ខេត្តកំពត ៖ ពិតជាមានការចាប់អារម្មណ៍កាលបើអគារកាស៊ីណូសល់ពីអតីតកាលលើកំពូលភ្នំបូកគោ បានប្រែរូបរាងជាអគារដ៏ប្រណីតមួយរកនឹកស្មានមិនដល់នាពេលនេះ ។ ពិតជាគួរឱ្យចាប់អារម្មណ៍ចំពោះសំណង់ម៉ូដនៃអគារដែលបានសាងសង់តាំងពីសម័យអាណានិគមបារាំងមក គឺមានអាយុកាលជិត១០០ឆ្នាំមកហើយ តែនៅឈរយ៉ាងរឹងមាំលើកំពូលភ្នំ ទោះបីត្រូវបានបោះបង់ចោលតាមសម័យកាលដ៏ក្រឡាប់ចាក់នៅកម្ពុជាក្តី ។ ទោះជាបែបណា អគារដ៏ស្គឹមស្កៃនោះនៅតែស្ថិតក្នុងក្រអៅបេះដូងខ្មែរគ្រប់រូប ពីព្រោះថាសម្រាប់អ្នកដែលបានឡើងទៅកំពូលភ្នំបូកគោ គឺតែងតែទៅលេង ឬទៅមើលអគារអតីតកាស៊ីណូនោះគ្រប់ៗគ្នា ជាមួយនឹងការគិតផ្សេងៗគ្នាទាក់ទិននឹងអគារនេះ ។
ជណ្តើរឡើងទៅកាន់អគារ
សណ្ឋាគារ ឡឺបូកគោផាឡេស គឺជាឈ្មោះដែលបានប្រសិទ្ធនាមលើអគារជាសម្បត្តិជាតិនេះ ដែលរចនាម៉ូដដោយវិស្វករបារាំង និងអុីតាលី នៅក្នុងសម័យកាលប្រទេសបារាំងធ្វើអាណាព្យាបាល មកលើប្រទេសកម្ពុជា។ ការពិតទៅសណ្ឋាគារ-កាស៊ីណូបូកគោធ្លាប់បើកសម្ពោធជាលើកដំបូងនៅឆ្នាំ១៩២៥ នាសម័យអាណានិគម និងលើកទី២ក្នុងសម័យសង្គមរាស្ត្រនិយមឆ្នាំ១៩៦២ និងបានបោះបង់ ឬទុកចោលក្នុងសម័យសង្គ្រាម ។ ថ្មីៗនេះត្រូវធ្វើការជួសជុលកែលម្អលាបថ្នាំ និងតុងតែងឡើងជាថ្មី អស់រយៈពេលជាច្រើនខែកន្លងទៅ និងគ្រោងបើកឱ្យដំណើរការលើកទី៣ ទទួលភ្ញៀវទេសចរជាតិ និងអន្តរជាតិនាថ្ងៃទី៩ កុម្ភៈខាងមុខនេះ ។
តាមសេចក្តីប្រកាសព័ត៌មានរបស់ក្រុមហ៊ុនសុខាអូតែល កាលពីថ្ងៃទី៦ កុម្ភៈ ឱ្យដឹងថា សណ្ឋាគារឡឺបូកគោផាឡេស( Le Bokor Palace) សាងសង់លើផ្ទៃដី ជាង១ហិកតា មានកម្ពស់៤ជាន់ ស្មើនឹង៣៦បន្ទប់ ដែលមានអាយុកាលជិត១០០ឆ្នាំ(១៩២៥-២០១៨)មានទីតាំងស្ថិតនៅចន្លោះតំបន់ព្រៃត្រូពិចនិងឆ្នេរសមុទ្របៃតងលើឧទ្យានជាតិព្រះមុនីវង្សបូកគោ ក្បែរក្រុងកំពត សម្រាប់បម្រើជូនរាជវង្សានុវង្សនិងអភិជនជាច្រើនទសវត្សរ៍ ។ សណ្ឋាគារត្រូវបានបើកឡើងវិញ នៅដើមឆ្នាំ១៩៦២ ដោយព្រះករុណាព្រះបាទសម្តេច ព្រះនរោត្តមសីហនុ ដែលផ្តល់សេវាកម្មជូនមន្ត្រីជាន់ខ្ពស់ រាជរដ្ឋាភិបាល និងពាណិជ្ជករដែលមានទ្រព្យសម្បត្តិស្ដុកស្ដម្ភ ហើយវាក៏ជាកន្លែងវិស្សមកាលដែលព្រះករុណាព្រះបាទសម្តេចព្រះនរោត្តម សីហនុ ចូលចិត្តជាទីបំផុត ។
