រាជធានីភ្នំពេញ ៖ របកគំហើញថ្មីមួយគឺស្ទីកគ័រភាសាខ្មែរសម្រាប់បកបិទលើក្ដាចុច(Keyboard) កុំព្យូទ័រ ត្រូវបានបង្កើតឡើងដោយវិទ្យាស្ថានបច្ចេកវិទ្យាកម្ពុជា (ITC) សហការជាមួយគ្រឹះស្ថានស្រាវជ្រាវជាតិនៃប្រទេសកូរ៉េ (NRF) ។ ការបង្កើតស្ទីកគ័រនេះឡើងក្នុងគោលបំណងជួយដល់អ្នកប្រើប្រាស់កុំព្យូទ័រក្នុងការវាយអក្សរខ្មែរកាន់តែងាយស្រួល ខណៈបច្ចុប្បន្ន Keyboardដែលប្រើប្រាស់មានតែជាភាសាឡាតាំងប៉ុណ្ណោះ ។
ថ្លែងប្រាប់កោះសន្ដិភាព កាលពីថ្ងៃទី១៣ មីនា នៅវិទ្យាស្ថានបច្ចេកវិទ្យាកម្ពុជា លោកសាស្ត្រាចារ្យ បណ្ឌិត ផាក យ៉ុង គី (PARK YONG KI) ស្ថាបនិកដែលមានគំនិតផ្ដួចផ្ដើមបង្កើតស្ទីកគ័រនេះ បានលើកឡើងថា នេះជារបកគំហើញថ្មីមួយសម្រាប់ប្រជាជនកម្ពុជាលើផ្នែកបច្ចេកវិទ្យា បន្ទាប់ពីលោកបានមើលឃើញពីផលពិបាករបស់អ្នកប្រើប្រាស់កុំព្យូទ័រក្នុងការវាយអក្សរខ្មែរ ។
លោកសាស្ត្រាចារ្យថ្លែងយ៉ាងដូច្នេះ ៖ « ការប្រើ Keyboard ដែលមានតែអក្សរឡាតាំងក្នុងការវាយភាសាជាតិខ្មែរ វាពិតជាពិបាក។ ចំពោះអ្នកដែលអនុវត្តជាប្រចាំ វាមិនបញ្ហាទេ ប៉ុន្ដែក៏មិនងាយស្រួលដែរក្នុងការចាំគ្រប់បែបយ៉ាងនោះ ហើយចំពោះអ្នកដែលទើបនឹងរៀនកុំព្យូទ័រដំបូងៗ វាកាន់តែពិបាកថែមទៀត ដោយពួកគេត្រូវការព្រីនក្ដាចុចជាភាសាខ្មែរដាក់ក្បែរខ្លួន ឬបិទជាប់ជញ្ជាំងដើម្បីរកមើលព្យញ្ជនៈ ឬស្រះ ដែលនេះជារបាំងរាំងស្ទះមួយពីភាពរីកចម្រើនលើវិស័យកុំព្យូទ័រនៅក្នុងសង្គមកម្ពុជា »។
លោកថ្លែងថា ៖« ស្ទីកគ័រនេះ មានការចូលរួមពីនិស្សិតកំពុងសិក្សានៅវិទ្យាស្ថានបច្ចេកវិទ្យាកម្ពុជាជាអ្នករចនាឡើង ដោយខ្ញុំជាអ្នកផ្ដួចផ្ដើមគំនិត និងមានការជួយជ្រោមជ្រែងពីសាស្ត្រាចារ្យខ្មែរមួយចំនួនទៀត ហើយយើងយកទៅបោះពុម្ពនៅប្រទេសកូរ៉េ ដោយឆ្លងកាត់ការធ្វើតេស្ដសាកល្បងច្រើនលើកច្រើនសា ទើបចេញជាផលិតផលសម្រេចនេះ »។
លោកសាស្ត្រាចារ្យបន្ដថា ការប្រើប្រាស់ស្ទីកគ័រភាសាខ្មែរនេះ មិនត្រឹមតែជួយប្រជាជនកម្ពុជាប្រើប្រាស់កុំព្យូទ័របានងាយស្រួលជាងមុននោះទេ ប៉ុន្ដែវាថែមទាំងជួយឲ្យមានការប្រើប្រាស់កុំព្យូទ័រកាន់តែច្រើនសម្រាប់កិច្ចការទូទៅ និងជំនួញនៃកុំព្យូទ័រផងដែរ ។ ដូច្នេះ « ខ្ញុំសង្ឃឹមថា ស្ទីគ័រភាសាខ្មែរសម្រាប់បិទលើKeyboardនេះ នឹងជួយសម្រួលដល់ពួកគាត់ច្រើន ហើយយើងជឿជាក់ថា ពួកគាត់នឹងរីករាយជាមួយរបកឃើញថ្មីនេះ»។
ស្ទីកគ័រនេះមានគុណភាពល្អ មិនហើរពណ៌ ជាប់ធន់បានយូរ បោះពុម្ពដោយបច្ចេកវិទ្យាទំនើបរបស់ប្រទេសកូរ៉េ និងអាចបកបិទបាននៅលើគ្រប់Keyboard ទាំងកុំព្យូទ័រលើតុ (Desktop)និងយូរដៃ (Laptop) ។
