ខេត្តឧត្តរមានជ័យ ៖ ស្ត្រីម្នាក់ត្រូវប្តីកំណាចវាយដំ និងអារ.កស្លាប់ក្នុងថ្លុកឈាមយ៉ាងអាណោចអាធ័មបំផុត នៅក្នុងចម្ការដំឡូងមី ចោលកូនប្រុស-ស្រី៥នាក់ ដោយមិនបានលាមួយម៉ាត់ ។ ហេតុការណ៍នេះបានកើតឡើងនៅវេលាម៉ោង៣និង៤៥នាទីរសៀលថ្ងៃទី១៨ កុម្ភៈនៅក្នុងចម្ការដំឡូងភូមិទំនប់អភិវឌ្ឍន៍ ឃុំអូរស្វាយ ស្រុកត្រពាំងប្រាសាទ ។
ស្ត្រីរងគ្រោះឈ្មោះ ស៊ីន ឆេន អាយុ៤៣ឆ្នាំ មុខរបរជាកសិករ មានកូនចំនួន៥ស្រី២នាក់បានស្លាប់នៅនឹងកន្លែងកើតហេតុយ៉ាងអាណោចអាធ័ម ចំណែកប្តីចិត្តឃោឃៅព្រៃផ្សៃឈ្មោះលាវ សាមី អាយុ៤៦ឆ្នាំ ត្រូវប៉ូលិសចាប់ខ្លួនភ្លាមៗផងដែរ ។ប៉ូលិសស្រុកត្រពាំងប្រាសាទបានឱ្យដឹងថា ក្រោយពីបានទទួលនូវព័ត៌មានរាយការណ៍ភ្លាម សមត្ថកិច្ចបានចុះធ្វើអន្តរាគមន៍រុករកជនដៃដល់ជាប្តី និងចាប់ខ្លួនបាននៅវេលាម៉ោង៤និង៥០នាទីក្នុងថ្ងៃដដែលនាំមកអធិការស្រុកធ្វើការសាកសួរ ។ យោងតាមចម្លើយបុរសជាប្តីបានសារភាពថា ខ្លួនបានខឹងនឹងប្រពន្ធជេរនិងស្តីបន្ទោស ក៏ទាញយកដំបងឈើវាយទៅលើប្រពន្ធពីក្រោយចំនួន៣ដំបង រួចយកកាំបិតខ្វែវអារ.កសម្លាប់តែម្តងនៅក្នុងចម្ការដំឡូង ។
អំពើឃាតកម្មនោះគឺប្តីបានវាយ និងអារ.កសម្លាប់ប្រពន្ធពេលកំពុងដកដំឡូងនៅក្នុងចម្ការទាំងពីរនាក់ ។ នៅចំពោះមុខសមត្ថកិច្ច ជនសង្ស័យបានសារភាពថា នៅពេលទៅដកដំឡូងពីរនាក់ប្រពន្ធ ខ្លួនក៏បានឈប់សម្រាកបន្តិច ក៏អង្គុយផឹកស្រារហូតដល់ស្រវឹងធ្វើការលែងកើត ។ ពេលនោះប្រពន្ធបានស្តីបន្ទោស និងជេរប្រមាថខ្លាំងៗក៏បានជេរគ្នាទៅវិញទៅមក ខ្លួនក៏ខឹង និងទ្រាំលែងបានក៏ផ្ទុះហិង្សា ។ ជនដៃដល់ជាប្តីបានបន្តថា មូលហេតុគ្មានរឿងអ្វីធំដុំទេ តែដោយសារខ្លួនស្រវឹងស្រា ហើយខឹងប្រពន្ធស្តីបន្ទោសឱ្យផង ក៏ជ្រុលដៃវាយ និងអារ.កប្រពន្ធរហូតដល់ស្លាប់ទៅ ។
ប៉ូលិសដដែលបានបន្តថា យោងតាមចម្លើយសារភាព នឹងយោងទៅលើវត្ថុតាងកាំបិតខ្វែវចំនួន១ ដំបងឈើ១សមត្ថកិច្ចបានកសាងសំណុំរឿងពីបទឃាតកម្មបញ្ជូនជនដៃដល់ជាប្តីទៅសាលាដំបូងខេត្តចាត់ការទៅតាមនិតិវិធីច្បាប់ ។ អ្វីដែលគួរឱ្យស្រងេះស្រងោចបំផុតនោះគឺកូនទាំង៥នាក់ ដែលក្នុងចំណោមនោះ កូនម្នាក់ទើបតែមានអាយុជាង១ខួបផងដែរ បានក្លាយខ្លួនជាក្មេងកំព្រាម្តាយបាត់បង់គ្មានភាពកក់ក្តៅ ។ ឯឪពុកជាប់គុកគ្មានថ្ងៃចេញ ដែលនេះជាទង្វើរបស់ឪពុកអគតិមិនដឹងថាជាមនុស្សឬជាសត្វនោះទេ ទើបយកកំហឹងបន្តិចបន្តួចអារ.កសម្លាប់ប្រពន្ធដោយខ្វះសតិជាមនុស្ស ៕
ចែករំលែកព័តមាននេះ