លោកFRUGERE F. Philippe អ្នកគ្រប់គ្រងទូទៅនៃសណ្ឋាគារឡឺ បូកគោផាឡេសបានមានប្រសាសន៍ថា៖«ឡឺបូកគោផាឡេសជាសណ្ឋាគារប្រវត្ដិសាស្ត្រ និងជារតនសម្បត្ដិរបស់ប្រទេសកម្ពុជា ។ ក្រុមហ៊ុនបានជួសជុលសំណង់អគារនេះសារជាថ្មី ដោយរក្សាទុកនូវលក្ខណៈពិសេសរបស់ស្ថាបត្យកម្មនេះ និងបង្កើតឡើងវិញនូវរចនាបទផ្ទៃខាងក្នុងបែបអាណានិគម ជាមួយនឹងគ្រឿងបំពាក់បន្ទប់ទឹកដែលនាំចូលមកពីប្រទេសអុីតាលី និងឥដ្ឋការ៉ូដ៏ប្រណីតដែលនាំចូលពីប្រទេសអេស្ប៉ាញ» ។
អគារចំណាស់ដែលឈរយ៉ាងកម្សត់លើកំពូលភ្នំ
លោកបន្តថា ក្រោយពីជួសជុលរួចរាល់ សំណង់អគារអាណានិគមដ៏ធំស្គឹមស្កៃនេះនឹងត្រូវបានបើកសម្ពោធជាថ្មីម្តងទៀត នាពេលខាងមុខនេះ មានបន្ទប់ស្នាក់នៅនិងបន្ទប់ស្វីតដ៏ប្រណីតចំនួន៣៦បន្ទប់ ភោជនីយដ្ឋានចំនួន២ ដែលបង្ហាញនូវប្រណិតភាពនៃសណ្ឋាគារនេះ នាសម័យអតីតកាល ដែលចុងភៅស្វ៊ីសនិងខ្មែរបានរៀបចំនូវមុខម្ហូបកាលពី១០០ឆ្នាំមុន និងម្ហូបអាហារគ្រួសាររាជវង្សខ្មែរ ជាមួយនឹងបន្លែសរីរាង្គនិងគ្រឿងផ្សំថ្មីស្រស់ ដែលដាំនៅក្បែរចំការបន្លែ ។ ឈ្មោះសណ្ឋាគារឡឺបូកគោផាឡេស ត្រូវបានរក្សាទុកក៏ដូចជាការរក្សាទុកនូវប្រវត្តិសាស្ត្រនៃអាណានិគម និងព្រះករុណាព្រះបាទសម្តេចព្រះនរោត្តម សីហនុ ។
សំណង់អគារអាណានិគមសេសសល់លើកំពូលភ្នំបូកគោ នៅតែអាចមើលឃើញនាពេលបច្ចុប្បន្នរួមមានផ្ទះជប៉ុន ព្រះវិហារកាតូលិក វត្តសំពៅប្រាំ ដំណាក់ស្លាខ្មៅ ដំណាក់ស្តេច សាលាក្រុង និងសំណង់អគារអាណានិគមជាច្រើនទៀត ដែលមានស្ទើរតែគ្រប់ទីកន្លែងនិងតែងតែត្រូវបានគ្របដណ្តប់ដោយអ័ព្ទសក្បុះ ។ ទន្ទឹមនឹងនេះភ្ញៀវទេសចរដែលស្នាក់នៅសណ្ឋាគារឡឺបូកគោផាឡេសដែលត្រូវបានគេស្គាល់ថា ជារមណីយដ្ឋានសុខភាពបែបធម្មជាតិក៏អាចទៅទស្សនាបឹង លើភ្នំដ៏ស្រស់ត្រកាល ទឹកជ្រោះពពកវិលដ៏ស្រស់ស្អាត ថ្មដែលបង្កើតជារូបរាងខុសៗគ្នា ជាច្រើននៅវាលស្រែ១០០ និងរូបរាងដ៏អស្ចារ្យនៃនិមិត្តរូបច្រកទ្វាររវាងឋានសួគ៌ និងឋានមនុស្ស ។ សណ្ឋាគារឡឺបូកគោផាឡេស ស្ថិតនៅច្រាំងថ្មចោតនៃកំពូលភ្នំបូកគោ ។
