ខេត្តស្វាយរៀង ៖ រមណីយដ្ឋានធម្មជាតិព្រៃកូនគគីរ ជាទីចាប់អារម្មណ៍របស់អ្នកទេសចរជាតិ និងអន្តរជាតិ ដោយមានអាហារពិសេសប្រចាំតំបន់គឺ«សម្លផ្សិតប្រចាក់ និងបបរផ្សិតប្រចាក់» ។ អាហារដ្ឋាននៅទីនោះមានមុខម្ហូបប្រើបន្លែធម្មជាតិ ត្រី…
ខេត្តស្វាយរៀង ៖ រមណីយដ្ឋានធម្មជាតិព្រៃកូនគគីរ ជាទីចាប់អារម្មណ៍របស់អ្នកទេសចរជាតិ និងអន្តរជាតិ ដោយមានអាហារពិសេសប្រចាំតំបន់គឺ«សម្លផ្សិតប្រចាក់ និងបបរផ្សិតប្រចាក់» ។ អាហារដ្ឋាននៅទីនោះមានមុខម្ហូបប្រើបន្លែធម្មជាតិ ត្រី សាច់ សុទ្ធសឹងជារបស់ប្រជាសហគមន៍ព្រៃឈើចម្ការកូនគគីរ។
រមណីយដ្ឋានធម្មជាតិព្រៃកូនគគីរ មានព្រៃធម្មជាតិទំហំ៤០៤ហិកតា ស្ថិតនៅក្នុងភូមិត្រពាំងផ្លុង សង្កាត់បាទីក្រុងបាវិត ។ បើធ្វើដំណើរពីរាជធានីភ្នំពេញតាមផ្លូវជាតិលេខ១ ដល់រង្វង់មូលរូបគោក្រុងស្វាយរៀងមានចម្ងាយ១២០គីឡូម៉ែត្រ បន្តដំណើរពីរទីក្រុងស្វាយរៀងតាមបណ្តោយផ្លូវជាតិលេខ១ឆ្ពោះទៅកាន់រមណីយដ្ឋានធម្មជាតិព្រៃកូនគគីរ ក្នុងចម្ងាយ៣២គីឡូម៉ែត្រ ។ ពេលដល់បង្គោលគីឡូម៉ែត្រលេខ១៥៧ ទៅតាមផ្លូវលំវត្តស្វាយកណ្តាលប្រវែង២០០ម៉ែត្រ ហើយដល់ផ្សារជីភូ ទៅរមណីយដ្ឋានធម្មជាតិព្រៃកូនគគីរមានចម្ងាយ៧គីឡូម៉ែត្រ ។ បើធ្វើដំណើរពីច្រកទ្វារព្រំដែនអន្តរជាតិបាវិតទៅកាន់រមណីយដ្ឋានធម្មជាតិព្រៃកូនគគីរមានចម្ងាយ១០គីឡូម៉ែត្រ ។
លោកធឿង សេដ្ឋា បុគ្គលិកអង្គការសន្តិសេនា និងជាអ្នកសម្របសម្រួលសហគមន៍ព្រៃឈើចម្ការកូនគគីរឲ្យដឹងកាលពីពេល ថ្មីៗកន្លងមកថា ព្រៃចម្ការកូនគគីរជាព្រៃប្រវត្តិសាស្ត្រ បង្កើតឡើងក្នុងសម័យអាណានិគមន៍បារាំងមានទំហំរាប់ពាន់ហិកតា ។ មកដល់ទសវត្ស៨០ ក្រោយសង្គ្រាមប្រជាពលរដ្ឋបានរុករានដីធ្វើស្រែ និងលំនៅឋាននៅសល់តែ៤០៤ហិកតា ។ អង្គការសន្តិសេនាបានសហការជាមួយអាជ្ញាធរឃុំបាទី ស្រុកចន្ទ្រារៀបចំក្រុមល្បាតការពារព្រៃឈើធម្មជាតិព្រៃកូនគគីរចាប់ពីឆ្នាំ១៩៩៩រហូតមកដល់ឆ្នាំ២០០០ ដោយរៀបចំសហគមន៍ព្រៃឈើចម្ការកូនគគីរជាផ្លូវការ ហើយបានដាំកូនឈើធម្មជាតិឡើងវិញ និងរៀបចំសួនអាពាហ៍ពិពាហ៍ និងទីស្នាក់ការបណ្តុះបណ្តាលបច្ចេកទេសកសិកម្មដល់សហគមន៍ ។ ក្រៅពីនេះក៏ជាព្រៃកន្លែងព្រះសង្ឃមកពីបណ្តាខេត្តនានាមកធ្វើធុតង្គ ។
នៅថ្ងៃទី១ ខែឧសភា ឆ្នាំ២០១៧ បានបង្កើតរមណីយដ្ឋានធម្មជាតិព្រៃកូនគគីរក្នុងគោលបំណងរកប្រាក់សម្រាប់ឧបត្ថម្ភគណៈកម្មធិការសហគមន៍ព្រៃឈើ និងក្រុមល្បាតការពារ និងអភិរក្សព្រៃឈើឲ្យមាននិរន្តរភាពដោយមានការគាំទ្រពីរអង្គការសន្តិសេនា ។រមណីយដ្ឋានធម្មជាតិព្រៃកូនគីរ មានស្ពានឆ្លងដើរចូលមើលព្រៃធម្មជាតិ និងមានសួនច្បារដើរមើលកម្សាន្ត ។មានស្រះត្រីធម្មជាតិ សម្រាប់ភ្ញៀវស្ទូច កម្សាន្ត និងយកមកធ្វើម្ហូបតាមចំណូលចិត្ត ។ ក្នុងស្រះមានក្បូនបណ្តែតលើទឹកចំនួន២សម្រាប់អង្គុយលេង និងស្ទូចត្រី ឬពិសាអាហារលក្ខណៈគ្រួសារ ។ មានខ្យូសចំនួន១៣ នៅតាមមាត់ស្រះដែលអាចទទួលភ្ញៀវបានជាមធ្យម៥០០នាក់ ។
អាហារដ្ឋានមានមុខម្ហូបខ្មែរម្ហូបប្រពៃណី គឺ«សម្លផ្សិតប្រចាក់ និងបបរផ្សិតប្រចាក់ »។ ផ្សិតប្រចាក់ស្រស់មានចាប់ពីខែឧសភាដល់ខែកក្កដា ចាប់ពីខែសីហាដល់ខែមេសាគឺប្រើផ្សិតក្រៀម ។ ម្ហូបពិសេសមានក្រចកជើងគោអាំង ទឹកប្រហុក បន្លែ គ្រប់មុខ ភ្លាអង្ក្រង សម្លម្ជូរអង្ក្រងឆ្អឹងជំនីរ មាន់ដុត សម្លកណ្តៀង និងមានម្ហូបកុម្ម៉ង់គ្រប់មុខតាមតម្រូវការ ។បច្ចុប្បន្នភ្ញៀវដែលចូលទៅកម្សាន្ត និងទទួលទានអាហារនៅក្នុងរមណីយដ្ឋានធម្មជាតិព្រៃកូនគគីរ ចំណាត់ថ្នាក់លេខ១ ភ្ញៀវជាតិខ្មែរ ទី២ជនជាតិចិន ទី៣វៀតណាម រីឯភ្ញៀវអឺរ៉ុបមានម្តងម្តាល ៕
ចែករំលែកព័តមាននេះ