ខេត្តត្បូងឃ្មុំ ៖ ដើមជ្រៃយក្សមួយដើមធំដែលក្រុមឈ្មួញបានទិញពីប្រជាពលរដ្ឋនៅភូមិជើង ឃុំជាំ ស្រុកមេមត់ ក្នុងតម្លៃ១.០០០ដុល្លារ ហើយបានដឹកតាមរថយន្តបម្រុងនាំចេញទៅ វៀតណាម តែអាចចាត់ទុកជាបារមីពូកែសក្តិសិទ្ធធ្វើឲ្យរថយន្តបាក់ទ្រុងទៅមុខលែងរួច។ ក៏ទម្លាក់ចោលវិញ និងបានបង្កឲ្យមានការភ្ញាក់ផ្អើល ត្រូវបានលោក លី ឡេង អភិបាលនៃគណៈអភិបាលខេត្ត បានបញ្ជាឲ្យសមត្ថកិច្ចគ្រប់លំដាប់ថ្នាក់យាមការពារ ដោយមិនឲ្យឈ្មួញយកទៅណានោះទេ។ បន្ទាប់មកក៏យកមកដាំនៅក្នុងស្នាក់ការគណបក្ស ប្រជាជនកម្ពុជា នៅស្រុកត្បូងឃ្មុំ ស្ថិតនៅឃុំជីរោទិ៍ទី២ ស្រុកត្បូងឃ្មុំ រហូតមកដល់លូតលាស់ចេញស្លឹក។ រសៀលថ្ងៃទី០១ មីនា ២០១៨ មានការលេងភ្លេងពិណពាទ្យ ថ្វាយម្ចាស់ទឹកម្ចាស់ដីដើម្បីសុំសេចក្តីសុខ សម្រាប់ពលរដ្ឋក្នុងខេត្តទាំងមូល។ លោក គឹម ឈុនលី នាយខណ្ឌរដ្ឋបាលព្រៃ ត្បូងឃ្មុំ មានប្រសាសន៍ឲ្យដឹងថា រូបលោកបានដឹកនាំកម្លាំងមន្ត្រីក្រោមឱវាទជាច្រើននាក់ បានយករថយន្តទៅស្ទូចដើមជ្រៃយក្សខាងលើនេះ ដោយស្ទូចមិនបាននោះទេ ដែលគេបានប្លុងចោល នៅឃុំជាំ ស្រុកមេមត់។
ទោះបីជាអ្នកបើកបររថយន្តស្ទូចបានប្រើគ្រប់ពិធីសាស្ត្រយ៉ាងណាក្តី ក៏មិនអាចស្ទូចលើកបានទេ និងបានបែរបន់ថា ប្រសិនបើម្ចាស់ទឹកម្ចាស់ដីឲ្យរូបលោកស្ទូចដើមជ្រៃ យកមកដាំនៅស្រុកត្បូងឃ្មុំបាននោះនឹងលេងភ្លេងពិណពាទ្យថ្វាយ។ លោក គឹម ឈុនលី នាយខណ្ឌរដ្ឋបាលព្រៃឈើត្បូងឃ្មុំ មានប្រសាសន៍បន្តថា រូបលោកបានប្រើរថយន្តស្ទូចមកដឹកដល់ទៅ៤ដង លុះចុងក្រោយទាល់តែប្រើរថយន្តធុនយក្ស មកពីរាជធានីភ្នំពេញ ទើបដឹកបានមកដាំនៅក្នុងបរិវេណ ស្នាក់ការគណបក្សប្រជាជនកម្ពុជា ស្រុកត្បូងឃ្មុំ។ ដោយសារតែមានការថែទាំយ៉ាងដិតដល់របស់មន្ត្រីរដ្ឋបាលព្រៃឈើ បានធ្វើឲ្យដើមជ្រៃយក្សដែល មិនមានស្លឹកសោះនោះបានលូតលាស់ចេញស្លឹកមកព្រោងព្រាត។ ហើយបានធ្វើលិខិតជាលាយលក្ខណ៍អក្សរ១ច្បាប់ ដើម្បីសុំការអនុញ្ញាតពីលោក ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគររូបនីយកម្ម និងសំណង់ ដើម្បីលេងភ្លេងពិណពាទ្យថ្វាយដល់ម្ចាស់ ទឹកម្ចាស់ដី នៅថ្ងៃពេញបូរមី១៥កើត រសៀលថ្ងៃទី០១ មីនា ២០១៨ មានវត្តមានលោក ប៉ាន់ខែម ប៊ុនថន ប្រធានប្រតិបត្តិសម្ព័ន្ធយុវជនស្រលាញ់សន្តិភាព និងលោក ប៉ែន កុសល អភិបាលរងខេត្ត រួមនឹងសការីជាច្រើននាក់ទៀតចូលរួមអុជធូប បួងសួងសុំសេចក្តីសុខសាន្តសម្រាប់ប្រជាពរដ្ឋ នៅក្នុងខេត្ត និងប្រមុខដឹកនាំប្រទេសកម្ពុជាសូមឲ្យជួបតែសេចក្តីសុខសាន្ត និងបន្តដឹកនាំនាវាកម្ពុជាឆ្ពោះទៅរកត្រើយ សន្តិភាពជារៀងរហូត។
លោក ហ៊ឹម ណន អាយុ៦១ឆ្នាំ ជាចាស់ទុំមួយរូបមានប្រសាសន៍ថា រូបលោកកម្រនឹងបានឃើញដើមឈើណាដែលមានទំហំធំដូចខាងលើនេះទេ ហើយបើធំបែបនេះ មានអាយុកាលច្រើនឆ្នាំនឹងមានបារមីកាន់ពូកែសក្តិសិទ្ធ ថ្ងៃក្រោយនឹងមានប្រជាពលរដ្ឋនាំគ្នាមកបែរបន់ និងគោរពបូជា ដើមជ្រៃយក្សនេះត្រូវបានចាត់ទុកជាសម្បត្តិវប្បធម៌ជាដ៏ឧត្តុង្គឧត្តមផងដែរ។ គួររំលឹកថា ដើមជ្រៃនេះនេះបានដុះនៅក្នុងចម្ការដំឡូងរបស់ឈ្មោះ អ៊ុម ស៊ីម ភេទប្រុស អាយុ៧៨ឆ្នាំ រស់នៅភូមិជើង ឃុំជាំ ស្រុកមេមត់ ដែលបានលក់ឲ្យទៅឈ្មួញវៀតណាមនោះ ហើយបើតាមប្រវត្តិវិញដើមជ្រៃនេះដំបូងបានដុះក្នុងដើមស្រឡៅ ដែលមានប្រហោងកណ្តាល ក្រោយមកក៏ចេះតែរីកធំធាត់ដែលមានដើមទំហំប៉ុនខាងលើនេះ។ ដែលត្រូវបានឈ្មួញវៀតណាមចុះមកទិញកាលពីថ្ងៃទី
១៤ តុលា ២០១៧កន្លងទៅនោះ៕
https://youtu.be/Lvv9EEL5TZs
ចែករំលែកព័តមាននេះ