រាជធានីភ្នំពេញ ៖ សេដ្ឋកិច្ចកម្ពុជា នឹងបន្តរក្សាកំណើនល្អប្រសើរ ដោយកម្ពុជានឹងរក្សាបានកំណើនសេដ្ឋកិច្ច៧%នៅឆ្នាំនេះ និងឆ្នាំ២០១៩ខាងមុខ ដោយសារការជំរុញពីវិស័យ៣សំខាន់ៗ។ នេះបើយោងតាមការអះអាងពីមន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ ។…
រាជធានីភ្នំពេញ ៖ សេដ្ឋកិច្ចកម្ពុជា នឹងបន្តរក្សាកំណើនល្អប្រសើរ ដោយកម្ពុជានឹងរក្សាបានកំណើនសេដ្ឋកិច្ច៧%នៅឆ្នាំនេះ និងឆ្នាំ២០១៩ខាងមុខ ដោយសារការជំរុញពីវិស័យ៣សំខាន់ៗ។ នេះបើយោងតាមការអះអាងពីមន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក វង្សី វិស្សុត បានថ្លែងក្នុងកិច្ចប្រជុំពិគ្រោះយោបល់ដើម្បីធ្វើការវាយតម្លៃស្ថានភាពម៉ាក្រូសេដ្ឋកិច្ចកម្ពុជា កាលពីថ្ងៃទី២០ កុម្ភៈ ថា នៅក្នុងឆ្នាំ២០១៨ និងឆ្នាំ២០១៩ខាងមុខនេះ តាមការព្យាករ កំណើនសេដ្ឋកិច្ចកម្ពុជាអាចនឹងសម្រេចបានក្នុងរង្វង់៧% ក្នុងនោះវិស័យកសិកម្មត្រូវបានរំពឹងថា នឹងបន្តកំណើនក្នុងរង្វង់១,៨%, វិស័យឧស្សាហកម្មនឹងបន្តរក្សាកំណើនរឹងមាំក្នុងអត្រាមធ្យមប្រចាំឆ្នាំ១០% និងវិស័យសេវាកម្មត្រូវបានព្យាករថា នឹងមានកំណើនខ្ពស់ក្នុងរង្វង់ប្រមាណ៧%ផងដែរ ។
លោកមានប្រសាសន៍ថា ៖« ទោះបីយ៉ាងណា សេដ្ឋកិច្ចកម្ពុជាត្រូវជួបប្រទះនឹងហានិភ័យ និងបញ្ហាប្រឈមមួយចំនួនទាំងមកពីកត្តាខាងក្រៅ និងខាងក្នុង ។ ដូច្នេះ យើងចាំបាច់ត្រូវយកចិត្តទុកដាក់ជាប់ជាប្រចាំ ព្រោះការមិនប្រុងប្រយ័ត្ននៅពេលមិនទាន់មានបញ្ហាកើតឡើង គឺជាហានិភ័យដ៏គ្រោះថ្នាក់មួយសម្រាប់យើង»។
លោកបន្តថា កម្ពុជាគួរត្រូវបន្តធ្វើទំនើបកម្មមូលដ្ឋានសេដ្ឋកិច្ចរបស់ខ្លួនទៅរកសេដ្ឋកិច្ច ដែលមានតម្លៃបន្ថែមកាន់តែខ្ពស់ និងក្លាយជាសេដ្ឋកិច្ចបង្កើតតម្លៃក្នុងរយៈពេលវែងខាងមុខ ដែលកម្ពុជាត្រូវដាក់ចេញនូវវិធានការ គោលនយោបាយចាំបាច់មួយចំនួននៅក្នុងរយៈពេលខ្លី និងមធ្យមខាងមុខ ដើម្បីទ្រទ្រង់កំណើនសេដ្ឋកិច្ចឱ្យបន្តសម្រេចបានក្នុងរង្វង់៧% តាមរយៈការបន្តអភិវឌ្ឍន៍លើកកម្ពស់ក្បាលម៉ាស៊ីនសេដ្ឋកិច្ច ប្រពៃណីដែលមានស្រាប់ និងបង្កើតក្បាលម៉ាស៊ីនសេដ្ឋកិច្ចថ្មីៗផងដែរ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានយល់ស្របនឹងការលើកឡើងនេះ ដោយលោកថ្លែងថា តាមធម្មតា យើងឃើញសេដ្ឋកិច្ចកម្ពុជានៅតែមានសញ្ញាវិជ្ជមាន ប៉ុន្តែវាទាមទារឲ្យកម្ពុជាខំប្រឹងប្រែងបន្ថែមទៀតដើម្បីរក្សាក្រវាត់(កំណើន)នេះ ព្រោះនៅពេលទំហំសេដ្ឋកិច្ចយើងកាន់តែធំ ទំហំនៃកំណើនអាចថយចុះ ប៉ុន្តែទំហំទឹកប្រាក់នឹងបន្តកើនឡើង ។ ផ្ទុយទៅវិញ បើយើងខិតខំប្រឹងប្រែងទាំងអស់គ្នា ហើយយើងអាចបន្តរក្សាកំណើនសេដ្ឋកិច្ចបាន៧%បន្តទៀត គឺជារឿងអបអរសាទរសម្រាប់ទាំងអស់គ្នា ។
