ខេត្តស្វាយរៀង ៖ ប្រជាពលរដ្ឋនៅតាមបណ្តាក្រុងស្រុកមួយចំនួននៅខេត្តស្វាយរៀង មានការព្រួយបារម្ភយ៉ាងខ្លាំង ខណៈដែលមានភាពមិនប្រក្រតីចំពោះបញ្ហាស្ថានីយប្រេងឥន្ធនៈចំនួន៣បានលក់ប្រេងឱ្យអតិថិជនមិនត្រឹមត្រូវតាមស្តង់ដាដែលមានកន្លែងដេប៉ូចែកចាយប្រេងនៅខេត្តស្វាយរៀងកំពុងមានការរីកចម្រើនស្អេកស្កះរាប់សិបកន្លែងដែលគេមិនដែលឃើញមន្ត្រីជំនាញចុះត្រួតពិនិត្យម្តងណាសោះ ហាក់ដូចជាត្រូវដងត្រូវផ្លែគ្នាអីចឹង។ ប្រភពដដែលបានឱ្យដឹងទៀតថា ការងារកាំកុងត្រូលគឺសំខាន់ណាស់តែនៅពេលប្តូរមេកាំកុងត្រូលសាខាស្វាយរៀងកាលពីចុងខែមករា ឆ្នាំ២០១៨នេះ សកម្មភាពរបស់មន្ត្រីកាំកុងត្រូលមួយចំនួនហាក់បីដូចជាមានសភាពសោះអង្គើយហីៗទៅ ប្រហែលជានៅតែក្នុងបន្ទប់ ធ្វើការដែលមានម៉ាស៊ីនត្រជាក់អង្គុយឆែកហ្វេសប៊ុក ហើយមើលទៅ ដែលវាខុសប្លែកកាលពីពេលមុន ដែលថ្នាក់ដឹកនាំ កាំកុងត្រូលសាខាស្វាយរៀងតែងតែចុះទៅពិនិត្យរកសារធាតុគីមីដែលច្បាប់បានហាមឃាត់ហើយព្រមទាំងបានធ្វើការអប់រំដល់អាជីវករ និងធ្វើការដកហូតនូវមុខទំនិញដែលច្បាប់បានហាមឃាត់ហើយក៏ធ្លាប់ធ្វើការវដុតកម្ទេចចោលផងដែរ។
ពាក់ព័ន្ធនឹងករណីខាងលើនេះលោក ផឹង និល ប្រធានសាខាកាំកុងត្រូលដែលទើបនឹងទទួលភារកិច្ចថ្មីនៅខេត្តស្វាយរៀង ដែលទើបនឹងត្រូវធ្វើការតែងតាំងនោះមិនអាចធ្វើការទំនាក់ទំនងបានទេ ប៉ុន្តែមន្ត្រីសាខាបានឱ្យក្រុមអ្នកសារព័ត៌មាន ដឹងថា នៅថ្ងៃទី៥ ខែកុម្ភៈ ឆ្នាំ២០១៨ កន្លងទៅអគ្គនាយកដ្ឋានកាំកុងត្រូល និងបាននាំយករថយន្តចល័តមន្ទីរពិសោធន៍ ចុះពិនិត្យស្ថានីយប្រេងឥន្ធនៈ នៅក្នុងខេត្តស្វាយរៀង ដើម្បីពិនិត្យរកអនុលោមភាពផ្នែកបរិមាណ និងគុណភាពបានចុះ ពិនិត្យប្រេងឥន្ធនៈនៅតាមស្ថានីយ ក្នុងនោះស្ថានីយលក់ប្រេងឥន្ធនៈចំនួន៣ ក្នុងចំណោម៦ ក្នុងក្រុងស្វាយរៀង ខេត្តស្វាយរៀង។ ជាលទ្ធផល មន្ត្រីជំនាញផ្នែកប្រេងឥន្ធនៈពិនិត្យ និងរកឃើញថា «មានការលក់ចែកចាយ មិនគ្រប់តាមរង្វាស់រង្វាល់ ជាហេតុធ្វើឱ្យអតិថិជនមានការខាតបង់»។ ប្រភពដដែលបានបញ្ជាក់ទៀតថា ការចុះត្រួតពិនិត្យគុណភាព និងបរិមាណប្រេងឥន្ធនៈ ធ្វើនៅតាមស្ថានីយទូទាំងប្រទេស។ ជាក់ស្តែងការចុះត្រួតពិនិត្យគុណភាព បរិមាណប្រេងឥន្ធនៈ និងដេប៉ូចែកចាយទាំង០៦ស្ថានីយ នៅក្នុងក្រុងស្វាយរៀង នាពេលនេះ ដោយប្រើប្រាស់រថយន្តពិសោធន៍ ចល័តផ្នែកប្រេងឥន្ធនៈរបស់អគ្គនាយកដ្ឋានកាំកុងត្រូល ដោយបំពាក់ឧបករណ៍វិភាគ និងឧបករណ៍រង្វាស់រង្វាល់ដែលអាចបញ្ជៀសការក្លែងបន្លំបាន។
លទ្ធផលនៃការពិនិត្យលើផ្នែកគុណភាព ប្រេងសាំងធម្មតា សាំង ស៊ុបពែ ប្រេងម៉ាស៊ូត លើស្ថានីយចំនួន៦ គឺត្រឹមត្រូវតាមស្តង់ដា៣កន្លែង ដោយឡែក៣កន្លែងទៀត មិនត្រឹមត្រូវទៅតាមស្តង់ដា ដោយផ្នែកបរិមាណបាញ់ចេញពីទុយោវិញ មានកម្រិតលំអៀងពី០៣លីត្រ ទៅ០៦លីត្រ ក្នុង១០០លីត្រ បាញ់ចេញ ពោលគឺមិនមានអនុលោមភាព ផ្នែកមរិមាណ១កន្លែង និងមិនមានអនុលោមភាពគុណភាព២កន្លែង។ យ៉ាងណាក៏ដោយ ស្ថានីយទាំង៣មិនត្រូវបានបង្ហាញអត្តសញ្ញាណនោះទេ ត្បិតសមត្ថកិច្ចជំនាញបានអប់រំណែនាំដល់ម្ចាស់ស្ថានីយប្រេងឥន្ធនៈទាំងនោះ ធ្វើកិច្ចសន្យាជាលើកទី០១ឲ្យកែប្រែឡើងវិញ ដោយទុកក្នុងរយៈពេល០១ខែទៀត ខាងមន្ត្រីជំនាញនឹងចុះមកពិនិត្យម្តងទៀត៕ គេនៅរង់ចាំមើលថាតើលោក ផឹង និល ដែលជាប្រធានសាខាកាំកុងត្រូលថ្មីខេត្តស្វាយរៀង អាចមានវិធានការក្តៅយ៉ាងណាចំពោះបញ្ហាដែលកំពុងមានការប្រឈមយ៉ាងខ្លាំងចំពោះមុខ៕
ចែករំលែកព័តមាននេះ