើតាមជំនួបថ្នាក់ដឹកនាំខេត្តព្រះសីហនុ…
រាជធានីភ្នំពេញ ៖ នៅទីបំផុត គម្រោងផ្លូវល្បឿនលឿនភ្នំពេញ-ខេត្តព្រះសីហនុ ដែលមហាជនទន្ទឹងរង់ចាំដំណឹងនោះ ពេលនេះត្រូវបានកំណត់កាលបរិច្ឆេទសាងសង់ជាផ្លូវការហើយ ដោយគ្រោងចាប់ផ្ដើមនៅឆ្នាំ២០១៩ និងបញ្ចប់នៅឆ្នាំ២០២៣ ។ នេះបើតាមជំនួបថ្នាក់ដឹកនាំខេត្តព្រះសីហនុ ជាមួយក្រុមហ៊ុនសាងសង់ ។
ក្នុងកិច្ចប្រជុំនៅសាលាខេត្តព្រះសីហនុ នាព្រឹកថ្ងៃទី១៦ មីនា ម្សិលមិញ លោក យន្ត មីនអភិបាលខេត្ត និងថ្នាក់ដឹកនាំក្រុមហ៊ុន China Road &Bridge Corporation បានកំណត់ពីពេលវេលាជាផ្លូវការក្នុងការចាប់ផ្ដើមសាងសង់ ដោយគ្រោងចំណាយថវិកាសរុបចំនួន១.៧៨២លានដុល្លារអាមេរិក ។
អ្នកនាំពាក្យក្រសួងសាធារណៈការ និងដឹកជញ្ជូន លោកវ៉ា សឹុមសុរិយា បានមានប្រសាសន៍ឲ្យដឹងថា ផ្លូវនេះនឹងសាងសង់ជាពីរគន្លងទៅមក និងមានការរៀបចំរបងអមសងខាងផ្លូវ ដែលមិនអនុញ្ញាត្តឲ្យគោ ក្របី អាចឆ្លងកាត់ផ្លូវនេះបានឡើយ ហើយចំណុចឆ្លងកាត់ផ្លូវនេះក៏មិនមានច្រើនផងដែរ ។ លោកបន្តថា នៅពេលផ្លូវនេះបញ្ចប់ការសាងសង់ នឹងសម្រួលការដឹកជញ្ជូន និងកាត់បន្ថយថ្លៃដើម ព្រមទាំងចំណាយពេលតិចក្នុងការធ្វើដំណើរ ។
លោកបន្តថា ៖« ផ្លូវនេះនឹងសាងសង់អមផ្លូវជាតិលេខ៤ទាំងឆ្វេង និងស្តាំ ស្របតាមសណ្ឋាននៃការរៀបចំសម្រាប់ផ្លូវល្បឿនលឿននេះ »។ លោកបន្តថា ៖« រាជរដ្ឋាភិបាលត្រូវការវិនិយោគកាន់តែច្រើនលើវិស័យហេដ្ឋារចនាសម្ព័ន្ធ ដើម្បីជំរុញកំណើនសេដ្ឋកិច្ច»។
បើតាមអគ្គនាយកបច្ចេកទេសនៃក្រសួងសាធារណការ និងដឹកជញ្ជូន លោក នូ វឌ្ឍនៈ បានឲ្យដឹងកាលពីពេលថ្មីៗនេះថា គម្រោងផ្លូវល្បឿនលឿននេះមានប្រវែង១៩០,៦៣គីឡូម៉ែត្រ មានទំហំទទឹង២៤ម៉ែត្រ ជាផ្លូវ៤គន្លង ក្រាលកៅស៊ូAC មានសួនច្បារខណ្ឌកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងបាំងសងខាងផ្លូវ និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត ដូចជាស្ពានវែង និងមធ្យមចំនួន៥កន្លែង, ស្ពានខ្លី៣៣កន្លែង, ស្ពានរំលង ឬផ្លោះផ្លូវ៣២១កន្លែង និងមានកន្លែងឈប់សម្រាកចំនួន៣កន្លែង ។
លោកបណ្ឌិត ម៉ី កល្យាណ ប្រធានមជ្ឈមណ្ឌលកម្ពុជាដើម្បីសិក្សាការអភិវឌ្ឍ និងជាទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ដើម្បីអភិវឌ្ឍន៍សេដ្ឋកិច្ចជាតិ និងដើម្បិឲ្យសេដ្ឋកិច្ចកម្ពុជាឈានទៅកាន់ដំណាក់កាលថ្មីមួយ និងរីកចម្រើនជាបន្តទៀត ការវិនិយោគលើវិស័យហេដ្ឋារចនាសម្ព័ន្ឋ ជារឿងចាំបាច់ មិនអាចខ្វះបាន ។
លោកបន្តថា ៖« រាជរដ្ឋាភិបាលកំពុងធ្វើការងារនេះ ហើយខ្ញុំចង់ជំរុញឲ្យរាជរដ្ឋាភិបាលពន្លឿនការវិនិយោគលើផ្លូវ ព្រោះផ្លូវនីមួយៗមិនមែនចំណាយពេលត្រឹមតែ១ខែឬ១ឆ្នាំ បញ្ចប់បានទេ »។
ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រី បានថ្លែងបញ្ជាក់កន្លងមកថា ៖« ផ្លូវល្បឿនលឿននេះ គឺមានសារសំខាន់ខ្លាំងណាស់សម្រាប់កម្ពុជា ក្នុងការជំរុញកំណើនសេដ្ឋកិច្ច ពិសេសគឺភ្ជាប់រវាងប៉ូលសេដ្ឋកិច្ចភ្នំពេញ និងខេត្តព្រះសីហនុ»៕
ចែករំលែកព័តមាននេះ