រាជធានីភ្នំពេញ ៖ ដោយមានការអនុញ្ញាតពីរាជរដ្ឋាភិបាល និងកិច្ចសហប្រតិបត្តិការយ៉ាងជិតស្និទ្ធពីសាលារាជធានីភ្នំពេញ ក្រុមហ៊ុនឯកជនក្នុងស្រុកដ៏ធំមួយដែលទទួលបានការទុកចិត្តពីរាជរដ្ឋាភិបាល គឺក្រុមហ៊ុនវិនិយោគទុនអាណិកជនកម្ពុជា (OCIC) ឧកញ៉ាពុង ឃាវសែ ហៅពុង សុវណ្ណ ដែលមានស្នាដៃធំៗជាច្រើនដូចជាអភិវឌ្ឍន៍ទីក្រុងរណបកោះពេជ្រ ស្ពានព្រះមុនីវង្សថ្មី ស្ពាន
រាជធានីភ្នំពេញ ៖ ដោយមានការអនុញ្ញាតពីរាជរដ្ឋាភិបាល និងកិច្ចសហប្រតិបត្តិការយ៉ាងជិតស្និទ្ធពីសាលារាជធានីភ្នំពេញ ក្រុមហ៊ុនឯកជនក្នុងស្រុកដ៏ធំមួយដែលទទួលបានការទុកចិត្តពីរាជរដ្ឋាភិបាល គឺក្រុមហ៊ុនវិនិយោគទុនអាណិកជនកម្ពុជា (OCIC) ឧកញ៉ាពុង ឃាវសែ ហៅពុង សុវណ្ណ ដែលមានស្នាដៃធំៗជាច្រើនដូចជាអភិវឌ្ឍន៍ទីក្រុងរណបកោះពេជ្រ ស្ពានព្រះមុនីវង្សថ្មី ស្ពានអាកាសក្បាលថ្នល់ ស្ពានអាកាសពេទ្យលោកសង្ឃ និងស្ពានអាកាសស្ទឹងមានជ័យពេលនេះបានបន្តការអភិវឌ្ឍទីក្រុងរណបថ្មីមួយទៀត រណបរាជធានីភ្នំពេញ គឺទីក្រុងរណបជ្រោយចង្វាលើផ្ទៃដីសរុប៣៨៧ហិកតា ស្ថិតនៅសង្កាត់ព្រែកតាសេក និងសង្កាត់ព្រែកលៀប ខណ្ឌឫស្សីកែវ ដែលបានចេញជារូបរាងជាបណ្តើរៗហើយ ។
នៅព្រឹកថ្ងៃទី២០ ធ្នូ ក្រុមហ៊ុនឯកជនមួយនេះដោយមានកិច្ចសហការយ៉ាងជិតស្និទ្ធពីសាលារាជធានីភ្នំពេញ បានរៀបចំធ្វើពិធីសម្ពោធបើកការដ្ឋានសាងសង់ផ្សារទំនើបនៅតំបន់ទីក្រុងរណបជ្រោយចង្វានោះ និងចែកផ្ទះជូនប្រជាពលរដ្ឋដែលប៉ះពាល់ឲ្យបានទទួលផ្ទះថ្មីនៅតំបន់នោះផងដែរ ។ ពិធីនេះធ្វើឡើងក្រោមអធិបតីភាពលោកកែប ជុតិមា អភិបាលរាជធានីភ្នំពេញ ដោយមានការចូលរួមពីតំណាងក្រុមហ៊ុន OCIC មន្ត្រីក្រោមឱវាទសាលារាជធានីភ្នំពេញ និងប្រជាពលរដ្ឋយ៉ាងច្រើនកុះករ ។
ឧកញ៉ាពុង ឃាវសែ ប្រធានក្រុមហ៊ុនវិនិយោគទុនអាណិកជនកម្ពុជា (OCIC) បានលើកឡើងថា ក្រុមហ៊ុន OCICបានអភិវឌ្ឍគម្រោងជាច្រើនប្រកបដោយជោគជ័យ រួមមាន គម្រោងធំៗទីក្រុងរណបកោះពេជ្រ គម្រោងអភិវឌ្ឍន៍តំបន់ពហុកីឡដ្ឋានអូឡាំពិក ផ្សារទំនើប សណ្ឋាគារ ភូមិវប្បធម៌ក្រុងសៀមរាប សួនកាណាឌីយ៉ា ។ល។ និងបានការទទួលស្គាល់ពីរាជរដ្ឋាភិបាលក៏ដូចជាប្រជាពលរដ្ឋថា ក្រុមហ៊ុន OCIC ពិតជាក្រុមហ៊ុនមានលទ្ធភាព ទាំងថវិកា និងសមត្ថភាពគ្រប់គ្រាន់ ដើម្បីអភិវឌ្ឍន៍ទីក្រុងរណបជ្រោយចង្វានេះប្រកបដោយជោគជ័យដូចទីក្រុងរណបកោះពេជ្រដែរ ។ ជាលទ្ធផលថ្ងៃទី១២ កញ្ញា ឆ្នាំ២០១១ ក្រុមហ៊ុន OCIC បានចុះកិច្ចសន្យាពីការជួលដីតំបន់ជ្រោយចង្វា ដើម្បីអភិវឌ្ឍន៍ជាទីក្រុងរណបជាមួយរាជរដ្ឋាភិបាលតំណាងដោយសាលារាជធានីភ្នំពេញ លើទំហំផ្ទៃដីប្រមាណ៣៨៧ហិកតា និងត្រូវអភិវឌ្ឍន៍ជា៤តំបន់ធំៗមាន ៖
