រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជា បានហៅការដាក់ឱសានវាទរបស់ក្រុមប្រឹក្សាសហសភាពអឺរ៉ុបមកលើកម្ពុជាគ្មានប្រសិទ្ធិភាព ព្រោះរំលោភដែនអធិបតេយ្យកម្ពុជា ។
ការលើកឡើងរបស់មន្ត្រីអ្នកនាំពាក្យគណបក្សប្រជាជនកម្ពុជានេះ បន្ទាប់លោក សម រង្ស៊ី អតីតប្រធានគណបក្សសង្គ្រោះជាតិបានអះអាងថា សហភាពអឺរ៉ុបព្រមានដាក់ទណ្ឌកម្មផ្នែកពាណិជ្ជកម្ម (ពិនិត្យឡើងវិញពីការទិញទំនិញពីប្រទេសកម្ពុជា) បើរដ្ឋាភិបាលកម្ពុជា មិនដោះលែង លោក កឹម សុខា មិនឲ្យគណបក្សសង្គ្រោះជាតិដំណើការឡើងវិញ មិនព្រមរៀបចំការបោះឆ្នោតត្រឹមត្រូវ ដោយមានគណបក្សសង្គ្រោះជាតិចូលរួមផងដែរ ហើយមិនព្រមផ្តល់សេរីភាពពេញលេញជូនប្រជារាស្ត្រខ្មែរវិញ ។
លោក សម រង្ស៊ី បានសរសេរលើបណ្តាញសង្គមថា សហភាពអឺរ៉ុប ព្រមានដាក់ទណ្ឌកម្ពុជាផ្នែកពាណិជ្ជកម្មលើកម្ពុជា បើរាជរដ្ឋាភិបាលមិនដោះលែង លោក កឹម សុខា និងមិនឲ្យគណបក្សសង្គ្រោះជាតិ ចូលរួមបោះឆ្នោត ព្រមទាំងផ្តល់សេរីភាពចេញជូនរាស្ត្រខ្មែរវិញ ។
លោកបញ្ជាក់ថា បើសម្តេចតេជោ ហ៊ុន សែន នៅតែកាន់អំណាចបែបនេះទៀត ប្រជាពលរដ្ឋខ្មែរជាច្រើននឹងបាត់បង់ការងារ បាត់បង់ជីវភាពរស់នៅ និងបាត់បង់សិទ្ធិសេរីភាពទាំងអស់ ។ តែបើសម្តេចតេជោ ហ៊ុន សែន ឈប់ចាប់ប្រជារាស្ត្រខ្មែរធ្វើជាចំណាប់ខ្មាំងទៀត ហើយបើគាត់មានភាពថ្លៃថ្នូរចុះចេញពីតំណែង ពេលនោះប្រជាពលរដ្ឋខ្មែរ នឹងមានការងារធ្វើដ៏ល្អប្រសើរកាន់តែច្រើន មានជីវភាពរស់នៅកាន់តែខ្ពង់ខ្ពស់ ហើយមានសិទ្ធិសេរីភាពពេញលេញ ក្រោយពីការបញ្ចប់អំណាចផ្តាច់ការដ៏ព្រៃផ្សៃដូចសព្វថ្ងៃ ។
លោកគូសបញ្ជាក់ថា សូមរំឭកថា សហភាពអឺរ៉ុប និងសហរដ្ឋអាមេរិក ជាទីផ្សារធំជាងគេបំផុតសម្រាប់សម្លៀកបំពាក់ ផលិតនៅប្រទេសកម្ពុជា ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី២៧ ខែកុម្ភៈ ថានៅពេលថ្មីៗនេះ ក្រុមប្រឹក្សាកិច្ចការបរទេស នៃសហគមន៏អឺរ៉ុប បានសន្និដ្ឋានដោយលំអៀងថា សភាពការណ៍នយោបាយនៅកម្ពុជា មានលក្ខណៈគួរឲ្យព្រួយបារម្ភ និងលទ្ធិប្រជាធិបតេយ្យធ្លាក់ចុះដុនដាប ។
លោកបន្តថា ផ្អែកលើការសន្និដ្ឋានបែបអវិជ្ជាមាននេះ ក្រុមប្រឹក្សាសហគមន៍អឺរ៉ុបនេះ បានទាមទារបញ្ហាមួយចំនួនឲ្យរាជរដ្ឋាភិបាលកម្ពុជាអនុវត្តតាមការទាមទារឲ្យដោះលែង លោក កឹម សុខា ដែលបានប្រព្រឹត្តិបទល្មើសសន្និដ្ឋិភាពជាមួយបរទេស ដែលជាទោសក្បត់ជាតិ មិនអាចទៅរួចទេ ។ អភ័យឯកសិទ្ធិសភាមិនអាចការពារ លោក កឹម សុខា បានទេ នៅពេលដែលសាម៉ីជនប្រព្រឹត្តបទល្មើសព្រហ្មទណ្ឌជាក់ស្តែង អភ័យឯកសិទ្ធិមកនិយាយទៀត អត់បានទេ ។