លោកសាស្ត្រាចារ្យ ផាក យ៉ុង គី អះអាងថា ៖« បើយើងផលិតមកគ្មានគុណភាព មិនត្រូវតាមស្ដង់ដា ពិបាកប្រើប្រាស់ តើអ្នកណាគេប្រើផលិតផលយើង? ទន្ទឹមនឹងនេះ មុនពេលផលិត យើងបានសិក្សាទៅលើ Keyboardជាង១០០ផ្សេងៗគ្នាដើម្បីឈ្វេងយល់ពីភាពខុសគ្នា ។ ដូច្នេះ ស្ទីកគ័រនេះ អាចបិទលើ Keyboard គ្រប់ប្រភេទទាំងអស់ ទាំងDesktop និងLaptop » ។
លោកសាស្ត្រាចារ្យ ខុន គឹមស្រ៊ន់ បង្រៀននៅវិទ្យាស្ថានITC បានឲ្យដឹងដែរថា ស្ទីកគ័រនេះ ពិតជាមានសារសំខាន់ណាស់សម្រាប់អ្នកដែលទើបនឹងចាប់ផ្ដើមរៀនកុំព្យូទ័រ ពិសេសមន្ត្រីរាជការមួយចំនួនដែលគាត់ទើបនឹងចាប់ផ្តើមទទួលយកបច្ចេកវិទ្យាមកប្រើប្រាស់ដើម្បីបំពេញការងារប្រចាំថ្ងៃ ខណៈប្រមុខរាជរដ្ឋាភិបាលកន្លងមកបានប្រកាសឲ្យមន្ត្រីរាជការទាំងអស់ ត្រូវចេះប្រើប្រាស់ប្រព័ន្ធបច្ចេកវិទ្យាដើម្បីធ្វើការងារ ។
លោកសាស្ត្រាចារ្យថ្លែងថា ៖« ជាធម្មតា នៅពេលចាប់ផ្ដើមវាយអក្សរខ្មែរដំបូង យើងនឹងមើលក្រដាសព្រីនក្ដាចុចអក្សរខ្មែរ ដើម្បីដឹងថា ព្យញ្ជនៈ ឬស្រះណានៅលើគ្រាប់Keyboard មួយណា ព្រោះយើងអត់មានអក្សរខ្មែរនៅលើKeyboardនោះទេ ។ សូម្បីតែខ្ញុំ ពេលខ្លះក៏នឹកមិនឃើញ អីចឹងត្រូវការក្រដាសព្រីនក្ដាចុចជាជំនួយដូចគ្នា ។ ដូច្នេះ នៅពេលយើងមានស្ទីកគ័រសម្រាប់បិទលើKeyboardនេះ វាបង្ហាញអក្សរខ្មែរឲ្យយើងឃើញស្រាប់ អីចឹងវាជួយយើងច្រើន ។ មួយវិញទៀត សម្រាប់យុវជនជំនាន់ក្រោយដែលទើបនឹងចាប់ផ្ដើមសិក្សាកុំព្យូទ័រ ឬពូមីងចាស់ៗ ពិតជាពិបាកមែន ធ្វើឲ្យគាត់មិនមានអារម្មណ៍ប្រើកុំព្យូទ័រ ព្រោះមិនចេះវាយអក្សរខ្មែរ។ ដូច្នេះ ប្រសិនជាពួកគាត់បិទស្ទីកគ័រនេះនៅលើKeyboard ហើយយើងណែនាំតិចតួច គឺគាត់អាចប្រើបានតែម្ដង »។
លោកសាស្ត្រាចារ្យបានសម្ដែងសុទិដ្ឋិនិយមថា ស្ទីកគ័រនេះនឹងទទួលបានការគាំទ្រច្រើនពីប្រជាជនខ្មែរ ព្រោះវាជាជំនួយមួយក្នុងការវាយអក្សរខ្មែរ ពិសេសបុគ្គលិក មន្ត្រីរាជការដែលគាត់ប្រើប្រាស់ភាសាជាតិជាលិខិតស្នាមផ្សេងៗ ។ មួយទៀត ក៏អាចបង្កើនការប្រើប្រាស់ភាសាជាតិឲ្យកាន់តែទូលំទូលាយផងដែរ ខណៈអ្នកខ្លះវាយអក្សរឡាតាំងនៅលើបណ្ដាញសង្គមតែប្រកបជាភាសាខ្មែរ ។
គួរបញ្ជាក់ថា នេះជាគម្រោងមួយដែលមានការគាំទ្រពីគ្រឹះស្ថានស្រាវជ្រាវជាតិនៃប្រទេសកូរ៉េ ក្នុងក្នុងដំណាក់កាលទី១ បានបោះពុម្ពចំនួន១ពាន់សន្លឹកមកចែកចាយដល់លោកគ្រូអ្នកគ្រូ សិស្សនិស្សិតនៅវិទ្យាបច្ចេកវិទ្យាកម្ពុជា និងស្ថាប័នរដ្ឋមួយចំនួនដើម្បីសាកល្បង ហើយនៅចុងខែមីនានេះ នឹងបោះពុម្ពចំនួន៣ពាន់ច្បាប់បន្ថែមទៀត ដើម្បីឲ្យប្រជាជនខ្មែរប្រើប្រាស់កាន់តែច្រើន ។
បើទោះបីជាគម្រោងនេះ មិនមែនជាជំនួញឬអាជីវកម្ម តែអ្នកប្រើប្រាស់ត្រូវចំណាយជាង១ដុល្លារ ដើម្បីទទួលបានស្ទីកគ័រ១សន្លឹក ក៏ដូចជាចូលរួមគាំទ្រដល់គម្រោងនេះឲ្យដំណើរការទៅរលូន និងមាននិរន្ដរភាព ៕
ចែករំលែកព័តមាននេះ