រាជធានីភ្នំពេញ ៖ ក្រសួងទេសចរណ៍បានចេញសេចក្តីជូនដំណឹងបន្ទាន់មួយ ដោយប្រកាសដល់ភ្ញៀវទេសចរជាតិ និងអន្តរជាតិ រួមទាំងសាធារណជនថា នៅឆ្នាំនេះបាតុភូតព្រះអាទិត្យរះចំកណ្តាលកំពូលប្រាសាទអង្គរវត្ត អាចនឹងកើតឡើងនៅចន្លោះថ្ងៃទី២០ដល់ថ្ងៃទី២២ ខែមីនា ឆ្នាំ២០១៨ ចន្លោះម៉ោង៥ ដល់ម៉ោង៧ព្រឹក ។
ក្រសួងទេសចរណ៍បញ្ជាក់ថា បាតុភូតព្រះអាទិត្យរះចំកណ្តាលកំពូលប្រាសាទអង្គរវត្តកម្ពុជា ( EQUINOX ) កើតឡើងចំនួន២ដងជារៀងរាល់ឆ្នាំ ដោយលើកទី១នៅក្នុងខែមីនា និងលើកទី២នៅក្នុងខែកញ្ញា ។ បាតុភូតព្រះអាទិត្យរះចំកណ្តាលកំពូលប្រាសាទអង្គរវត្តនេះស្តែងឲ្យឃើញពីអច្ឆរិយភាពនៃប្រាសាទអង្គរដែលត្រូវបានបុព្វបុរសខ្មែរយើងកសាងដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិយ៉ាងច្បាស់លាស់គួរឲ្យស្ញប់ស្ញែង ។
ក្រសួងទេសចរណ៍បញ្ជាក់ថា នៅឆ្នាំនេះបាតុភូតព្រះអាទិត្យរះចំកណ្តាលកំពូល ប្រាសាទអង្គរវត្តកម្ពុជាអាចនឹងកើតឡើងនៅចន្លោះថ្ងៃទី២០ដល់ថ្ងៃទី២២ ខែមិនា ឆ្នាំ២០១៨ ចន្លោះម៉ោង៥ដល់ម៉ោង៧ព្រឹក ហើយជារៀងរាល់ឆ្នាំព្រឹត្តិការណ៍ដ៏អស្ចារ្យនេះ តែងតែមានការចូលរួមពីភ្ញៀវទេសចរជាតិ និងអន្តរជាតិទៅរង់ចាំទស្សនា និងផ្តិតយករូបភាពរាប់ម៉ឺននាក់ ។
ទន្ទឹមនោះដើម្បីចូលរួមផ្សព្វផ្សាយព្រឹត្តិការណ៍ដ៏មហស្ចារ្យនេះ ក្រសួងទេសចរណ៍នឹងរៀបចំការប្រកួតប្រជែងថតរូបស៊ែលហ្វី (Angkor Selfie Photo Contest ) លើកទីបី ក្រោមប្រធានបទ ៖ Selfie អង្គរអច្ឆរិយ ដោយជ្រើសរើសរូបថតដែលមានអ្នកគាំទ្រច្រើនជាងគេពីលេខ១ ដល់លេខ៣ ដើម្បីទទួលលិខិតសរសើរចេញដោយក្រសួងទេសចរណ៍។ រង្វាន់លើកទឹកចិត្ត លេខ១ ចំនួន១លានរៀលលេខ២ចំនួន៨០ម៉ឺនរៀល និងលេខ៣ចំនួន៥០ម៉ឺនរៀល ។
ក្រសួងទេសចរណ៍បានអំពាវនាវដល់ភ្ញៀវទេសចរជាតិ-អន្តរជាតិ និងសាធារណជនអញ្ជើញទៅទស្សនា និងផ្តិតយករូបភាពដ៏មហស្ចារ្យនេះ ព្រមទាំងជួយផ្សព្វផ្សាយព្រឹត្តិការណ៍នេះឲ្យបានទូលំទូលាយដើម្បីចូលរួមដល់យុទ្ធនាការ« កម្ពុជា៖ ព្រះរាជាណាចក្រអច្ឆរិយ ប្រកបដោយភាពកក់ក្តៅ »៕
ចែករំលែកព័តមាននេះ