រាជធានីភ្នំពេញ ៖ គណបក្សប្រជាជនកម្ពុជាដែលជាគណបក្សកាន់អំណាចបានឈ្នះឆ្នោត ទទួលបានអាសនៈទាំងអស់នៃចំនួនសមាជិកព្រឹទ្ធសភាសម្រាប់ការបោះព្រឹទ្ធសភានីតិកាលទី៤ ឆ្នាំ ២០១៨ នេះ ។ នេះបើតាមលទ្ធផលបណ្តោះអាសន្នរបស់គណបក្សប្រជាជនកម្ពុជា ។
អាសនៈព្រឹទ្ធសភាដែលមានចំនួន៥៨ ក្នុងចំណោមអាសនៈសរុប៦២ ត្រូវបានធ្លាក់ ទៅលើគណបក្សប្រជាជនកម្ពុជា ខណៈដែលគណបក្សនយោបាយ៣ផ្សេងទៀតមិនទទួលបានអាសនៈនោះទេ ។ នេះបើតាមតាមលទ្ធផលបណ្តោះអាសន្នរបស់គណបក្សប្រជាជនកម្ពុជា (គ៨៥) និងលទ្ធផលបឋមគណកម្មាធិការជាតិរៀបចំការបោះឆ្នោតបានឲ្យដឹងអំពីការបោះ ឆ្នោតព្រឹទ្ធសភាអាណត្តិទី៤ ឆ្នាំ២០១៨ ។
លទ្ធផលបានបង្ហាញថា ទាំង៨ភូមិភាគ គឺគណបក្សប្រជាជនកម្ពុជាទទួលបានលទ្ធផលច្រើនជាងគេ ហើយឈ្នះ អាសនៈទាំងអស់ក្នុងការប្រកួតប្រជែង ចំនួន៥៨ អាសនៈ ក្នុងចំណោមគណបក្សចំនួន៤ ដែលចូលរួមប្រកួតប្រជែងរួមមាន គណបក្សប្រជាជនកម្ពុជាទទួលបាន ១១ ២០២ សំឡេង គណបក្សហ្វ៊ុនស៊ិនប៉ិចទទួល២៧៦សំឡេង គណបក្សខ្មែររួបរួមជាតិ ទទួល១៨២សំឡេង និងគណបក្សយុវជនកម្ពុជាទទួលបាន៣សំឡេង ។
លោកសោម សូរីដា អគ្គលេខាធិការរង គជបបានឲ្យដឹងថា រហូតមកដល់ពេលនេះ(គជប) មិនទាន់បានធ្វើការបែងចែកអាសនៈសម្រាប់ការបោះឆ្នោតជ្រើសតាំងសមាជិកព្រឹទ្ធសភានោះទេ ដោយរង់ចាំលទ្ធផលផ្លូវការរបស់គណៈកម្មការរាជធានីខេត្តរៀបចំការបោះឆ្នោត ។ លោកថា កាលពីម្សិលមិញ (ថ្ងៃទី២៥ ខែកុម្ភៈ ) គ.ជ.ប.បានទទួលលទ្ធផលបឋមទេ ដូច្នេះមិនអាចធ្វើការបែងអាសនៈបានទេ ។
លោកបញ្ជាក់ថាយ៉ាងដូច្នេះថា « ម្សិលមិញ យើងទទួលបានបានតែលទ្ធផលបឋមទេ ។ ហើយលទ្ធផលបឋមនេះមិនមែនជាលទ្ធផលដែលត្រូវយកមកធ្វើការបែងចែកអាសនៈនោះទេ » ។
លោកបានអះអាងនៅថ្ងៃទី២៦ ខែកុម្ភៈនេះ គ.ជ.បបានចាប់ផ្តើមទទួលលទ្ធផលពីគណកម្មការរៀបចំការបោះឆ្នោតរាជធានី ហើយគជបនឹងប្រកាសលទ្ធផបណ្តោះអាសន្នចាប់ពីថ្ងៃទី២៧ ខែកុម្ភៈ ព្រោះថា ការប្រកាសលទ្ធផលលឿន ឬយឺតអាស្រ័យមកពីមានពាក្យបណ្តឹង ប៉ុន្តែសម្រាប់ការបោះឆ្នោតព្រឹទ្ធសភានីតិកាលទី៤ នេះ មិនមែនពាក្យបណ្តឹងនោះទេ ។
យ៉ាងណាក្តីលោកសោម សូរីដាបានឲ្យដឹងថា ការដែលគណបក្សប្រជាជនកម្ពុជាចេញលទ្ធផលបណ្តោះអាសន្ននៃលទ្ធផលបោះឆ្នោតព្រឹទ្ធសភាដែលគណបក្សប្រជាជនកម្ពុជាឈ្នះ ទទួលអាសនៈទាំងអស់៥៨ អាសនៈនោះ គឺជាការចេញមួយ របស់គណបក្សដែលធ្វើការបែងចែកតាមរូបមន្ត ។ ចំណែកស្ថាប័ន គ.ជ.ប. មិនទាន់ចេញលទ្ធផលបណ្តោះអាសន្ននោះទេ ។
