រាជធានីភ្នំពេញ ៖ យុវជនម្នាក់ជិះម៉ូតូក្នុងល្បឿនលឿនជ្រុលបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យរងរបួសធ្ងន់ធ្ងរពេលបញ្ជូនដល់មន្ទីរពេទ្យបានស្លាប់ ហេតុការណ៍នេះបានកើតឡើងកាលពីវេលាម៉ោង១២និង២០នាទីរំលងអធ្រាត្រ ឈានចូលថ្ងៃទី១៣ ខែកុម្ភៈ ឆ្នាំ២០១៨ នៅចំណុចមុខវត្តចាក់អង្រែក្រោម ភូមិទួលរកា ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ។
ជនរងគ្រោះខាងលើមិនទាន់ស្គាល់អត្តសញ្ញាណនៅឡើយទេ គ្រាន់តែដឹងថាជិះម៉ូតូម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ កណ្តាល ១V-៥៨៨២ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញជនរងគ្រោះជិះម៉ូតូម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ កណ្តាល ១V-៥៨៨២ ធ្វើដំណើរតាមបណ្តោយផ្លូវជាតិលេខ២ ទិសដៅពីត្បូងទៅជើង ក្នុងល្បឿនលឿន ខណៈមកដល់ចំណុចកើតហេតុ ដែលជាផ្លូវកោងក៏រេចង្កូតទៅបុកនិងក្បាលនាគពុះចែកទ្រូងផ្លូវ បណ្តាលឲ្យបោកក្បាលខ្ទប់ និងទ្រូងផ្លូវរងរបួសធ្ងន់ធ្ងរ ចំណែកម៉ូតូខ្ទាតចំងាយជាង៤០ម៉ែត្រ ។
ប្រភពដដែលបានបន្តទៀតថា ភ្លាមៗនោះរថយន្តសង្គ្រោះបានមកដឹកជនរងគ្រោះទៅសង្គ្រោះនៅមន្ទីរពេទ្យកាល់ម៉ែត្រ តែពេលទៅដល់មន្ទីពេទ្យ ក៏បានដាច់ខ្យល់ស្លាប់តែម្តង ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចហើយបានធ្វើលិខិតប្រគល់សពជនរងគ្រោះឲ្យរថយន្តដឹកសពជនរងគ្រោះយកទៅតម្កល់ទុកនៅវត្តទឹកថ្លា ដើម្បីស្វែងរកសាច់ញាតិបងប្អូនមកយកទៅធ្វើបុណ្យតាមប្រពៃណី ។ ចំនែកម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌមានជ័យ ដើម្បីរង់ចាំប្រគល់ឲ្យសាច់ញាតិរបស់ជនរងគ្រោះវិញ ៕
ចែករំលែកព័តមាននេះ