រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា រដូវវស្សាឆ្នាំក្រោយនេះ ក្នុងភូមិសាស្ត្រ ខណ្ឌ ចំនួន៤ ក្នុងរាជធានីភ្នំពេញ នឹងមិនមានការគំរាមកំហែងដោយជំនន់ទឹកភ្លៀងទៀតទេ បន្ទាប់ពីរដ្ឋបាល រាជធានីភ្នំពេញបានបើកយុទ្ធនាការស្តារប្រព័ន្ធលូជិត៤៥០ខ្សែ និងការស្ថាបនាប្រឡាយមួយចំនួនទៀត។ ក្រោយក្នុងកិច្ចប្រជុំ ដើម្បីត្រួតពិនិត្យលទ្ធផលការងារស្តារប្រឡាយលូក្នុងរាជធានីភ្នំពេញ កាលពីរសៀល ថ្ងៃទី២៦ កុម្ភៈនេះ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា យុទ្ធនា ការស្តារលូលាងលូ ក្នុងរយៈពេល៤៣ថ្ងៃ គិតចាប់ពីថ្ងៃចាប់ផ្តើម រហូតមកដល់ពេលនេះ ការងារស្តារលូ ក្នុងរាជធានីភ្នំពេញ ជាពិសេសក្នុងចំណោមខណ្ឌទាំង៤ នៅកណ្តាលក្រុង សម្រេចបានលទ្ធផលសរុប ១២៨ខ្សែ ស្មើនឹង៩៩ គីឡូម៉ែត្រ ឬស្មើនឹង៣៣%នៃផែនការចំនួន៤១៨គីឡូម៉ែត្រ ឬស្មើនឹង៤៤០ ខ្សែ ដើម្បី រំដោះជំនន់ ទឹកភ្លៀង នៅក្នុងរដូវវស្សាខាងមុខនេះ។
លោកបន្តថា តាមរយៈការចុះស្តារលូ ក្នុងពេល កន្លងមកបានសង្កេតឃើញមានសម្រាម និងកាកសំណល់អាហារពេញក្នុងលូ ឬអណ្តូង លូ តែម្តង ជាពិសេសនៅម្តុំ ហាងលក់ដូរមួយចំនួនដោយមិនបានចូលរួមទេ គឺព្រមទាំងចាក់កាកសំណល់ ទាំងនោះ ចូលក្នុងលូថែមទៀត ហើយក៏មានផ្ទះប្រជាពលរដ្ឋខ្លះបានបិទប្រព័ន្ធលូតែម្តង។ លោក ម៉េត មាសភក្តី បានបញ្ជាក់ថា តាមរយៈការខិតខំប្រឹងប្រែងរបស់ក្រុមការងារ ក៏ដូចផែនការជុំរុញ របស់ អភិបាលរាជធានីភ្នំពេញ បន្ថែមផងនោះ ការងារយុទ្ធនាការស្តារ ប្រពន្ធ័ប្រឡាយ លូនឹងបានរួចរាល់ ទៅតាមផែនការដែលបានគ្រោងទុក ហើយក៏រំពឹងថា ក្នុងរដូវវស្សាឆ្នាំក្រោយនេះតំបន់មួយចំនួន ដែលធ្លាប់លិចដោយជំនន់ទឹកភ្លៀងនឹងមានភាពប្រសើរឡើង។
គួររំលឹកថា អាជ្ញាធររាជធានីភ្នំពេញ បានបើកយុទ្ធនាការស្តារប្រព័ន្ធប្រឡាយ លូ ក្នុងរាជធានីភ្នំពេញ ដោយបានទម្លាក់ការងារជាច្រើន ឲ្យទៅអាជ្ញាធរខណ្ឌ និងមន្ទីរជំនាញ បែងចែកជាក្រុម ដើម្បីជំរុញផែនការ ស្តារលូជិត៤៥០ខ្សែ និងប្រឡាយមួយចំនួនទៀត ឲ្យបានរួចរាល់ក្នុងរយៈពេល៥ខែ៕
ចែករំលែកព័តមាននេះ