លោកបន្តថា ៖« សេដ្ឋកិច្ចកម្ពុជាមានបញ្ហាប្រឈមដដែលៗ ប៉ុន្តែការងារនេះរាជរដ្ឋាភិបាលបាននិងកំពុងខិតខំធ្វើបណ្តើរៗហើយ ព្រោះវិស័យអ្វីមួយមិនអាចធ្វើមួយថ្ងៃបានទេ វាត្រូវការពេលវេលាសមស្រប » ។
នៅក្នុងកិច្ចប្រជុំដ៏មានសារសំខាន់មួយដើម្បីត្រួតពិនិត្យលើរបាយការណ៍នៃវឌ្ឍនភាពសេដ្ឋកិច្ចកម្ពុជា ក្រោមអធិបតីភាពលោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ឆាយ ថន រដ្ឋមន្ត្រីក្រសួងផែនការ កាលពីថ្ងៃទី២៤ មករា កន្លងមក បានរកឃើញថា ដោយមានការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការរក្សាកំណើនសេដ្ឋកិច្ចមួយមានលក្ខណៈរឹងមាំ កម្ពុជាអាចរក្សាក្នុងអត្រាកំណើន៧% ខណៈផលិតផលក្នុងស្រុកសរុបរបស់ពលរដ្ឋម្នាក់ៗកើនឡើង។ ចំណែកអត្រាភាពក្រីក្របានធ្លាក់ចុះ ស្របគ្នានឹងការវាយតម្លៃរបស់ធនាគារពិភពលោក ។
យោងតាមរបាយការណ៍ពាក់កណ្តាលអាណតិ្តឆ្នាំ២០១៦ ស្តីពីការអនុវត្តផែនការយុទ្ធសាស្ត្រអភិវឌ្ឍន៍ជាតិ២០១៤-២០១៨ បានរកឃើញថា ផលិតផលក្នុងស្រុកសរុបរបស់ប្រជាពលរដ្ឋម្នាក់បានកើនឡើងពី១.១៣៨ដុល្លារអាមេរិកនៅឆ្នាំ២០១៤ ទៅ១.៤២៩ដុល្លារអាមេរិកក្នុង១ឆ្នាំនៅឆ្នាំ២០១៧ និងអត្រាភាពក្រីក្រត្រូវបានកាត់បន្ថយពី២១,១%ក្នុងឆ្នាំ២០១០ មកនៅ១៣,៥%នៅឆ្នាំ២០១៤ ហើយកម្រិតនៃការធ្លាក់ចុះនេះ សម្រេចបានលឿនជាងចំណុចដៅរបស់គោលដៅអភិវឌ្ឍន៍សហស្សវត្សរ៍កម្ពុជា ដែលបានកំណត់នៅត្រឹម១៩,៥%ក្នុងឆ្នាំ២០១០ និង១៣,៨%ក្នុងឆ្នាំ២០១៨ ។
ការធ្លាក់ចុះអត្រាភាពក្រីក្រនៅកម្ពុជា មានភាពស្របគ្នានឹងការវាយតម្លៃរបស់ធនាគារ ពិភពលោក ដោយបានប្រកាសកាលពីឆ្នាំ២០១៥កន្លងទៅថា កម្ពុជាបានចាកផុតពីភាពក្រីក្រតោកយ៉ាក និងចាត់ជាប្រទេសមានវឌ្ឍនភាពល្អជាងគេក្នុងតំបន់នៅក្នុងការងារកាត់បន្ថយភាពក្រីក្ររបស់ខ្លួន ។
លោក ង៉ែត ជូ ទីប្រឹក្សាជាន់ខ្ពស់នៃក្រុមហ៊ុន Emerging Market Consulting បានថ្លែងថា មូលដ្ឋានសេដ្ឋកិច្ចកម្ពុជានៅតែមានកំណើនយ៉ាងរឹងមាំ ខណៈវិស័យសំខាន់ៗដើរតួនាទីក្នុងការជំរុញកំណើនសេដ្ឋកិច្ចនៅតែមានកំណើន និងរឹងមាំ ជាពិសេស វិស័យសេវាកម្មបាននិងកំពុងកើនឡើង ស្របតាមគោលនយោបាយរបស់រាជរដ្ឋាភិបាល ហើយរាជរដ្ឋាភិបាលបាននិងកំពុងធ្វើការងារយ៉ាងសកម្ម និងល្អប្រសើរដើម្បីធានានូវកំណើនសេដ្ឋកិច្ចកម្ពុជាសម្រេចបានកំណើនបន្ថែមទៀត ។
លោកបន្តថា ៖« ខ្ញុំគិតថា សុខភាពសេដ្ឋកិច្ចកម្ពុជានៅតែមានភាពល្អប្រសើរ ដោយសារគោលនយោបាយរបស់រដ្ឋាភិបាល ព្រមទាំងលក្ខខណ្ឌផ្លូវច្បាប់លើកទឹកចិត្ត និងការការពារអ្នកវិនិយោគ ហើយធ្វើឲ្យលំហូរទុនវិនិយោគផ្ទាល់ពីបរទេសកើនឡើង » ៕
ចែករំលែកព័តមាននេះ