រាជធានីភ្នំពេញ ៖ មន្ត្រីជាន់ខ្ពស់ក្រសួងរ៉ែ និងថាមពលបានថ្លែងឲ្យដឹងថា គិតមកដល់ពេលនេះ ទឹកប្រាក់ជាង១.៣០០លានដុល្លារអាមេរិកបានវិនិយោគលើវិស័យរ៉ែ និងប្រេងកាតនៅប្រទេសកម្ពុជា ដែលបានអនុម័តដោយរាជរដ្ឋាភិបាល ។ លោក…
រាជធានីភ្នំពេញ ៖ មន្ត្រីជាន់ខ្ពស់ក្រសួងរ៉ែ និងថាមពលបានថ្លែងឲ្យដឹងថា គិតមកដល់ពេលនេះ ទឹកប្រាក់ជាង១.៣០០លានដុល្លារអាមេរិកបានវិនិយោគលើវិស័យរ៉ែ និងប្រេងកាតនៅប្រទេសកម្ពុជា ដែលបានអនុម័តដោយរាជរដ្ឋាភិបាល ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានលើកឡើងក្នុងសន្និបាតបូកសរុបសមិទ្ធផលនៃការគ្រប់គ្រង និងការអភិវឌ្ឍវិស័យរ៉ែ និងថាមពល ឆ្នាំ២០១៤-២០១៧ និងទិសដៅការងារសម្រាប់ឆ្នាំ២០១៨ នាព្រឹកថ្ងៃទី៦ មីនា ថា ការវិនិយោគរបស់វិនិយោគិនបរទេសលើវិស័យរ៉ែ និងប្រេងកាត ដែលរាជរដ្ឋាភិបាលបានអនុម័តរួចរាល់ ឬត្រៀមអនុ ម័តក្នុងឆ្នាំ២០១៨នេះ មានទំហំទឹកប្រាក់ជាង១.៣០០លានដុល្លារអាមេរិក ។ លោកបន្តថា ទំហំវិនិយោគដ៏ធំក្នុងវិស័យរ៉ែ និងប្រេងកាតនេះ នឹងក្លាយជាប្រភពទុនវិនិយោគដោយផ្ទាល់ដ៏ធំពីក្រៅប្រទេស សម្រាប់ឆ្នាំ២០១៨-២០១៩ ខាងមុខ ។
លោកមានប្រសាសន៍ថា ៖« សម្រាប់ឆ្នាំ២០១៨ និងឆ្នាំបន្ទាប់ៗទៀត គឺជាពេលវេលាដែលរដ្ឋាភិបាលអាចចាប់ផ្ដើមប្រមូលផលពេញលេញពីរាល់ការវិនិយោគរបស់ខ្លួនហើយ » ។
យោងតាមរបាយការណ៍របស់ក្រសួងរ៉ែ និងថាមពលបានបង្ហាញថា ការប្រមូលចំណូលពីធនធានវិស័យរ៉ែ និងប្រេងកាត ជាចំណូលមិនមែនសារពើពន្ធ បានកើនឡើងលើសពី១០ដង ដែលកាលពីឆ្នាំ២០១៣ មានទំហំត្រឹមតែ២-៣លានដុល្លារអាមេរិកប៉ុណ្ណោះ ប៉ុន្តែទំហំចំណូលមិនមែនសារពើពន្ធបានពីវិស័យរ៉ែ និងប្រេងកាត បានកើនឡើងដល់១៧ ទៅ១៨លានដុល្លារអាមេរិក ក្នុងចន្លោះឆ្នាំ២០១៦-២០១៧ ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោក ង៉ែត ជូ បានថ្លែងថា ធនធានរ៉ែ និងចំណូលបានមកពីវិស័យនេះ គឺជាផ្នែកដ៏សំខាន់មួយទៀតរបស់រាជរដ្ឋាភិបាល ដើម្បីយកមកប្រើប្រាស់ក្នុងការអភិវឌ្ឍប្រទេស ប៉ុន្តែទោះជាយ៉ាងណា វាជាវិស័យថ្មីមួយដែលទាមទារឲ្យមានការគ្រប់គ្រងប្រកបដោយប្រសិទ្ធភាព និងតម្លាភាព ដើម្បីចៀសវាងបណ្តាសាពីធនធានធម្មជាតិ ។
លោកបន្តថា ៖« ទោះជាយ៉ាងណា លោកមើលឃើញថា រដ្ឋាភិបាលបាននិងកំពុងខិតខំប្រឹងប្រែងគ្រប់គ្រង និងប្រើប្រាស់ធនធានធម្មជាតិបានកាន់តែល្អប្រសើរសម្រាប់អភិវឌ្ឍន៍ប្រទេសជាតិ » ៕
ចែករំលែកព័តមាននេះ