ការចង់ឲ្យអតីតៈបក្សប្រឆាំងដែលត្រូវបានរំលាយរួចហើយដោយតុលាការកំពូល ក៏មិនអាចទទួលយកបានជាដាច់ខាតដែរ ដោយសារក្រុមមេដឹកនាំបក្សនេះបានប្រព្រឹត្តល្មើសច្បាប់ស្តីពីគណបក្សនយោបាយ ដែលប្រឈមនឹងការរំលាយចោលតាមផ្លូវច្បាប់ ។
ជាមួយគ្នានោះដែរ លោកថា ការដែលថា មានការរំលោភសិទ្ធិមនុស្សនោះ ក៏នៅកម្ពុជាគ្មានការរំលោភដូចការសន្និដ្ឋាននោះទេ ។ ផ្ទុយទៅវិញ ការចាត់វិធានការណ៍ផ្លូវច្បាប់លើជន និងក្រុមជនរំលោភច្បាប់ គឺជាការពង្រឹងនីតិរដ្ឋតែប៉ុណ្ណោះ ។
លោកបញ្ជាក់ថា «នៅលើលោកនេះ តើមានប្រទេសណាលើកលែងការអនុវត្តច្បាប់ចំពោះជនរំលោភច្បាប់0x017d7 ការទាមទារមិនឲ្យប្រើប្រព័ន្ធយុត្តិធម៌មកលើក្រុមប្រឆាំងនេះ ក៏ជាការមិនត្រឹមត្រូវដែរ ច្បាប់ត្រូវអនុវត្តលើគ្រប់ជនល្មើសច្បាប់ដោយមិនប្រកាន់ថាជាប្រឆាំង ឬមិនប្រឆាំងទេ តែប្រព្រឹត្តិខុសច្បាប់ ត្រូវតែទទួលខុសត្រូវចំពោះមុខច្បាប់ស្មើៗគ្នា» ។
លោកបានហៅ សេចក្តីព្រមានរបស់សហភាពអឺរ៉ុបមកលើកម្ពុជាថា ចំពោះសេចក្តីសម្រេចរបស់អង្គប្រជុំរបស់ក្រុមប្រឹក្សានេះ ជាការគួរឲ្យហួសចិត្តណាស់ ដែលការងារចំពោះមុខច្រើនរាប់មិនអស់នៅសហគមន៍អឺរ៉ុប មិនដោះស្រាយ បែរជាក្រុមប្រឹក្សាយកបញ្ហាកម្ពុជាមកដោះស្រាយខុសមុខសញ្ញាទៅវិញ ។ ហើយគឺជាការលូកចូលកិច្ចការផ្ទៃក្នុងកម្ពុជា ដែលជាប្រទេសឯករាជ្យ និងអធិបតេយ្យមួយ ទទួលស្គាល់ និងជាសមាជិក អ.ស.ប ។
លោកបន្ថែមថា ការអនុវត្តច្បាប់ ដើម្បីពង្រឹងនីតិរដ្ឋនៅកម្ពុជា គឺជាសិទ្ធិ និងភារកិច្ចរបស់រាជរដ្ឋាភិបាល នៃគណបក្សឈ្នះឆ្នោតនៅកម្ពុជា ប្រកបដោយឯករាជ្យ និងមានអធិបតេយ្យរបស់កម្ពុជា ។ ការដោះលែងជនក្បត់ជាតិ ការឲ្យអតីតៈបក្សប្រឆាំង និងក្រុមមន្ត្រី១១៨ រូបបានរស់ឡើងវិញ និងបានធ្វើនយោបាយឡើងវិញ គឺគ្មានទេ ដោយសារច្បាប់កម្ពុជាបានសម្រេចជាស្ថាពររួចហើយ ។
អ្នកនាំពាក្យគណបក្សកាន់អំណាចក៏បានលើកឡើងថា ការទាមទារកុំឲ្យយកប្រព័ន្ធយុត្តិធ៌មមកប្រើ ក៏មិនអាចទៅរួចដែរ កម្ពុជាមិនបោះបង់ចោលការដោះស្រាយតាមផ្លូវច្បាប់ចំពោះជនល្មើសច្បាប់បានជាដាច់ខាត ។ កម្ពុជាមិនយកតាមគំរូតាម ហ៊ីត្លែរ និងប៉ុលពល មកដោះស្រាយបញ្ហាឡើយ ។ លោកគូសបញ្ជាក់ថា «ដូច្នេះ ការសម្រេចយ៉ាងណារបស់ក្រុមប្រឹក្សាសហគមន៍អឺរ៉ុបនោះ មិនអាចមានឥទ្ធិពលអ្វីមកលើឯករាជ្យ និងអធិបតេយ្យភាព ព្រមទាំងសិទ្ធិសម្រេចរបស់កម្ពុជាបានឡើយ» ៕
ចែករំលែកព័តមាននេះ