លោកបានគូសបញ្ជាក់ថា « ខ្ញុំមិនអាចវាយតម្លៃបានទេ អ្វីដែលផ្លូវការនោះ មានតែផលទ្ធផលផ្លូវការដូច្នេះយើងអាចធ្វើការបែងចែកតាមរូបមន្ត ដែលបានផ្សព្វផ្សាយជាសារណៈបាន ប៉ុន្តែក្នុងនាមជាស្ថាប័នអនុវត្តការបោះឆ្នោតមិនទាន់ហ៊ានប្រកាសមុននោះទេ » ។
ចំណែកលោក ឌឹម សុវណ្ណារុំ អ្នកនាំពាក្យ គ.ជ.ប បានឲ្យដឹងថា ការប្រកាសលទ្ធផលផ្លូវការនឹងធ្វើឡើងនៅថ្ងៃទី០៣ ខែមិនា ឆ្នាំ២០១៨ ។ ចំពោះការចែងបែកអាសនៈរបស់គណបក្សនយោបាយជាសិទ្ធិរបស់គេ ព្រោះថាគណបក្សនយោបាយនីមួយ ៗ អាចធ្វើការបែងចែក តាមរូបមន្តដែល គជប បានផ្សព្វផ្សាយបាន ។ សម្រាប់ការដំណើការបោះឆ្នោតព្រឹទ្ធសភា និងលទ្ធផលនេះ ដែរ លោកសុខ ឥសាន អ្នកនាំពាក្សប្រជាជនកម្ពុជាបានឲ្យដឹងតាមតេឡេក្រាមបានអបអរសាទរលទ្ធផលបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ។ លោកបន្តថា ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ បានប្រព្រឹត្តទៅដោយរលូន ប្រកបដោយប្រជាធិបតេយ្យ សេរីត្រឹមត្រូវ និងយុត្តិធម៌ គ្មានអំពើហិង្សា ស្ថិតនៅក្រោមដំបូលសន្តិភាព ស្ថេរភាពនយោបាយ សុខសុវត្ថិភាពសង្គមល្អ ដែលប្រជាជនទូទៅស្វាគមន៍ និងអបអរសាទរ ។
លទ្ធផលដ៏ល្អនៃការបោះឆ្នោតនេះ ឆ្លុះបញ្ចាំងពីការសម្រេចចិត្ត ប្រកបដោយស្មារតីទទួលខុសត្រូវខ្ពស់ របស់អង្គបោះឆ្នោត ជាតំណាងរាស្ត្រ និងក្រុមប្រឹក្សាឃុំ -សង្កាត់ ដែលជាតំណាងឆន្ទៈរបស់ប្រជាជនកម្ពុជាទូទាំងប្រទេស ដែលជាភ័ស្តុតាង បញ្ជាក់ថា ព្រះរាជាណាចក្រកម្ពុជាបាន និងកំពុង ដើរតាមគន្លងនៃលទ្ធិប្រជាធិបតេយ្យ សេរីពហុបក្ស យ៉ាងត្រឹមត្រូវ ស្របតាមស្មារតីនៃកិច្ចព្រមព្រៀង ទីក្រុងប៉ារីស ស្តីពីបញ្ហាកម្ពុជា ថ្ងៃ២៣ ខែតុលា ១៩៩១ ៕
សូមជម្រាបថា សមាជិកព្រឹទ្ធសភា ក្នុងអាណត្តិទី៤ មាន៦២រូប ក្នុងនោះ៥៨រូប បោះឆ្នោតអសកល២រូប ជ្រើសតាំង ដោយសមាជិករដ្ឋសភា និង២រូបទៀត តែងតាំងដោយព្រះមហាក្សត្រ ។ សមាជិកព្រឹទ្ធសភាដែលព្រះមហាក្សត្រតែងតាំងមានសម្តេចរាជបុត្រីព្រះអនុជ នរោត្តម អរុណរស្មី និងលោកជំទាវ អ៊ុំ សូម៉ានីន ៕
ចែករំលែកព័តមាននេះ