រាជធានីភ្នំពេញ ៖ រាជរដ្ឋាភិបាលនឹងផ្តល់កាដូធំមួយទៀតដល់ប្រជាពលរដ្ឋខេត្តបន្ទាយមានជ័យ ក៏ដូចជាទូទាំងប្រទេស ដែលពួកគេអាចធ្វើដំណើរតាមរថភ្លើងពីក្រុងសិរីសោភ័ណ ទៅកាន់ក្រុងប៉ោយប៉ែត មុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។
កំណាត់ផ្លូវរថភ្លើងពីក្រុងប៉ោយប៉ែត មកក្រុងសិរីសោភ័ណ ខេត្តបន្ទាយមានជ័យ មានប្រវែង៤៨គីឡូម៉ែត្របានបញ្ចប់ការសាងសង់រួចរាល់ហើយកាលពីថ្ងៃទី១៣ កុម្ភៈ កន្លងមកនេះ ។
បើតាមមន្ត្រីជាន់ខ្ពស់ក្រសួងសាធារណការ និងដឹកជញ្ជូន លោក លី បូរិន អនុរដ្ឋលេខាធិការ និងជាមន្ត្រីទទួលបន្ទុកការងារផ្លូវដែក បានឲ្យដឹងនាល្ងាចថ្ងៃទី១៣ កុម្ភៈ ថា ខ្សែរថភ្លើងនេះនឹងមិនត្រឹមតែសម្រាប់ផ្ទៃក្នុងកម្ពុជានោះទេ ប៉ុន្តែវាតភ្ជាប់ជាមួយតំបន់អាស៊ាននាពេលអនាគត និងភ្ជាប់ជាមួយប្រទេសចិនផងដែរ ហើយតាមគម្រោងខ្សែរថភ្លើងភ្ជាប់ជាមួយប្រទេសថៃ ដឹកជញ្ជូនឆ្លងកាត់កម្ពុជា អាចចាប់ផ្តើមនៅចុងឆ្នាំនេះ ឬឆ្នាំ២០១៩ខាងមុខ ។
លោកបន្តថា ចំណែកកំណាត់ផ្លូវដែកតភ្ជាប់ពីក្រុងសិរីសោភ័ណ មកកាន់ក្រុងបាត់ដំបង មានប្រវែង៦៥គីឡូម៉ែត្រក៏ជិតបញ្ចប់ ហើយពិសេសការតភ្ជាប់មកកាន់រាជធានីភ្នំពេញ ក៏បាននិងកំពុងសាងសង់យ៉ាងសកម្មផងដែរ ។
ការដឹកជញ្ជូនតាមផ្លូវដែក ជាផ្នែកមួយយ៉ាងសំខាន់ ក្នុងការកាត់បន្ថយថ្លៃដើមនៃការដឹកជញ្ជូនដែលមានតម្លៃថ្លៃនៅកម្ពុជា ព្រោះបច្ចុប្បន្នការដឹកជញ្ជូននៅកម្ពុជាមានតម្លៃថ្លៃជាងបណ្តាប្រទេសនានានៅក្នុងតំបន់ ។
លោក វ៉ា ស៊ីមសុរិយា អ្នកនាំពាក្យក្រសួងសាធារណការ និងដឹកជញ្ជូន បានថ្លែងថា ដើម្បីជំរុញការអភិវឌ្ឍសេដ្ឋកិច្ច និងជំរុញកំណើនសេដ្ឋកិច្ចទៅកាន់កម្រិតថ្មីមួយទៀត កម្ពុជាចាំបាច់ត្រូវវិនិយោគលើវិស័យហេដ្ឋារចនាសម្ព័ន្ធ ព្រោះហេដ្ឋារចនាសម្ព័ន្ធជាចំណុចយុទ្ធសាស្ត្រ ក្នុងការសម្រួលការដឹកជញ្ជូនឲ្យកាន់តែមានតម្លៃទាប កាត់បន្ថយពេលវេលា និងកាត់បន្ថយអត្រាគ្រោះថ្នាក់ចរាចរណ៍ផងដែរ ។
លោកបន្តថា ៖« បើចង់អភិវឌ្ឍន៍សេដ្ឋកិច្ច ត្រូវកសាងហេដ្ឋារចនាសម្ព័ន្ធ ។ បើចង់ជំរុញប្រទេសកាន់តែរីកចម្រើនលឿន ក៏ត្រូវកសាងហេដ្ឋារចនាសម្ព័ន្ធដែរ » ។
ទោះជាយ៉ាងណា លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា មានការលើកឡើងថា ការតភ្ជាប់បណ្តាញរថភ្លើងរវាងប្រទេសកម្ពុជា-ថៃ ជាការល្អប្រសើរសម្រាប់ទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំងពីរ ប៉ុន្តែមានការព្រួយបារម្ភថា តើបណ្តាញខ្សែរថភ្លើងនេះមានទំនិញគ្រប់គ្រាន់សម្រាប់ដឹកជញ្ជូនដែរឬទេ ?
លោកបន្តថា ៖« ទោះជាយ៉ាងណា ការភ្ជាប់ហេដ្ឋារចនាសម្ព័ន្ធ ជារឿងល្អប្រសើរសម្រាប់ក្របខ័ណ្ឌផ្ទៃក្នុងកម្ពុជាផង និងសម្រាប់ក្របខ័ណ្ឌតំបន់ផង ដែលជាផ្នែកមួយនៃការធ្វើសមាហរណកម្មអាស៊ាន » ។
លោកបន្តទៀតថា ៖« វានឹងជួយកាត់បន្ថយតម្លៃនៃការដឹកជញ្ជូន ក៏ដូចជាជួយសម្រួលដល់លំហូរភ្ញៀវទេសចរផងដែរ » ៕
ចែករំលែកព័តមាននេះ