១-តំបន់បៃតង ជាតំបន់សួនច្បារបៃតង សួនសត្វ ដើម្បីជាកន្លែងសម្រាប់ប្រជាពលរដ្ឋ ក៏ដូចជាភ្ញៀវទេសចរអាចមកលំហែកម្សាន្តបាន ។២-តំបន់លំនៅឋានសម្រាប់មន្ត្រីរាជការដែលមានប្រាក់ចំណូលទាប អាចមានលទ្ធភាពទិញផ្ទះ ។៣-តំបន់អាស៊ាន ជាតំបន់ដែលក្រុមហ៊ុនបានត្រៀមដីសម្រាប់ជូនដល់ប្រទេសជាសមាជិកអាស៊ាន ដើម្បីអភិវឌ្ឍន៍ ពង្រឹងមិត្តភាព ចំណងទាក់ទងក្នុងតំបន់អាស៊ាន ដែលលំនាំនេះយកតាមប្រទេសចិននៅទីក្រុងណាននីង ។៤-តំបន់ពាណិជ្ជកម្ម និងលំនៅឋាន ។ ក្រុមហ៊ុននឹងអភិវឌ្ឍន៍តំបន់នេះដូចជាទីក្រុងកោះពេជ្រដែរ មានដូចជា លំនៅឋាន សាលារៀន មន្ទីរពេទ្យ ផ្សារទំនើប សណ្ឋាគារ អគារពាណិជ្ជកម្ម មជ្ឈមណ្ឌលពិព័រណ៍អន្តរជាតិ ។ល។
ឧកញ៉ាពុង ឃាវសែ បញ្ជាក់ថា ដោយមានការចង្អុលបង្ហាញពីសាលារាជធានីភ្នំពេញ ក្រុមហ៊ុន OCIC បានត្រៀមដី១២ហិកតាដើម្បីសាងសង់លំនៅឋាន និងផ្សារជូនប្រជាពលរដ្ឋដែលមានលំនៅឋានប៉ះពាល់ក្នុងតំបន់អភិវឌ្ឍន៍៣៨៧ហិកតានេះ ។ ក្នុងគម្រោងសាងសង់លើដី១២ហិកតានេះដែរ ក្រុមហ៊ុនត្រៀមសាងសង់ផ្ទះល្វែងកូនកាត់ចំនួនជាង៧០០ល្វែង និងមានផ្សារធំចំនួន២ ។
ផ្ទះល្វែងនីមួយៗមានទទឹង៤,២ម៉ែត្រ បណ្តោយ១២ម៉ែត្រ និងមានកម្ពស់២ជាន់ ជាប្រភេទផ្ទះធ្វើពីបេតុងអារម៉េទាំងកម្រាល និងជញ្ជាំងមិនមានការរៀបឥដ្ឋអ្វីទេ ដែលមានអាយុកាលរាប់សិបឆ្នាំ ។ សព្វថ្ងៃ ក្រុមហ៊ុនសាងសង់សម្រេចបាន២០ល្វែងបាន១០០% ឯ៤០ល្វែងបាន៦០% និង១០០ល្វែងបាន៣០% ។ ជាទូទៅក្នុងរយៈពេល១០ខែ ក្រុមហ៊ុនអាចសាងសង់បានពី២៥ទៅ៣០ល្វែង ដែលគម្រោងទាំងមូលអាចសម្រេចបាន១០០%នៅចុងឆ្នាំ២០១៤។
លោកកែប ជុតិមា អភិបាលរាជធានីភ្នំពេញមានប្រសាសន៍ថា ថ្ងៃនេះ បងប្អូនប្រជាពលរដ្ឋយើងចូលរួម ធ្វើជាសាក្សី និងត្រៀមទទួលយកសមិទ្ធផលថ្មី១ទៀត គឺគម្រោងអភិវឌ្ឍន៍តំបន់ជ្រោយចង្វាក្រោមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ដែលអនុវត្តដោយក្រុមហ៊ុន OCIC សហការជាមួយសាលារាជធានីភ្នំពេញ ។ ក្រុមហ៊ុន OCIC ជាក្រុមហ៊ុនក្នុងស្រុកមានស្នាដៃជាច្រើនក្នុងកាអភិវឌ្ឍទីក្រុង ដូចជា ទីក្រុងរណបកោះពេជ្រ ស្ពានអាកាស សំណង់អគារខ្ពស់ មជ្ឈមណ្ឌលពាណិជ្ជកម្មជាដើម ។
លោកកែប ជុតិមា បញ្ជាក់ទៀតថា ធម្មតាការអភិវឌ្ឍតែងប៉ះពាល់ខ្លះៗទៅលើបងប្អូនដែលរស់នៅមិនរៀបរយ តែយើងមិនរាថយទេ ដោយរាជធានីភ្នំពេញមិនមែនសម្រាប់តែអ្នករស់នៅក្នុងរាជធានីភ្នំពេញឬសម្រាប់បុគ្គលណាម្នាក់ទេ គឺសម្រាប់ប្រទេសជាតិទាំងមូល ដូច្នេះការអភិវឌ្ឍត្រូវតែដំណើរការជាចាំបាច់ ៕
ចែករំលែកព័តមាននេះ