ខេត្តកំពង់ចាម ៖ អ្នកគ្រូបង្រៀននៅវិទ្យាល័យពាមជីកង ស្រុកកងមាស ម្នាក់ឈ្មោះ ឌីម ស្រីមុំ អាយុ៣៥ឆ្នាំ មានផ្ទៃពោះគ្រប់ខែកូនដំបូងបានទៅសំរាលកូននៅមន្ទីរពេទ្យខេត្ត ក្នុងអំឡុងខែតុលា…
ខេត្តកំពង់ចាម ៖ អ្នកគ្រូបង្រៀននៅវិទ្យាល័យពាមជីកង ស្រុកកងមាស ម្នាក់ឈ្មោះ ឌីម ស្រីមុំ អាយុ៣៥ឆ្នាំ មានផ្ទៃពោះគ្រប់ខែកូនដំបូងបានទៅសំរាលកូននៅមន្ទីរពេទ្យខេត្ត ក្នុងអំឡុងខែតុលា ឆ្នាំ២០១៧ ដោយបានកូនប្រុសម្នាក់មានសុខភាពល្អជាធម្មតាទាំងម្តាយ និងកូន ។
ប៉ុន្តែដោយសារការធ្វេសប្រហែសរបស់គ្រូពេទ្យភ្លេចកន្សែងតូចមួយក្នុងពោះម្តាយ ក្រោយពីវះកាត់រួចហើយក៏បានធ្លាក់ខ្លួនឈឺចេះតែធ្ងន់ទៅៗ និងស្គមរីងរៃដូចមនុស្សទាស់ ចុងក្រោយក៏បានសំរេចវះកាត់យកកន្សែងចេញ នៅគ្លីនិកឯកជនមួយក្នុងរាជធានីភ្នំពេញទោះជាបែបនេះក្តីសុខភាពនូវតែខ្សោយ និងហត់ផងដែរ ។
តាមសាច់ញាតិអ្នករងគ្រោះប្រាប់ឲ្យដឹងនៅយប់ថ្ងៃទី២៤ ខែកុម្ភៈ ឆ្នាំ២០១៨ តាមទូរស័ព្ទឲ្យដឹងថាដោយសារតែមានការទុកចិត្តលើពេទ្យខេត្តនោះក៏បាននាំអ្នករងគ្រោះមកឆ្លងទន្លេនៅមន្ទីរពេទ្យខេត្ត ដោយមិនបានកើតតាមលក្ខណៈធម្មជាតិនោះទេត្រូវបានគ្រូពេទ្យវះកាត់នៅថ្ងៃទី២៥ ខែតុលា ឆ្នាំ២០១៧ ដោយបានកូនប្រុសម្នាក់ទទួលបានជោគជ័យ ក្រោយពីម្តាយទារកបានដឹងខ្លួនឡើងវិញចេះតែថ្ងូរថា ឈឺពោះខុសពីធម្មតាតែពេទ្យវិញប្រាប់ថា អាចទល់ខ្យល់ក្នុងពោះ ដោយសារតែមិនបានក្រោកឈរ ដើរក្រោយពីលេបថ្នាំការឈឺចុកចាប់បានធូរស្រាល និងដល់ពេលត្រូវចេញត្រឡប់ទៅផ្ទះវិញ ។
សាច់ញាតិអ្នករងគ្រោះប្រាប់បន្តថា ១ខែក្រោយមកនូវតែឈឺចេះតែស្គមទៅៗត្រូវបានម្តាយប្រាប់ថា ទាស់រកថ្នាំខ្មែរមកផឹកតែមិនបានធូរនោះទេ និងបានទៅពិនិត្យមើលអេកូនៅភ្នំពេញឃើញមានដុំខ្មៅនៅក្នុងពោះតែមិនដឹងជាដុំអ្វីឡើយ និងឲ្យថ្នាំមកលេបដើម្បីព្យាបាលបន្តតែនូវមិនបានជាសះស្បើយទាល់តែសោះ លុះដល់ពេលចុងក្រោយនៅថ្ងៃទី១៩ ខែមករា ឆ្នាំ២០១៨ បាននាំពីស្រុកកងមាសទៅវះកាត់នៅភ្នំពេញ ស្រាប់តែបានឃើញកូនកន្សែងតូចមួយដូចកន្សែងពោះគោមួយដោយបានចំណាយលុយព្យាបាលអស់ជាច្រើន និងបានព្យាយាមមកជួបជាមួយគ្រូពេទ្យវះកាត់ ដែលបង្កើតកូនមានការធ្វេសប្រហែសភ្លេចកន្សែងក្នុងពោះ ។ តែមិនទាន់មានដំណោះស្រាយណាមួយនោះទេការរងចាំបាត់ៗទើបចុងក្រោយសម្រេចចិត្តចុះផ្សាយតាមព័ត៌មានក្នុងស្រុកមួយ នៅព្រឹកថ្ងៃទី២៤ ខែកុម្ភៈ ឆ្នាំ២០១៨ បង្កឲ្យមានការភ្ញាក់ផ្អើលតែម្តង ។
លុះដល់ពេលរសៀលថ្ងៃដដែលគាត់ត្រូវបានគេហៅមកដោះស្រាយនៅខេត្តដោយក្នុងនោះលោក គួច ចំរើន អភិបាលខេត្តបានជួយឧបត្ថម្ភចំនួន៥លានរៀល និងមន្ទីរសុខាភិបាលខេត្តជួយចំនួន៥០០០ដុល្លារ ដោយប្តីអ្នកមកទទួលយកសម្រាប់ចំណាយព្យាបាលបន្តទៀតគាត់នឹងបរិច្ចាគចំនួន១លានរៀលទៅមន្ទីរពេទ្យគន្ធបុប្ជារផងដែរ ។
លោកវេជ្ជបណ្ឌិត គីម សួរភីរុណ ប្រធានមន្ទីរសុខាភិបាលខេត្តវិញមានប្រសាសន៏ឲ្យដឹងដែរថា ករណីនេះបានធ្វើការដោះស្រាយជាមួយនឹងភាគីរងគ្រោះរួចរាល់ហើយនៅរសៀលថ្ងៃទី២៤ ខែកុម្ភៈ ឆ្នាំ២០១៨ ជាមួយនោះនៅព្រឹកថ្ងៃទី២៥ ខែកុម្ភៈ ឆ្នាំ២០១៨ នឹងអ្នកស្រី្តឈ្មោះ ស្រីមុំ ទៅព្យាបាលនៅមន្ទីរពេទ្យកាល់ម៉ែត រាជធានីភ្នំពេញ រហូតទាល់តែជាសះស្បើយ ។ ចំពោះថ្លៃព្យាបាលនោះត្រូវបានសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន ចេញទាំងស្រុង ។ លោកនឹងធ្វើការណែនាំដល់ពេទ្យឆ្មបខេត្តត្រូវឲ្យបង្កើនការយកចិត្តទុកដាក់ និងប្រុងប្រយ័ត្នខ្ពស់មិនឲ្យមានបែបនេះបន្តទៀតឡើយ ៕
ចែករំលែកព័តមាននេះ