រាជធានីភ្នំពេញ ៖ ពុយ វណ្ណៈ មកពីក្លិបឃ្លាំងមឿងកីឡា និងសួន ចាន់នី មកពីក្លិបបក្សីស្លាបដែក ត្រូវជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ី នាថ្ងៃសុក្រទី២ កុម្ភៈ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំងពីរមួយណាសម្រេចគោលដៅ ខណៈកីឡាករថៃដែលពួកគេត្រូវជួបនាពេលនេះសុទ្ធតែជាជើងខ្លាំងពិបាកផ្ដួលអ៊ីចឹងនោះ ។
ពុយ វណ្ណៈ ត្រូវបានគណៈកម្មការរៀបចំឱ្យជួបប្រកួតជាមួយកីឡាករថៃឈ្មោះកងស្យាម ត.ភីតាក់ឆ័យ ដែលធ្លាប់មកប្រកួតនៅលើសង្វៀនស្រុកខ្មែរជាច្រើនលើករួចមកហើយ ។ មិនតែប៉ុណ្ណោះគេធ្លាប់ធ្វើឱ្យអ្នកប្រដាល់ជើងខ្លាំងកម្ពុជាជាច្រើននាក់ចាញ់នៅក្រោមកណ្ដាប់ដៃរបស់គេទៀតផង ។ ប៉ុន្តែសម្រាប់ការមកជួបជាមួយពុយ វណ្ណៈ ដែលជាជើងខ្លាំងម្នាក់ដែរនោះមិនដឹងជាយ៉ាងម៉េចនោះទេ ។ កីឡាករថៃម្នាក់នេះធ្លាប់ប្រកួត៦៥ដង ឈ្នះ៥៣ដង ស្មើ៣ដង ចាញ់៩ដង និងធ្លាប់ផ្ដួលគូប្រកួតឱ្យសន្លប់១៥ដង ។ រីឯពុយ វណ្ណៈវិញមួយរយៈមកនេះមិនសូវឃើញលេចមុខនៅលើសង្វៀនជាញឹកញាប់ឡើយ ។
ទោះបីយ៉ាងណា គេនៅចាំបានថា ពុយ វណ្ណៈ គឺជាជើងខ្លាំងមួយរូបធ្លាប់មានបទពិសោធន៍ប្រកួត៣០ដង ឈ្នះ២៥ដង ចាញ់៥ដង មិនដែលស្មើ និងធ្លាប់ផ្ដួលគូប្រកួតឱ្យសន្លប់បាន៧ដង ។ គូនេះបើប្រៀបធៀបទៅលើប្រវត្តិប្រកួតគឺខុសគ្នាជិតពាក់កណ្ដាល ប៉ុន្តែដោយសារមិនធ្លាប់ប៉ះគ្នាពីមុនមកគេមិនទាន់ដឹងថាអ្នកណាខ្លាំងជាងអ្នកណានោះទេ ។ ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះអ្នកណាខ្លាំងឬខ្សោយគង់តែដឹងទេ។
សួន ចាន់នី ក៏ជាជើងខ្លាំងម្នាក់ដែរ ប៉ុន្តែមួយរយៈមកនេះ មិនសូវឃើញលេចមុខនៅលើសង្វៀនញឹកញាប់ដូចមុនទេ ។ អ្នកប្រដាល់ដែល ល្បីខាងប្រើស្នៀតកែងផ្ដួលគូប្រកួតម្នាក់នេះ ធ្លាប់ប្រកួត១០១ដង ឈ្នះ៧៩ដង ស្មើ៤ដង ចាញ់១៨ដង និងផ្ដួលគូប្រកួតឱ្យសន្លប់៣៥ដង ។ ចំណែកកីឡាករថៃដែលសួន ចាន់នី ត្រូវជួបនាពេលនេះធ្លាប់ប្រកួត៧៩ដង ឈ្នះ៥៥ដង ស្មើ៤ដង ចាញ់១៦ដង និងធ្លាប់ផ្ដួលគូប្រកួតឱ្យសន្លប១៦ដង ។ គូនេះបើនិយាយពីបច្ចេកទេសប្រកួតវិញនោះ សួន ចាន់នី ល្អជាងខ្លាចតែចាញ់កម្លាំងប៉ុណ្ណោះ ។ ចាំមើលសួន ចាន់នី អាចផ្ដួលកីឡាករថៃរូបនេះបានឬអត់?
ចំណែកគូប្រកួតមិត្តភាពធម្មតាវិញកីឡាករ រឿង ខេត្ត មកពីក្លិបមកុដរាជសីហ៍ ប្រកួតជាមួយកីឡាករ ឃន សុខហេង មកពីក្លិបកុលបុត្រគុនខ្មែរ និងកីឡាករ ម៉ៃ ថៃប៊ឹប មកពីក្លិបខ្លារខិនមានរិទ្ធ ប្រកួតជាមួយកីឡាករ ង៉ែត្រ រដ្ឋា មកពីក្លិបតាព្រហ្មមានជ័យ ៕
ចែករំលែកព័តមាននេះ