សណ្ឋាគារប្រវត្តិសាស្ត្រមួយនេះផ្តល់នូវទេសភាពដ៏ស្រស់ត្រកាលដែលត្រូវបានជនជាតិបារាំងហៅថា ឆ្នេរសមុទ្របៃតង ។ អាកាសធាតុនៅលើកំពូលភ្នំបូកគោមានសីតុណ្ហភាពចន្លោះពី១៧ដល់២៤អង្សាសេ ពេញមួយឆ្នាំ ។ ភ្នំបូកគោមិនត្រឹមតែជាគោលដៅទេសចរណ៍សម្រាប់ភ្ញៀវប៉ុណ្ណោះទេ ហើយវាក៏ជារមណីយដ្ឋានសុខភាព ដែលព្យាបាលដោយធម្មជាតិ រួមមានឥទ្ធិពលទៅលើសួត ការដកដង្ហើម សារធាតុចិញ្ចឹម ប្រព័ន្ធប្រសាទ ការស្តារឡើងវិញនៃចលនាឈាម និងការបង្កើនកម្លាំង ។ សណ្ឋាគារឡឺបូកគោផាឡេស គឺជាអគារបួនជាន់ដែលត្រូវបានរចនាឡើងយ៉ាងល្អិតល្អន់ជាមួយនឹងវត្តមានដ៏មានអានុភាព មានរានហាល និងជណ្តើរថ្មើរជើងបែបអុីតាលី ។
រមណីយដ្ឋានភ្នំបូកគោនេះ ស្ថិតនៅចម្ងាយ៤២គីឡូម៉ែត្រ ពីទីរួមខេត្តកំពត ។ ឧទ្យានជាតិភ្នំបូកគោនេះជាប្រវត្តិសាស្ត្រ ត្រូវបានរកឃើញដោយជនជាតិបារាំងម្នាក់ឈ្មោះ រូលួស ហើយត្រូវបានបង្កើតឡើងនៅថ្ងៃទី១៣ ខែមេសា ឆ្នាំ១៩២២ ក្នុងរជ្ជកាលព្រះបាទស៊ីសុវត្ថិ ។ ភ្នំបូកគោស្ថិតនៅរយៈកម្ពស់១០៧៥ម៉ែត្រមានខ្យល់អាកាសល្អបរិសុទ្ធ ទេសភាពធម្មជាតិដ៏ស្រស់ត្រកាល និងសែនមនោរម្យក្រៃលែងជាមួយនឹងដើមឈើធំៗ និងផ្ទាំងថ្មដែលមានរាងដូចជាសត្វ ។
ភ្នំបូកគោដែលត្រូវបានរកឃើញនៅក្នុងឆ្នាំ១៩១៦ និងអភិវឌ្ឍន៍ទៅជាកន្លែងសម្រាកលំហែកាយដ៏ពេញនិយម នៅសម័យអាណានិគមបារាំង និងក្នុងសម័យសង្គមរាស្ត្រនិយម នាទសវត្សឆ្នាំ១៩៦០ តែត្រូវបានបោះបង់ចោល២ដង ក្នុងនោះលើកទី១ នៅឆ្នាំ១៩៤០ និងលើកទី២ នៅឆ្នាំ១៩៧២ ។ នៅឆ្នាំ១៩៩៣ រដ្ឋាភិបាលដែលកើតឡើងពីការបោះឆ្នោត ក្រោមការត្រួតពិនិត្យរបស់អង្គការសហប្រជាជាតិ ដាក់តំបន់ភ្នំបូកគោក ជាឧទ្យានជាតិ ហើយនៅឆ្នាំ១៩៩៧ បានបើកឱ្យទេសចរចូលទៅលេងកម្សាន្តជាលើកដំបូង ។
លោក ថោង ខុន រដ្ឋមន្ត្រីក្រសួងទេសចរណ៍ ធ្លាប់មានប្រសាសន៍ថា រមណីយដ្ឋានភ្នំបូកគោ គឺជាមេដែកមួយ យ៉ាងសំខាន់ក្នុងការទាក់ទាញភ្ញៀវឱ្យមកទស្សនា នៅឯតំបន់ឆ្នេរភាគខាងត្បូង បើសិនជារមណីយដ្ឋាននេះ ធ្វើការអភិវឌ្ឍហើយរួចរាល់ជាស្ថាពរ ។ លោករដ្ឋមន្ត្រីបានមានប្រសាសន៍ថា «យើងសង្ឃឹមថា អ្នកទេសចរនឹងមកកាន់តំបន់នេះច្រើនថែមទៀត នៅពេលខាងមុខ ព្រោះថាតំបន់នេះមានធម្មជាតិល្អប្លែកគួរឱ្យចង់គយគន់ ជាងរមណីយដ្ឋាននានាដែលមាននៅក្នុងប្រទេស ៕
ចែករំលែកព័តមាននេះ