រាជធានីភ្នំពេញ ៖ មន្ត្រីជាន់ខ្ពស់នៃក្រសួងការបរទេសកម្ពុជា និងជប៉ុនបានជំរុញដល់កូរ៉េខាងជើង គោរពតាមការសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលតម្រូវឱ្យកូរ៉េខាងជើងបោះបង់ចោលកម្មវិធីអាវុធនុយក្លេអ៊ែររបស់ខ្លួនជាបន្ទាន់។
នេះជាការលើកឡើងរបស់លោកទេសរដ្ឋមន្ត្រី ប្រាក់ សុខុន ពេលលោកបានជួបពិភាក្សាការងារជាមួយលោកអនុរដ្ឋមន្ត្រីការបរទេសជប៉ុន ព្រឹកថ្ងៃទី២៩ មករា រវាងទេសរដ្ឋមន្ត្រី ប្រាក់ សុខុន ទទួលជួបគណៈប្រតិភូជប៉ុន ដឹកនាំដោយលោក Kazuyuki Nakane អនុរដ្ឋមន្ត្រីការបរទេស និងជាសមាជិកសភាជប៉ុន នៅទីស្តីការក្រសួង។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានលើកឡើងថាលោក Kazuyuki Nakane អនុរដ្ឋមន្ត្រីការបរទេសជប៉ុន ទស្សនកិច្ចចំនួន៣ដងហើយនៅក្នុងប្រទេសកម្ពុជា ហើយដំណើរទស្សនកិច្ចនេះកាន់តែពង្រឹងទំនាក់ទំនងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំងពីរបន្ថែមទៀត។ លោកអនុរដ្ឋមន្ត្រីការបរទេសជប៉ុន ធ្លាប់បានមកទស្សនកិច្ចនៅប្រទេសកម្ពុជាពីរដងកាលពីកំឡុងឆ្នាំ២០១៥។
លោកទេសរដ្ឋមន្ត្រី ប្រាក់ សុខុន បានចូលរួមអបអរសាទរចំពោះការបើកការិយាល័យកុងស៊ុលរបស់ជប៉ុននៅខេត្តសៀមរាប កាលពីពេលថ្មីៗនេះ ព្រោះ «ការបើកការិយាល័យកុងស៊ុលរបស់ជប៉ុននៅកម្ពុជាពេលនេះ បង្ហាញពីការជឿទុកចិត្តរបស់ជប៉ុនសភាពការណ៍នៅកម្ពុជា»។ លោកទេសរដ្ឋមន្ត្រីបានលើកឡើងទៀតថា ៖ ការបើកកុងស៊ុលជប៉ុននៅកម្ពុជានៅខេត្តសៀមរាបនេះ រួមចំណែកបន្ថែមទៀតនូវទំនាក់ទំនងពិសេសផ្នែកទេសចរ ពាណិកម្ម និងវិនិយោគទុន។
លោកបានបញ្ជាក់ថា លោកបានសំដែងការត្រេកអរចំពោះលទ្ធផលប្រកបដោយផ្លែផ្កាទស្សនកិច្ចរបស់សម្តេចតេជោហ៊ុន សែន នាយករដ្ឋមន្ត្រីនៅជប៉ុន ខែសីហា ២០១៧។ លោកទេសរដ្ឋមន្ត្រីបានបញ្ជាក់ថា ជំហររបស់កម្ពុជា គឺរក្សាការពារឲ្យបានឯករាជ្យ និងអធិបតេយ្យភាពរបស់កម្ពុជា ហើយពង្រឹងឲ្យបាននូវសន្តិភាព ស្ថេរភាព និងការអភិវឌ្ឍន៍នៅកម្ពុជា។ ជាមួយគ្នានោះការត្រៀមបោះឆ្នោតដោយត្រឹមត្រូវ សេរី និងយុត្តិធម៌។
លោក Kazuyuki Nakane បានថ្លែងថា លោកមានការរីករាយក្នុងពេលដែលលោកបានមកបំពេញទស្សនកិច្ចនៅកម្ពុជា លើកទី៣ ម្តងទៀត។ លោកបានបញ្ជាក់ថា ការបើកកុងស៊ុលជប៉ុន នៅខេត្តសៀមរាប នៅពេលនេះចំពេលដែលប្រទេសកម្ពុជា-ជប៉ុន ប្រារព្ធខួប៦៥ឆ្នាំទំនាក់ទំនងការទូតរវាងប្រទេសទាំងពីរ។
លោកអនុរដ្ឋមន្ត្រីការបរទេសជប៉ុនបានបញ្ជាក់ថា ៖ ការបើកកុងស៊ុលនេះ បង្ហាញពីភាពស៊ីជម្រៅទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរកម្ពុជា-ជប៉ុន។ លោកថា ទំនាក់ទំនងសេដ្ឋកិច្ចបានកើនឡើងរវាងប្រទេសទាំងពីរ ជាពិសេសវត្តមានរបស់ប្រជាពលរដ្ឋជប៉ុន៣.៥០០នាក់ និងក្រុមហ៊ុនជប៉ុន២៥០ ចូលមករកស៊ីនៅប្រទេសកម្ពុជា។
