ខេត្តបន្ទាយមានជ័យ ៖ យោងតាមរបាយការណ៍លទ្ធផលការងារឆ្នាំ២០១៧ របស់សាខាគយ និងរដ្ឋាករខេត្ត ដែលបានអនុវត្តការងារលើការប្រមូលពន្ធ និងការបង្ក្រាបបទល្មើសគេចពន្ធក្នុងខេត្តបន្ទាយមានជ័យ នៅឆ្នាំ២០១៧ រកចំណូលសរុបបានចំនួនជាង៩៣ម៉ឺនលានរៀល (៩៣៩.៤៧២លានរៀល)ឬប្រមាណជាង២៣០លានដុល្លារ ស្មើ១១៤,៦៤%នៃផែនការ ។
យោងតាមរបាយការណ៍បានបង្ហាញថា មន្ត្រីគយនិងរដ្ឋាករត្រួតពិនិត្យ និងប្រមូលពន្ធពីច្រកទ្វារព្រំដែនអន្តរជាតិប៉ោយប៉ែត រកចំណូលបានជាង៩០ម៉ឺនលានរៀល(៩០៤.៥២១លានរៀល), ច្រកតំបន់ព្រំដែនម៉ាឡៃ ស្រុកម៉ាឡៃ រកចំណូលបានជាង២ម៉ឺនលានរៀល (២២.៥៩៧លានរៀល) និងច្រកទ្វារតំបន់ព្រំដែនបឹងត្រកួន ស្រុកថ្មពួក រកចំណូលបានជាង៤ម៉ឺនលានរៀល(៤៥.៣៥៥លានរៀល) ។
លោក ឆែ សុធា ប្រធានសាខាគយ និងរដ្ឋាករខេត្ត បានលើកឡើងក្នុងពិធីប្រកាសផ្ទេរភារកិច្ចប្រធានការិយាល័យគយ និងរដ្ឋាករបឹងត្រកួនកាលពីពេលថ្មីៗនេះថា ៖« មន្ត្រីគយ និងរដ្ឋាករខេត្តបន្ទាយមានជ័យ បានខិតខំប្រមូលពន្ធជូនរដ្ឋឲ្យបានតាមផែនការ ដើម្បីអនុវត្តគោលការណ៍របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាំឲ្យប្រទេសមានសុខសន្តិភាព និងការអភិវឌ្ឍរីកចម្រើន » ។
ក្នុងឱកាសនោះ លោកប្រធានសាខាគយ និងរដ្ឋាករខេត ក៏បានក្រើនរំលឹកដល់ប្រធានការិយាល័យគយនិងរដ្ឋាករទាំងអស់ ត្រូវយកចិត្តទុកចំពោះការប្រមូលពន្ធជូនរដ្ឋ និងសម្រួលការងារពាណិជ្ជករជូនប្រជាពលរដ្ឋឲ្យបានល្អប្រសើរ ។
លោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានមានប្រសាសន៍ថា រយៈពេលកន្លងមក មន្ត្រីគយ និងរដ្ឋាករតាមច្រកតំបន់ព្រំដែន បានប្រមូលពន្ធជូនរដ្ឋ និងបម្រើពាណិជ្ជកម្មជូនប្រជាពលរដ្ឋបានល្អប្រសើរ និងមិនដែលមានរឿងអាស្រូវកើតឡើងឡើយ ។ កិច្ចខិតខំប្រឹងប្រែងនេះ បានឆ្លុះបញ្ចាំងការពីកែទម្រង់របស់រាជរដ្ឋាភិបាលកម្ពុជា ៕
ចែករំលែកព័តមាននេះ