រាជធានីភ្នំពេញ ៖ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានស្នើដល់ប្រធានគណៈកម្មការរាជធានីរៀបចំការបោះឆ្នោតទាំងអស់រក្សានិងធានាអព្យាក្រឹត គ្មានការឃោសនាបោះឆ្នោត នៅមួយថ្ងៃមុនបោះឆ្នោត និងថ្ងៃបោះឆ្នោត ។ នេះបើយោងតាមលិខិតមួយច្បាប់របស់លោកប្រធាន គ.ជ.ប ។
លិខិតមួយច្បាប់ដែលចុះហត្ថលេខាដោយលោកប្រធាន គ.ជ.ប បានលើកឡើងបញ្ជាក់ថា «សូមជម្រាប លោក លោកស្រី ប្រធានគណៈកម្មការរាជធានី-ខេត្ត រៀបចំការបោះឆ្នោត ជ្រាបថា ដើម្បីធានានូវបរិយាកាសអព្យាក្រឹត គ្មានសកម្មភាពឃោសនាបោះឆ្នោត នៅមួយថ្ងៃមុនការបោះឆ្នោត និងនៅថ្ងៃបោះឆ្នោត គ.ជ.ប សូមធ្វើការរំឭកអំពីសកម្មភាពដែលត្រូវបានអនុញ្ញាត និងហាមឃាតដូចជា ៖ ១.គ្រប់សកម្មភាពឃោសនាបោះឆ្នោត ដែលមានចែងក្នុងជំពូកទី៦ នៃ ប.ន.ព.ស ត្រូវបញ្ឍប់ទាំងអស់ក្នុងអំឡុងពេល២៤ម៉ោ់ង មុនថ្ងៃបោះឆ្នោត និងនៅថ្ងៃបោះឆ្នោត ។ ២.អ្នកបោះឆ្នោតជាតំណាងរាស្ត្រក្នុងតំណែង និងសមាជិកក្រុមប្រឹក្សាសង្កាត់ (កបឃ.ស) ទាំងអស់ក្នុងតំណែង អាចស្នាក់នៅជុំគ្នានៅមុនថ្ងៃបោះឆ្នោត ក្នុងទីប្រជុំជនរាជធានី-ខេត្ត ដែលការិយាល័យបោះឆ្នោតរបស់ពួកគាត់តាំងនៅ ។ ការស្នាក់នៅនេះមិនចាត់ទុកថា ជាសកម្មភាពឃោសនាបោះឆ្នោតឡើយ ។ ៣.ការដឹកជញ្ជូណអ្នកបោះឆ្នោតទៅកាន់ការិយាយល័យបោះឆ្នោត ឬការផ្តល់ជូនយានជំនិះមិនរួមបញ្ជូលនៅក្នុងសកម្មភាពឃោសនាបោះឆ្នោតទេ ប្រសិនបើការប្រើប្រាស់យានជំនិះទាំងនោះមានលក្ខណៈជាឯកជន មិនមានទ្រង់ទ្រាយធំ និងមិនមានភ្ជាប់នូវការផ្សព្វផ្សាយដែលពាក់ព័ន្ធនឹងគណបក្សនយោបាយណាមួយ ឬបេក្ខជនណាម្នាក់ ។ ៤.ហាមអ្ន្នកបោះឆ្នោតជាតំណាងរាស្ត្រក្នុងតំណែង និងសមាជិក កបឃ.ស ទាំងអស់ក្នុងតំណែងស្លៀកពាក់ (សម្លៀកបំពាក់ មួក) ដែកតាំងបង្ហាញឲ្យឃើញនូវរូបសញ្ញា ឬសារនយោបាយរបស់គណបក្សនយោបាយ ឬរូបថតបេក្ខជនណាម្នាក់ ដើម្បីទៅបោះឆ្នោត» ។
សូមជម្រាបថា ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ នឹងប្រឹព្រឹត្តិទៅនៅថ្ងៃទី២៥ ខែកុម្ភៈ ឆ្នាំ២០១៨ នេះ មាន៣៣ការិយាល័យ នៅទូទាំងប្រទេស ដើម្បីបម្រើឲ្យអ្នកបោះឆ្នោត និងអង្គបោះឆ្នោតចំនួន១១.៦៩៥នាក់ ។ ការបោះឆ្នោតមានគណបក្សនយោបាយចំនួន៤ គឺគណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ និងគណបក្សហ្វ៊ុនស៊ិនប៉ិច ៕
ចែករំលែកព័តមាននេះ