លោកអនុរដ្ឋមន្ត្រីការបរទេសជប៉ុនបានបញ្ជាក់ពីជំហររបស់ប្រទេសជប៉ុនចំពោះប្រទេសកម្ពុជាថា ជប៉ុនបានត្រៀមខ្លួនក្នុងការធ្វើការងារជាមួយប្រទេសកម្ពុជា ឲ្យបានកាន់តែជិតស្និទ្ធ ដើម្បីអនុវត្តនូវរាល់ការព្រមព្រៀងសម្រេចរបស់ថ្នាក់ដឹកនាំនៃប្រទេសទាំងពីរកាលពីខែសីហា ២០១៧ រវាងសម្តេចតេជោ និងនាយករដ្ឋមន្ត្រីជប៉ុន។
លោកអនុរដ្ឋមន្ត្រីបានអះអាងទៀតថា ជំហររបស់ជប៉ុន នៅតែពង្រឹងពង្រីកកិច្ចសហប្រតិបត្តិការជាមួយកម្ពុជា លើគ្រប់វិស័យទាំងអស់ ក្នុងនោះមានវិស័យការពារប្រទេសជប៉ុននឹងបន្តជួយក្នុងការបណ្តុះបណ្តាលកងកម្លាំងរក្សាសន្តិភាព និងផ្នែកវប្បធម៌ការអភិរក្សប្រាសាទអង្គរ។
លោក ជុំ សុន្ធរី បានលើកឡើងថា ក្នុងជំនួបនេះដែរ លោកទេសរដ្ឋមន្ត្រី ប្រាក់ សុខុន និងលោកឯកអគ្គរដ្ឋទូតជប៉ុន បានពិភាក្សាគ្នាផងដែរ ពីការរៀបចំខួប៦៥ឆ្នាំទំនាក់ទំនងការទូតរវាងប្រទេសទាំងពីរ។ លោកអនុរដ្ឋមន្ត្រីការបរទេសជប៉ុនបានអះអាងថា ជប៉ុននឹងរៀបចំនៅពេលឆាប់ៗខាងមុខនេះ នូវមហាស្រពសិល្បៈសម្រាប់ការអបអរសាទរ។
លោកបានលើកឡើងថា ភាគីជប៉ុនក៏បានលើកឡើងពីកិច្ចសហប្រតិបត្តិការមេគង្គ-ជប៉ុន ក៏ដូចជាអាស៊ាន-ជប៉ុន។ ក្នុងភាគីទាំងពីរបានពិភាក្សាលើបញ្ហាក្នុងតំបន់មួយចំនួនផងដែរ រួមមានការព្រួយបារម្ភនៃភាគីទាំងពីរលើបញ្ហានៅឧបទ្វីបកូរ៉េ។ លោកទេសរដ្ឋមន្ត្រី ប្រាក់ សុខុន បានលើកឡើងថា កម្ពុជាបានទាមទារឲ្យមានការបញ្ឈប់កម្មវិធីនុយក្លេអ៊ែររបស់កូរ៉េខាងជើង។ ហើយកម្ពុជាមានបំណងចង់ឃើញសន្តិភាពនៅឧបទ្វីបកូរ៉េ។
លោក ប្រាក់ សុខុន បន្តថា៖ «កម្ពុជាប្រឆាំងជាដាច់ខាតចំពោះការចាប់ពង្រត់ជនជាតិជប៉ុន ដោយកូរ៉េខាងជើង»។ ជាការឆ្លើយតបលោកអនុរដ្ឋមន្ត្រីការបរទេសជប៉ុនបានសំដែងការស្វាគមន៍ចំពោះជំហរកម្ពុជាលើបញ្ហាឧបទ្វីបកូរ៉េ ។ ភាគីទាំងពីរបានលើកឡើងពីការគាំទ្រគ្នាទៅវិញទៅមកលើឆាកអន្តរជាតិ។
លោក ជុំ សុន្ទរី បានលើកឡើងថា ដោយសារតែកម្ពុជា គឺជាសមាជិកក្រុមប្រឹក្សាសន្តិសុខរបស់សហប្រជាតិ ដូច្នេះកម្ពុជាគោរពតាមក្រុមប្រឹក្សាសន្តិសុខរបស់សហប្រជាតិ និងកាត់បន្ថយទំនាក់ទំនងជាមួយកូរ៉េខាងជើង តាមរយៈការមិនបញ្ជួនប្រតិភូកម្ពុជាទៅកូរ៉េខាងជើង និងមិនទទួលប្រតិភូរបស់កូរ៉េខាងជើងមកទស្សនកិច្ចនៅកម្ពុជា ដើម្បីចៀសវាងការលើកឡើងណាមួយថា កម្ពុជាលើកទឹកចិត្តដល់កូរ៉េខាងជើងក្នុងរឿងអាវុធនុយក្លែអ៊ែរ បើសិនកម្ពុជាណាបញ្ជូនប្រតិភូទៅទីនោះ។ ដូច្នេះនេះជាសារមួយដល់កូរ៉េខាងបោះបង់កម្មអាវុធនុយក្លេអ៊ែរ និងងាកមកគោរពការសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ៕
ចែករំលែកព័តមាននេះ