រាជធានីភ្នំពេញ ៖ រាជរដ្ឋាភិបាលនឹងកាន់តែមានលទ្ធភាពចំណាយលើការវិនិយោគសាធារណៈកាន់តែច្រើន ដោយនៅឆ្នាំ២០១៩ខាងមុខនេះ ប្រទេសកម្ពុជានឹងមានវិស័យថ្មីមួយទៀតចូលរួមជាកម្លាំងចលករក្នុងការអភិវឌ្ឍសេដ្ឋកិច្ចជាតិ ។
វិស័យថ្មីនោះ គឺវិស័យរ៉ែ និងថាមពល ដែលកម្ពុជានឹងអាចទាញយកដំណក់ប្រេងលើកដំបូង និងអាចផលិតមាសបានដោយខ្លួនឯងនៅចុងឆ្នាំ២០១៩ ខណៈបច្ចុប្បន្ន វិស័យវាយនភ័ណ្ឌកាត់ដេរនិងស្បែកជើង, វិស័យសំណង់និងអចលនទ្រព្យ, វិស័យទេសចរណ៍ និងវិស័យកសិកម្ម កំពុងឈានមុខក្នុងការជំរុញសេដ្ឋកិច្ចកម្ពុជាឆ្ពោះទៅមុខប្រកបដោយឧត្តមភាព ។
រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានថ្លែងក្នុងពិធីបើកសន្និបាតការងារក្រសួងកាលពីពេលថ្មីៗនេះថា កម្ពុជាដល់ពេលអាចប្រមូលផលពីធនធានរ៉ែរបស់ខ្លួនដើម្បីយកមកអភិវឌ្ឍន៍សេដ្ឋកិច្ចហើយ ជាពិសេស ប្រាក់ចំណូលពន្ធបានមកពីវិស័យរ៉ែ និងថាមពល ក៏បានកើនឡើងយ៉ាងខ្លាំងផងដែរក្នុងរយៈពេលប៉ុន្មានឆ្នាំចុងក្រោយនេះ ។ លោកបន្តថា ជាមួយគ្នានេះ ការចែកចាយបណ្តាញថាមពលអគ្គិសនី ក៏បានកើនឡើងរហូតដល់៨០%នៅគ្រប់បណ្តាភូមិទូទាំងប្រទេសផងដែរ វាគឺជាមោទនភាពរបស់កម្ពុជា។
លោកបន្តថា ៖« ធនធានរ៉ែកម្ពុជាមានភាពសម្បូរបែប ប៉ុន្តែក្រុមហ៊ុនអន្តរជាតិមួយបានរកឃើញរ៉ែមាសក្នុងទ្រង់ទ្រាយធំ ដែលអនុញ្ញាតឲ្យកម្ពុជាអាចផលិតមាសបានដោយខ្លួនឯងនៅឆ្នាំ២០១៩ ខាងមុខនេះ » ។
រាជរដ្ឋាភិបាលកម្ពុជាកាលពីចុងឆ្នាំមុន បានចុះហត្ថលេខាជាមួយក្រុមហ៊ុន KRISENERGY ដើម្បីចាប់ផ្តើមអាជីវកម្មទាញយកប្រេងចេញពីប្លុកAរបស់កម្ពុជា ដែលរំពឹងថា នឹងទទួលបានប្រាក់ចំណូលពីវិស័យប្រេងកាតប្រមាណ៥០០លានដុល្លារក្នុង១ឆ្នាំ ។
បើតាមលោក យស់ មុនីរ៉ាត អ្នកនាំពាក្យក្រសួងរ៉ែ និងថាមពល បានឲ្យដឹងថា ដំណើរការធ្វើអាជីវកម្ម និងទាញយកធនធានប្រេងកាត កំពុងប្រព្រឹត្តទៅដោយរលូន ហើយកម្ពុជារំពឹងថា នឹងទទួលបានដំណក់ប្រេងលើកដំបូងនៅចុងឆ្នាំ២០១៩ ខាងមុខនេះ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា វាជាការល្អប្រសើរណាស់ ដែលកម្ពុជាមានវិស័យថ្មីមួយអាចទាញយកថវិកាចូលជាតិ និងចូលរួមអភិវឌ្ឍន៍សេដ្ឋកិច្ចជាតិ ប៉ុន្តែបញ្ហាប្រឈមរបស់យើង គឺយើងមិនទាន់មានច្បាប់គ្រប់គ្រាន់សម្រាប់គ្រប់គ្រងធនធានទាំងនោះឲ្យមានប្រសិទ្ធភាព និងតម្លាភាពនៅឡើយ ។
លោកបន្តថា ៖« មានការព្រួយបារម្ភពីអ្នកជំនាញខ្លាចកម្ពុជារងបណ្តាសាពីធនធានធម្មជាតិ និងបារម្ភខ្លាចធនធានទាំងនោះមិនបានយកមកប្រើប្រាស់សម្រាប់អភិវឌ្ឍន៍សេដ្ឋកិច្ចជាតិ » ។ លោកបន្តថា ៖« ប្រសិនជាកម្ពុជាកសាងមូលដ្ឋានច្បាប់បានរឹងមាំ និងមានអ្នកជំនាញអន្តរជាតិមកជួយដើម្បីគ្រប់គ្រងធនធានទាំងនោះបាន ពិតជាល្អណាស់សម្រាប់យកធនធានមកអភិវឌ្ឍន៍ប្រទេសរបស់យើង » ៕
ចែករំលែកព័តមាននេះ